Jelemiya 23:5 - Baibo Busansulushi Bwa Libuku Ili

⁵ Mwaami Lesa waamba ayi, “Ciindi cilaakushika ndyeshi nkasale wamulunyungu lwakwe Defedi ululeme kuba mwaami. Mwaami uyo ulaakulela cabusongo akucita shintu shiluleme akoombolosha cakutanyengelela mucishi.

Jelemiya 23:5 Marejeleo ya Msalaba

2 Samwelo 23:3

Lesa wa bene Isilaeli waamba, Mwaandami wa bene Isilaeli wandwiita ayi, ‘Mwaami weendelesha bantu mubululami, uyo weendelesha cakuloonda Lesa,

Kulumbaisha 45:4

Kamuya mubulemu bwanu mukakome balwani banu. Muye mukeemikanine lushinisho abululami. Lyaansa lyanu lya nkusu lilaakumulengesha kukoma.

Kulumbaisha 80:15

Kamwisa mupulushe bantu aba mbomwakaleta mucishi cino. Ndimwe mwakabalengesha ayi bashimpe akumena miyanda.

Kulumbaisha 99:4

Mwaami Shinkusu shoonse, ulisuni shiluleme. Lakwe walengesha ayi koombolosha kululeme kube muIsilaeli, ee, muIsilaeli mwaleta bululami akoombolosha cakutanyengelela.

Isaya 33:5

Mwaami Lesa ulalemekwa abuumbi, mukwiinga ngoolela mishobo yoonse. Ncakwiila ulaakususha bululami akoombolosha cakutanyengelela mundabala ya Jelusalemu.

Isaya 4:2

Ciindi cilaakushikila Musampi wa Mwaami Lesa ndyeshi ukabote akuba abulemu. Lyalo nsheshi shikanooswa mubulongo bwa cishi ico, shilaakusangalasha akuletela bulemu bene Isilaeli abo beshi bakacaale mboomi.

Isaya 42:6

“Nebo neMwaami Lesa ndakwiita kwaamba ayi ulete koombolosha cakutanyengelela. Ndakucatilila palyaansa akukulama kabotu. Ndakusala kwaamba ayi ube cipangano kubantu, akwaamba ayi ube mumuni kubaswamashi.

Isaya 45:24

“Mukwaamba liina lyangu balaakunokwaamba ayi, ‘MuMwaami Lesa mweenkabo, momuli bululami alimwi ankusu.’ ” Boonse abo bandwana balaakwisa kuli ndime akulenshekwa nsoni.

Isaya 52:13

Mwaami Lesa waamba ayi, “Amubone, musebenshi wangu ulaakuswitilila mumulimo wakwe. Ulaakusumpulwa, kubikwa peculu alimwi akulumbaishikwa.

Isaya 53:10

Mwaami Lesa waamba ayi, “Sombi wakalinga ngumuyeeyo wangu neMwaami Lesa wakwaamba ayi alyatilililwe akumulengesha ayi apenge munshila iyo. Nebo neMwaami Lesa ndakacita boobo kwaamba ayi buumi bwakwe bube mulambu wakumana milandu. Nakubi boobo bamulunyungu lwakwe ulaakubabona alimwi ulaakwikala buumi bulaamfu. Kwiinda muli nguwe lusuno lwangu neMwaami Lesa lulaakuswitilila.

Isaya 53:2

Musebenshi wakwe ulya wakakula anga ninsoonseela kumeenso akwe Lesa nabi anga ngumuyanda watuntula mubulongo buyumu. Taakalinga kucitewo bulemu alimwi taakalingawo mubotu cakukonsha kutukwelela kuli nguwe Mbonekelo shakwe teshakalinga kukonsha kutapa myoyo yesu kuya pali nguwe.

Isaya 9:5

Nkwabilo sha bashilumamba isho nshebakalinga kusebensesha munkondo pantu pomwi ashakufwala shabo shoonse shinankeene bulowa shilaakutentwa mumulilo.

