Jelemiya 9:22 - Baibo Busansulushi Bwa Libuku Ili

²² Mwaami Lesa waamba ayi, “Baambile ayi, ‘Mituntu ya bantu ilaakunoolibo anga ngamatombe apantantaala muluundu. Ee, ilaakunoobonekabo anga ngamaila aceswabo kwakutaabunjika kwisule lya shikucesa.’ ”

Jelemiya 9:22 Marejeleo ya Msalaba

2 Baami 20:13

Esekiya wakatambula beshinkombe alimwi wakabatondesha buboni bwakwe boonse, nkokwaamba ayi silifa, golodi, tununkila kabotu mubuyani, mafuta anunkila kabotu, shakulwanisha shakwe shoonse alimwi abuboni boonse bwakalinga mushipinda shakwe shakubusungilamo. Taaku cintu nabi comwi muŋanda ya bwaami nabi mubuleelo bwakwe boonse cakacaala kutababonesha.

2 Baami 20:15

Isaya wakeepusha ayi, “Babonaawonshi muŋanda ya bwaami muno?” Esekiya wakakumbula ayi, “Shoonsebo bashibona. Taaku cintu nabi comwi mushipinda shangu shakusungilamo buboni nceentakwe kubabonesha.”

2 Baami 9:37

Sheshi shikaacaale shilaakupalanganishikwa anga ngamafumba. Taaku muntu weshi akashishiibe ayi nshakwe Jesebelo.’ ”

Jobo 5:13

Ulacatisha basongo kwiinda mubucenjeshi bwabo alimwi ulafulunganya maano abacenjete cakufwambaana.

Kulumbaisha 49:7

Ncakwiila taaku muntu weenga walilubula mwiine. Taaku muntu ukonsha kulipila mweelo wa buumi bwakwe kuli Lesa.

Kulumbaisha 83:10

Bamaami abo mwakabalobya muEndoli, mituntu yabo yakabola pabulongo.

Tushimpi 18:11

Babile balayeeya ayi buboni bwabo ndyelilinga lyabo. Ee, balayeeya ayi buli anga ndilinga lilaamfu kundabala inene.

Tushimpi 23:4

Utalipenshi kuyanda kubila, tondesha busongo bwakulicata.

Isaya 5:25

Paceebo ceeco Mwaami Lesa wakalalila bantu bakwe akutandabika lyaansa lyakwe ayi abape mulandu. Tulundu twatenkaana. Mituntu ya bantu ilaakunooli anga ngamatombe mumikwakwa. Nakubi boobo bukali bwakwe teshi bukamaane, sombi lyaansa lyakwe lilaakunoocitandabete mukubapa mulandu.

Jelemiya 16:4

Balaakufwa kumalwashi ayoosha. Teshi bakalilweewo nabi kubikwa. Sombi mibili yabo ilaakubabo anga ngamatombe apantantaala peculu lya nshi. Balaakuloba kunkondo akunsala. Lyalo mituntu yabo ilaakuba cakulya ca bayuni abanyama bamuluundu.

Jelemiya 25:33

Ciindi ico abo boonse beshi bakacaikwe kuMwaami Lesa balaakunoolibo luundu loonse. Nkokwaamba ayi kuswa kweela cishi kuya mukushika ankoceela. Teshi bakabunjikweewo nabi kufukilwa. Sombi balaakubabo anga ngamatombe apantantaala peculu lya nshi.

Jelemiya 6:21

Paceebo ceeco Mwaami Lesa utookwaamba ayi, “Ndakubika shakulisuntulako kunembo lya bantu aba. Bamashali basankwa abana babo balaakuwa, abalo beshimukobonyinaabo ababyaabo balaakumana kuloba.”

Jelemiya 7:33

Lyalo mituntu ya bantu aba ilaakuba cakulya ca bayuni abanyama bamuluundu kwakubula amuntu nabi womwi ubakonga.

Jelemiya 8:2

Alaakubikwabo patuba akanoobalilwabo lumwi, mweenshi anyenyeenshi shoonse sha mwiculu isho nshebakalinga kusuni, kusebensela, kwiipushako akulambila. Teshi bakaabunjikeewo nabi kwaafukila. Sombi alaakubabo anga ngamatombe apantantaala peculu lya nshi.

Abakuku 1:11

Ncakwiila baleenda akuya cakufwambaana anga ngumuuwo. Bashilumamba aba balabona nkusu shabo anga ngolesa wabo.”

Sefaniya 1:17

Mwaami Lesa waamba ayi, “Ndaakuleta mapensho kubantu balaakweenda anga mboofu mukwiinga bakabisha kuli ndime neMwaami Lesa. Bulowa bwabo bulaakutilwa anga ngamaanshi alimwi mituntu yabo ilaakubola mubulongo.”

Dutolonomi 8:17

Ono aboobo tamweelete kuyeeya ayi mwaba abuboni buunji kwiinda munkusu shanu nobeene.