Joni 12:48 - Baibo Busansulushi Bwa Libuku Ili

⁴⁸ Uyo woonse ukaka ndime amaswi angu ulicite umwi eshi akamoomboloshe. Maswi ayo ngondaamba ngweshi akamoomboloshe pabushiku bwakweelaako.

Joni 12:48 Marejeleo ya Msalaba

Luka 10:16

Jesu wakaambila bashikwiiya bakwe ayi, “Uyo woonse unyumfwila ndimwe ulanyumfwila ndime, uyo ukaka ndimwe ulakaka ndime, alakwe uyo woonse ukaka ndime wakaka awooyo wakantuma.”

Bene Loma 2:16

Mbweekoobo mbweshi cikabe pabushiku Lesa ndyeshi akoomboloshe bantu kwiinda muli Jesu Klistu pasheesho nshebayeeya beene, kweelana aMakani Abotu aya ngoonshimikila.

2 Bene Tesalonika 1:8

Ulaakwisa amulilo weshi ukanoobilima akutondesha bukali bwakwe kubakaka kwishiba Lesa abaabo bakaka kukonkela shaamba Makani Abotu a paMwaami wesu Jesu.

Joni 11:24

Malita wakakumbula ayi, “Ndishi kwaamba ayi ulaakubuka alimwi baakubuka bafu pabushiku bwakweelaako.”

Bene Ebulu 12:25

Paceebo ceeco, amucenjele kwaamba ayi mutakaki kunyumfwila wooyo utokwaamba amwebo. Boonse abo bakakaka kunyumfwila wooyo wakabacenjeshaako pacishi ca panshi pano kwiinda mumakani akwe Lesa, tabakwe kupuluka. Ono na twakaaka kunyumfwila wooyo utokwaamba kuswa kwiculu, ncakwiila aswebo teshi tukapulukeewo.

Isaya 53:3

Bantu bakamukaka akumusebaanya. Ncakwiila wakalinga muntu shimapensho, ee, muntu uyo wakalinga kupenga. Wakalinga anga ngumuntu uyo bantu ngobalanga kumbi pakukumanaakwe munshila. Wakasebaana aswebo twakamulangabo anga na nciinshibo.

Bene Ebulu 2:3

Ino swebo tulaakupuluka buyani na tatutoonyumfwila makani a lupulusho lunene bobulya? Mwaami Jesu mwiine ngowakataanguna kwaamba shalupulusho ulu, abalo abo bakamunyumfwa bakatulwiitilisha ayi ngalushinisho.

Joni 5:45

Ono mutayeeyi kwaamba ayi nebo ndaakumushinina pameenso a baTa. Sombi eshi akamushinine nguMose eenka uyo ngomucinkiteemo manungo.

Mateyo 21:42

Lyalo Jesu wakabeepusha ayi, “Sa tamukwe kubelengawo kale Malembo akwe Lesa akwaamba ayi, ‘Libwe bayaki ndibakakaka lyakaba ndyelibwe lya mulikonko lya ŋanda, libwe lisuniki abuumbi. Mwaami Lesa ngowacita ceeci, alimwi ncintu cikankamika abuumbi mumeenso esu?’

1 Samwelo 10:19

Ndime Lesa wanu, uyo eenka umufuna kuswa kumapensho amakatasho anu. Ono sunu mwankaaka akusenga ayi mupe mwaami. Ncibotu, amubungane pameenso angu neMwaami Lesa mumukowa amukowa, cipani acipani.’ ”

2 Bene Kolinto 4:3

Ceebo na Makani Abotu ngotushimikila alishisitwe, ingayi nkubaabo beenka batoosoweka.

Luka 20:17

Jesu wakabalangishisha akubeepusha ayi, “Ono malembo aya alaambanshi? ‘Libwe bayaki ndibakakaka, lyakaba ndyelibwe lya mulikonko lya ŋanda.’

Luka 17:25

Sombi ulyeelete kutaanguna kupenshekwa abuumbi akukakwa abantu ba cecino ciindi.

Luka 9:26

Paceebo ceeco uyo woonse unyumfwa nsoni ceebo ca ndime amaswi angu, alakwe MwanaaMuntu ulaakumunyumfwila nsoni pakwisa mubulemu bwakwe amubulemu bwa baIshi alimwi abwa baanjelo basalalite.

