Joni 1:14 - Baibo Busansulushi Bwa Libuku Ili

¹⁴ Mpeeke Liswi ili lyakaba muntu akwisa mukwikala pakati kesu, kaaswite luse alushinisho. Twakabona bulemu bwakwe ubo mbwaakatambula ceebo wakalinga Mwaana eenkabo wa baIshi.

Joni 1:14 Marejeleo ya Msalaba

Kulumbaisha 2:7

Ono mwaami uyo waamba ayi, “Ntokwaambilisha Mwaami Lesa ncaamba. Wandwiita ayi, ‘Webo uli mwanaangu, sunu ndaba baiso.

Kulumbaisha 45:2

Ndimwe mwiindaawo kuboneka kabotu pabasankwa bamwi boonse, awalo mulomo wanu ulaamba caluse mukwiinga Mwaami Lesa wamupa coolwe ca lyoonse alyoonse.

Kulumbaisha 85:9

Ncakwiila Lesa ulilibambite kupulusha bantu bamulemeka, kwaamba ayi bulemu bwakwe bwikale mucishi cesu.

Isaya 40:5

Lyalo bulemu bwa Mwaami Lesa bulaakuyubululwa. Mpeeke mishobo yoonse ilaakububona. Ee, ceebo Mwaami Lesa mwiine mbwaamba ubo.”

Isaya 53:2

Musebenshi wakwe ulya wakakula anga ninsoonseela kumeenso akwe Lesa nabi anga ngumuyanda watuntula mubulongo buyumu. Taakalinga kucitewo bulemu alimwi taakalingawo mubotu cakukonsha kutukwelela kuli nguwe Mbonekelo shakwe teshakalinga kukonsha kutapa myoyo yesu kuya pali nguwe.

Isaya 7:14

Paceebo ceeco Mwaami Lesa mwiine ulaakukupa citondesho. Ncakwiila mwanakashi utana kukumanawo kale amusankwa ulaakumita akushala mwaana musankwa eshi akanokwiitwa ayi Imanuweli.

Esekelo 37:27

Ndaakunookala pakati kabo. Ndaakuba Lesa wabo, abalo balaakuba bantu bangu.

Mateyo 1:16

Jakobo wakashala Josefu muka Maliya, banyina Jesu wiitwa ayi Klistu.

Luka 2:11

Sunu mundabala yakwe Defedi mwashalwa Mupulushi wanu uyo ngoKlistu Mwaami.

Luka 2:7

Wakapulukaamo mwaana wakwiiya musankwa. Wakamupetelesha mushisani akumooneka mulinkubala lyakalinga kulitaamo ŋombe mukwiinga temwakalinga musena muŋanda ya beensu.

Luka 9:32

Pita abaabo mbaakalingaabo bakanyumfwa tulo, mpeeke ndibakapapuka bakabona bulemu bwakwe Jesu abantu bobilo kabeemfwi anguwe.

Joni 1:1

Kumatalikilo a cishi uyo wiitwa ayi Liswi wakalingaako kale. Uyu Liswi wakalinga pantu pomwi aLesa alimwi nguLesa.

Joni 11:40

Lyalo Jesu wakeepusha ayi, “Sa nshikwe kukulwiita ayi na ulashoma ulakonsha kubona bulemu bwakwe Lesa?”

Joni 14:6

Jesu wakakumbula ayi, “Nebo ndi nshila, ndi lushinisho alimwi ndi buumi. Taaku muntu weenga washika kuli baTa, sombibo kwiinda muli ndime.

Joni 14:9

Jesu wakakumbula ayi, “Ciindi kukomena ncendekalaanu, ono anu abobulya Filipo toona kwinshiba? Uyo wabona ndime wabona abaTa. Ono inga waamba buyani ayi, ‘Mututondeshe baIshiwanu’?

Joni 17:22

Ndakabapa bulemu bweenka mbomwakampa kwaamba ayi babe womwi bweenka mbuli ndimwe anebo mbotuli womwi.