Isaya 9:6

Ceebo mwaana washalwa pakati kesu, ee, twapekwa mwaana musankwa. Bweendeleshi boonse bulaakuba mumaansaakwe. Liina lyakwe unanokwiitwa ayi, “Shikupanda maano Mubotu,” “Lesa Shinkusu shoonse,” “Mushali musankwa wamuyayaya,” alimwi ayi, “Mwaami wa Luumuno.”

Isaya 9:7

Nkusu shakwe sha bwaami aluumuno shilaakutolelela kukula. Ulaakwikala pacuuna cakwe Defedi ca bwaami akweendelesha bulelo bwakwe. Ulaakunoolela cabululami akoombolosha cakutanyengelela kuswa bobulya kushikila kwalyoonse alyoonse. Mwaami Lesa Shinkusu shoonse washinisha kwaamba ayi shintu ishi shoonse ulaakushicita.

Jelemiya 22:15

“Sa shisamu sha sida shiinji nsheenga shakulengesha kuba mwaami? Bona, iso wakalinga kutileelabo shakulya ashakunwa? Lakwe wakalinga kucita shintu shiluleme alimwi shakutanyengelela. Aboobo shintu shoonse shakalinga kumweendela kabotu.

Jelemiya 22:3

Ono bulya ndakwaambila ayi unoocita shintu shakutanyengelela akucita shiluleme. Kofuna muntu uyo utookwiipilwa kuswa mumaansa a wooyo utoomupensha. Mutaciti shibiibi akuba alunkutwe kumuswamashi, mwanaanshiwa amukalubinje. Utatiili bulowa bwa bantu batacite mulandu mucishi cino.

Jelemiya 22:30

Mwaami Lesa waamba ayi, “Lemba muntu uyu anga ngumuntu utacitewo mwaana, ee, anga ngumuntu uyo eshi akabule kuswitilila mubuumi bwakwe ceebo taaku wamulunyungu lwakwe weshi akaswitilile. Taaku nabi womwi pakati kabo weshi akekale pacuuna ca bwaami bwakwe Defedi nabi kulela tubili mucishi ca Juda.”

Jelemiya 23:6

Munshiku sha bweendeleshi bwakwe, bene Juda balaakupuluka abene Isilaeli balaakunookala kwakubula cakulisukama. Lyalo ulaakunokwiitwa liina lyakwaamba ayi, ‘Mwaami Lesa nkoKululama kwesu.’ ”

Jelemiya 29:11

Mukwiinga nemwiine ndishi kale miyeeyo njeencite pali ndimwe. Ndicite miyeeyo yakulengesha kuswitilila kuteshi yakumucisa, sobwe. Ncakwiila njimiyeeyo yakumupa kulangila abuumi kuya kunembo.

Jelemiya 30:3

‘Nshiku shilaakushikila ndyeshi nkakushe bantu bangu bene Isilaeli abene Juda mubusha akubaboosha mucishi ncendakapa bamashali babo bakulukulu. Nebo neMwaami Lesa ndaamba.’ ”

Jelemiya 30:9

Sombi balaakunoosebensela ndime neMwaami Lesa, Lesa wabo awamulunyungu lwakwe Defedi uyo ngweshi nkasale kuba mwaami wabo.

Jelemiya 31:27

Mwaami Lesa waamba ayi, “Ciindi cilaakushika ndyeshi nkasushe bantu abanyama mucishi ca Isilaeli coonse amucishi ca Juda.

Esekelo 21:27

Matongo! Matongo! Ee, ndaakulengesha ndabala inene kuba matongo. Ici teshi cikacitike kushikila uyo ngondakasala akese mukupa ndabala iyi mulandu. Lyalo ndaakwiipa kuli nguwe.’

Esekelo 34:16

“ ‘Ndaakuyandoola shisowekete akuboosha shakaswa mulitanga. Ndakwaanga shilonda sha sheesho shakalicisa, kuyumya shilefukite, sombi shiinite ashicite nkusu ndaakushinyonyoola. Ndakweembela mbelele shangu cabululami.

Esekelo 34:29

Ndaakubapa cishi cicite bulongo bubotu. Teshi bakakolwewo tubili nsala mucishi nabi kushibulukwaawo kumishobo imwi.