Luka 9:22

Wakabaambila alimwi ayi, “MwanaaMuntu ulyeelete kupenshekwa abuumbi, akukakwa abamaloba, bamatanjilili ba bapailishi abafundishi ba Milawo. Balaakumucaya, sombi pabushiku bwatatu ulaakubushikwa kuswa kubafu.”

Luka 7:30

Sombi baFalisi abafundishi ba Milawo mukukaka kubombekwa aJoni, bakakaka muyeeyo wakwe Lesa ngwaakabamba.

Maako 16:16

Uyo woonse ushoma akubombekwa, ulaakupulushikwa. Sombi uyo utashomi, ulaakupekwa mulandu.

Maako 12:10

Sa tamukwe kubelengawo kale Malembo akwe Lesa akwaamba ayi, ‘Libwe bayaki ndibakakaka lyakaba ndyelibwe lya mulikonko lya ŋanda, libwe lisuniki abuumbi.

Mateyo 25:31

“Ono MwanaaMuntu ndyeshi akese mubulemu abaanjelo bakwe boonse ba kwiculu, ulaakwikala pacuuna cakwe ca Bwaami.

1 Samwelo 8:7

Mwaami Lesa wakaamba ayi, “Nyumfwila shoonse bantu nsheenga baamba kuli ndiwe. Tabatookaka ndiwe, sombi nebo. Ndime bakaka kunoocili mwaami wabo.

Milimo ya Batumwi 3:23

Uyo woonse eshi akabule kunyumfwila nsheshi akaambe mulaluki uyo, ulaakupansaanishikwa kuswa kubantu bakwe Lesa akunyonyoolwa.’

Maako 8:31

Mpomunyaawo Jesu wakatalika kwiisha bashikwiiya bakwe ayi, “MwanaaMuntu ulyeelete kupenshekwa abuumbi alimwi bamaloba, bamatanjilili ba bapailishi alimwi abafundishi ba Milawo balaakumukaka akumucaya. Sombi pabushiku bwatatu, ulaakubuka kuswa kubafu.”

Mateyo 10:15

Ntoomulwiita calushinisho ayi pabushiku bwakoomboloshekwa, Lesa ulaakupa ndabala iyo mulandu unene kwiinda Sodoma aGomola!

Joni 6:39

Nkuyanda kwakwe uyo wakantuma kwaamba ayi ntasoowi nabi womwi pabaabo mbwaakampa, sombi kwaamba ayi boonse nkababuushe kuswa kubafu pabushiku bwakweelaako.

Joni 8:47

Mukwiinga uyo woonse uli muli Lesa ulanyumfwa shaamba Lesa. Aboobo mwebo ncemutanyumfwili ceebo tamubete muli Lesa.”

Milimo ya Batumwi 17:31

Mukwiinga wakasala bushiku bomwi mbweshi akoomboloshe bantu boonse mucishi mubululami, kwiinda mumuntu uyo ngwaakasala. Wakabonesha shoonse ishi kubantu kwiinda mukubusha muntu uyo kuswa kubafu!”

Bene Ebulu 4:12

Mukwiinga maswi akwe Lesa ali anga ncintu cuumi alimwi alicite nkusu. Alikolete kwiinda mupeeni ukolete koonse kobilo. Alatimbula pakati kushikila apali moyo amuuya alimwi apali shifuwa alimwi amoomo. Maswi akwe Lesa alayubulula sheesho bantu nshebayeeya alimwi anshebasuni.

Bene Ebulu 10:25

Anu tutacileeki kwishibila kwesu kwakubungana pantu pomwi, mbuli butoocita bamwi. Sombi twiindilisheewo kuyuminishanya, mukwiinga twaboona ayi Bushiku bwakwisa kwa Mwaami Jesu bwasenena.

1 Pita 1:5

Lesa kwiinda munkusu shakwe, ulamulama kabotu ceebo ca lushomo ndomucite kwaamba ayi mukatambule lupulusho ulo ndweshi akayubulule kumeelelesho aciindi.

2 Pita 3:3

Cinene ncemweelete kwishiba ncakwaamba ayi munshiku shino shakweelaako, kulaakwisa bantu beshikumuseka abo beendeleshekwa alunkumbwa lwa mibili yabo.

2 Pita 3:7

Sombi kwiinda mumaswi akwe ngomunya aya, Lesa utoolama liculu alimwi acishi ca panshi ncetubona bulya, kwaamba ayi ulaakushinyonyoola amulilo. Ulishibambite kushikila pabushiku mbweshi akoomboloshe alimwi akunyonyoola bantu batakonkeli kuyanda kwakwe.