Joni 17:24

“Ta, ndisuni kwaamba ayi abo mbomwakampa bakabe anebo uko nkweshi nkabe. Ndisuni kwaamba ayi bakabone bulemu bwangu ubo mbomwakampa mukwiinga mwakansuna cishi ca panshi kacitana kulengwa.

Joni 18:37

Aboobo Pilato wakeepusha ayi, “Nkokwaamba ayi uli mwaami?” Jesu wakakumbula ayi, “Waamba kabotu pakwaamba ayi ndi mwaami. Ncakwiila nceceeco ncendakashalilwa alimwi ncendakeshita mucishi ca panshi. Ndakesita kusansulula shalushinisho. Woonse uyo uli kulubasu lwa lushinisho, ulanyumfwa nsheŋamba.”

Joni 2:11

Ici, ncaankamiko citaanshi Jesu ncaakacita mucishi ca Galili, wakatondesha nkusu sha bulemu bwakwe, aboobo bashikwiiya bakwe bakamushoma.

Joni 3:16

Lesa wakasunisha bantu boonse ba mucishi ca panshi abuumbi. Aboobo wakatuma Mwanaakwe wakashalwabo eenka kwaamba ayi uyo woonse umushoma ataloobi, sombi abe abuumi butamaani.

Joni 3:18

Nkokwaamba ayi uyo woonse ushoma muli nguwe taomboloshekwi, sombi uyo woonse utashomi woomboloshekwa kale mukwiinga taakwe kushoma Mwanaakwe Lesa uyo wakashalwa eenkabo.

Joni 6:51

Ndi cakulya cipa buumi cakaswa kwiculu. Na muntu uli woonse walya cakulya ici, ulaakuba abuumi butamaani. Cakulya ico nceshi nkamupe ngumubili wangu, uyo ngweshi nkape ayi bantu boonse ba mucishi ca panshi babe abuumi.”

Joni 8:32

Lyalo mulaakwishiba lushinisho, alwalo lushinisho ulo lulaakumwaangulula.”

Milimo ya Batumwi 13:33

wacitila ndiswe sobamulunyungu lwabo kwiinda mukubusha Jesu kuswa kubafu. Kweelana ambokulembetwe muKulumbaisha kwabili ayi, ‘Webo uli mwanaangu, sunu ndaba baiso.’

Bene Loma 8:3

Isho Milawo nsheyakaalilwa kucita ceebo buumi bwa buntu bwakeemana nkusu, Lesa wakashicita. Wakacita boobo kwiinda mukutuma Mwanaakwe, uyo wakesa mucishi ca panshi mubuntu bweenka mbuli ndiswe kwaamba ayi akome bubi.

Bene Loma 9:5

Balo bakaswa mucishiko ca mishobo yoonse ya bene Isilaeli. Alakwe Klistu kwiinda mukushalwa kwabuntu ngwa mumushobo wabo. Aalumbaishikwe lyoonse Lesa uyo weendelesha shintu shoonse. Ameni.

1 Bene Kolinto 15:47

Adamu mutaanshi wakalinga wa pacishi ca panshi alimwi wakaswa kubulongo, sombi Adamu wabili, wakaswa kwiculu.

2 Bene Kolinto 12:9

Sombi wakankumbula ayi, “Luse lwangu lulikwene pali ndiwe, ceebo nkusu shangu shilaboneka bunene na koolefukite.” Ono nanoolilumbaisha cakukondwa ceebo cakulefuka kwangu kwaamba ayi nkusu shakwe Klistu shibe pali ndime.

Bene Galatiya 4:4

Sombi ciindi ceelete ndicakashikila, Lesa wakatuma Mwanaakwe uyo wakashalwa mumwanakashi alimwi Mwaana uyo wakalinga kukonkela aMilawo ya baJuda.

Bene Efeso 3:8

Nebo ndime mucaalishi kubantu bakwe Lesa, nakubi boobo wakampa mulimo uyu wakushimikila baswamashi bakunsengwe Makani Abotu abubile buunji abuumbi bwa muli Klistu.