Esekelo 45:8

Cishi ico nceshi cikabe cipansha ca muleli mucishi ca Isilaeli kwaamba ayi atakanoolyatilila bantu, sombi ulaakulekela bene Isilaeli shipansha shimwi sha cishi ayi nshabo kweelana amikowa yabo.”

Danyelo 9:24

“Myaaka ili 70 kufushikwa mankanda ali 7, nceciindi Lesa ncaapimina bene mishaanu andabala yanu isalalite kwaamba ayi bakaanguluke kuswa kushibiibi akububi. Shibiibi shilaakulekelelwa abululami butamaani bulaakulengeshekwa kwikalilila kwaamba ayi cili anga nciloto amakani a bulaluki shikacitike cancinencine ayalo Ŋanda yakwe Lesa ilaakusalashikwa alimwi.

Osiya 1:11

Bene Juda abene Isilaeli balaakucatanishikwa pantu pomwi alimwi. Balaakulisalila mutanjilili womwi, lyalo balaakubwesa cishi cabo alimwi akutalika kuswitilila. Ncakwiila bushiku bwa Jesiliilu bulaakuba bunene abuumbi.

Osiya 3:5

Pesule bene Isilaeli balaakusandukila kuli ndime neMwaami Lesa, Lesa wabo akuwamulunyungu lwakwe Defedi ayi abe mwaami wabo. Lyalo balaakutalika kulemeka Mwaami Lesa akutambula shipo shakwe shibotu.

Amosi 9:11

Mwaami Lesa waamba ayi, “Bushiku bulaakushika ndyeshi nkabooshe bulemu kubulelo bwakwe Defedi. Bulelo ubo bwababo anga niŋanda yawa akunyonyooka. Ndaakuyakulula lubumbu akuboosha bulemu bwa njiyo. Ndaakwiiyakulula akwiibamba bweenka mboyakalinga pakataanshi.

Mika 5:3

Mwaami Lesa ulaakusuula bene Isilaeli, kushikila muleli uyo akashalwe alimwi kushikila bamakwabo abo bali mubusha bakaboole pakati ka bene Isilaelinyinaabo.

Sekaliya 3:8

“ ‘Ono kutika omupailishi munene Joshuwa pantu pomwi abapailishinyoko abo bashiite kunembo lyako. Bapailishi abo batokwiimikanina shintu shitoosa kunembo. Ndaakuleta musebenshi wangu wiitwa ayi Musampi.

Sekaliya 9:9

Amusangalale, amusangalale mwebo nobene Siyoni! Amoolobeshe cakusangalala mwebo nobene Jelusalemu! Amubone mwaami wanu utoosa kuli ndimwe cakulibombya, ee, ulitantite pambongolo, ncakwiila pamwanaambongolo.

Mateyo 2:2

“Uli kuli mwaana washalwa uyo mwaami wa baJuda? Twabona nyenyeenshi yakwe kwicwe, aboobo twesa mukumulambila.”

Joni 1:45

Lyalo Filipo wakacana Natanaelo, mpeeke wakamwaambila ayi, “Twamucana muntu uyo Mose ngwaakalemba mumabuku a Milawo alimwi abalo balaluki bakulukulu ngobakalemba mumabuku abo, nguJesu wa kuNasaleti, mwanaakwe Josefu.”

Joni 1:49

Natanaelo wakakumbula ayi, “NoBafundishi, ncakwiila muli Banababo baLesa! Muli Baami ba bene Isilaeli!”

1 Bene Kolinto 1:30

Lesa ngowakalengesha ayi tube muli Klistu Jesu ayi lakwe abe busongo bwesu. Wakatululamika pameenso akwe Lesa, watusalasha akutwaangulula.

Bene Ebulu 8:8

Sombi Lesa wakacana kampenda mubantu bakwe akwaamba ayi, “Nebo neMwaami Lesa ntokwaamba ayi, ‘Inshiku shilaakwisa, ndyeshi nkapangane cipangano cipya abene Isilaeli alimwi abene Juda.

Ciyubululo 19:11

Lyalo ndakabona liculu lyacaluka, kucana paliimfwi liaki lituba. Wakalinga kutantiteewo uleetwa ayi Ushomeka, Walushinisho. Lakwe uloombolosha akulwana mubululami.