Bene Kolose 1:19

Mukwiinga Lesa cakamukondelesha kwaamba ayi bulesa bwakwe boonse bwikale muli nguwe.

Bene Kolose 2:3

Muli nguwe momushisitwe bubile boonse bwa busongo alimwi alushibo.

Bene Kolose 2:9

Mukwiinga muli Klistu bulesa boonse bulekala mumubili wa buntu

1 Timoti 3:16

Ncakwiila shabushishi bwa kupaila kwesu nshinene abuumbi. Nsheeshi, Lakwe wakaboneka mubuntu, wakaambwa aMushimu Usalashi ayi ngooluleme, wakabonwa abaanjelo. Wakashimikilwa pakati ka baswamashi bakunsengwe, wakashomwa kubamucishi ca panshi coonse alimwi akutolwa kwiculu mubulemu.

Bene Ebulu 1:3

Muli nguwe mulaboneka kumweka kwa bulemu bwakwe Lesa alimwi ncecikoshanyo ciine ca bube bucite Lesa. Ngoolengesha shintu shoonse mucishi ca panshi kuba bweenka mboshibete kwiinda mumaswi akwe a nkusu. Ndyaakamana kulengesha Lesa kulekelela shibiibi sha bantu, wakaya kwiculu mukwikala kululyo lwakwe Lesa Shinkusu shiindaawo.

Bene Ebulu 1:5

Mukwiinga kuswabo kale kale, taaku munjelo Lesa ngwaakaambilawo kale ayi, “Ndiwe Mwanaangu, sunu ndaba baIso.” Alimwi Lesa taakwe kwaambilawo kale munjelo nabi womwi ayi, “Nebo ndaakuba baIshi alakwe ulaakuba Mwanaangu.”

Bene Ebulu 10:5

Paceebo ceeco, Klistu ndyaakalinga pafwaafwi kwisa mucishi ca panshi, wakaambila Lesa ayi, “Toosuni milambu ashipo shimwi shoonse sombi walengesha ayi mbe amubili.

Bene Ebulu 2:11

Ulasalasha myoyo ya bantu kuswa kushibiibi shabo alimwi lakwe abaabo basalashikwa, boonse balaba aIshiwabo womwi. Nceceeco Jesu ncaatanyumfwili nsoni kubeeta ayi bamakwabo.

Bene Ebulu 5:5

Mbweeke ubo, alakwe Klistu taakwe kulipa bulemu bwakuba Mupailishi Munene mwiine. Sombi nguLesa wakamwaambila ayi, “Ndiwe Mwanaangu, sunu ndaba baIso.”

1 Joni 4:14

Peculu lya waawo twakabona akulwiitako bamwi ayi Lesa Ishiwesu wakatuma Mwanaakwe ayi abe Mupulushi wa cishi ca panshi.

1 Joni 4:9

Lesa wakatondesha ayi ulitusuni kwiinda mukututumina Mwanaakwe wakashalwabo eenka mucishi ca panshi ayi muli nguwe tukabe abuumi.

2 Joni 1:7

Ceebo kuli babeshi baanji balibo cishi coonse ca panshi, abo batasumini ayi Jesu Klistu wakesa mubuntu. Muntu utasumini makani aya ngumubeshi alimwi ngumulwani wakwe Klistu.

Ciyubululo 19:13

Cisani ncaakalinga kufwete cakasumpwa mubulowa, liina lyakwe “NguLiswi lyakwe Lesa.”

Ciyubululo 21:3

Mpeeke ndakanyumfwa liswi lyakoolobeshekwa kuswa kucuuna ca bwaami ayi, “Ono musena wakwe Lesa waba pakati ka bantu! Ulaakunookalaabo, abalo balaakuba bantu bakwe. Lesa mwiine ulaakunooli ambabo alimwi ulaakuba Lesa wabo.