Jelemiya 21:12 - Baibo Busansulushi Bwa Libuku Ili

¹² “Amunyumfwe maswi angu neMwaami Lesa akwaamba ayi, ‘Amoomboloshe bweelete nshiku shoonse. Amufune bantu batokwiipilwa mumaansa a baabo batoobapensha. Na mubule kucita boobo, bukali bwangu bulaakunyaka anga ngumulilo ceebo ca shibiibi nshemwakacita. Bulaakunyaka anga ngumulilo uyo muntu ngwaatakoonshi kushimya.’ ”

Jelemiya 21:12 Marejeleo ya Msalaba

2 Samwelo 8:15

Mboboobo Defedi mbwaakaba mwaami wa cishi ca Isilaeli coonse, alimwi wakeendelesha bantu boonse cabululami.

Jobo 29:17

Ndakalinga kunyonyoola nkusu sha bamucita shibi akubalengesha kuleka baabo mbobakalinga kupensha.

Kulumbaisha 101:8

Bushiku abushiku ndaakunyonyoola bantu babiibi mucishi. Ee, ndaakulobya boonse bamucita shibi mundabala inene ya Mwaami Lesa.

Kulonga 18:13

Pabushiku bwakaboolaawo, Mose wakalinga koombolosha bantu abo bakalinga kucite milandu. Aboobo wakasebensa kuswa macuunsa kushikila amacolesha.

Isaya 1:17

Amutalike kucita shibotu. Amusune kucita shiluleme. Ee, amuyumye balyatililwa. Kamufuninina batacite bamashali akwiimikanina bamukalubinje.”

Isaya 1:31

Ono bweenka kalilo kaniini mbokatenta bwiisu buyumu, mbweeke ubo beshinkusu mbweshi bakanyonyoolwe kububi bwabo. Ndushinisho taaku weshi akakonshe kumanisha kunyonyooka kwabo.

Isaya 7:13

Mpomunyaawo Isaya wakaamba ayi, “Kutika ono webo owamulunyungu lwakwe Defedi! Sa kupensha bantu uku nkomucita teshi kuunji? Ono sa utooyanda kupensha aLesa wangu?

Isaya 7:2

Aasi, mwaami wa bene Juda, ndyaakalwiitikwa ayi bene Silya bapaankana abene Efuleemu, lakwe abantu bakwe bakatutuma abuumbi bweenka shisamu mboshitenkaanishikwa kumuuwo.

Jelemiya 17:4

Kubisha kulaakumulengesha kunyaikwa cishi ico ncendakamupa. Ndaakumulengesha kuba basha kubalwani banu mucishi ico ncemuteshi ceebo cakwaamba ayi mwanyansha mulilo wa bukali bwangu alimwi ulaakunoonyakabo kwalyoonse alyoonse.”

Jelemiya 21:5

Lyalo ndaakumulwana nebo nemwiine alyaansa litandabikitwe licite nkusu shiinji mubukali bwangu buyoosha amubukali bwangu bwa mishobo umwi bwiindaawo.

Jelemiya 23:19

Amubone, bukali bwangu bulibo anga ncipuupu ciyoosha, ee, bulibo anga nkapupuulwa ako katooshingulukabo pamitwi ya bamucita shibi.

Jelemiya 23:2

Paceebo ceeco Mwaami Lesa, Lesa wa bene Isilaeli utookwaambila beembeshi abo beembela bantu bakwe ayi, “Ceebo mwakapalanganya litanga lyangu akulitanda, tamukwe kulilama, ndaakumupa mulandu ceebo ca bubi ubo mbomwakacita.

Jelemiya 23:5

Mwaami Lesa waamba ayi, “Ciindi cilaakushika ndyeshi nkasale wamulunyungu lwakwe Defedi ululeme kuba mwaami. Mwaami uyo ulaakulela cabusongo akucita shintu shiluleme akoombolosha cakutanyengelela mucishi.

Jelemiya 36:7

Mpashi inga bapaila kuMwaami Lesa akusanduka kuswa kunshila shabo shibiibi mukwiinga Mwaami Lesa wakaloondesha bantu aba kubukali bwakwe buyoosha abuumbi.”

Jelemiya 4:4

Amushomeke kucipangano ncendakapanga amwebo nebo neMwaami Lesa. Nobene Juda abene Jelusalemu, amwaabe myoyo yanu kuli ndime. Na mubule kucita boobo, bukali bwangu bulaakunyaka anga ngumulilo ceebo ca shibiibi nshemwakacita. Ndushinisho bulaakunyaka cakubula aubushimya.

Jelemiya 44:22

Ono Mwaami Lesa ndyaakacileka kunoolangilishabo pamicito yanu ibiibi alimwi ashintu shilensha bunya nshemwakalinga kucita, cishi canu cakaba cintu ceelete kushinganwa, kuba matongo alimwi kwakubula amuntu wikalaamo bweenka mbocibete sunu.

Jelemiya 5:14

Paceebo ceeco Mwaami Lesa, Lesa Shinkusu shoonse utokwaamba ayi, “Jelemiya, ono ceebo bantu aba bakaamba maswi aya, ndaakulengesha maswi angu ali mumulomo wako kuba mulilo akulengesha bantu aba kuba nkuni sheshi shikapye kumulilo uyo.

Jelemiya 5:28

Baliinite alimwi balalya kabotu. Kubisha kwabo takumaniiwo. Taboomboloshi milandu ya banabanshiwa mbuli mboyeelete. Bakandu tababafuniiko mumakani abo.

Jelemiya 7:20

Paceebo ceeco nebo neMwaami Lesa Shinkusu shoonse ndaakutila bukali bwangu buyoosha paŊanda yangu ino. Ndaakubutilila pabantu, pabanyama pashisamu alimwi apashishango. Bukali bwangu bulaakuba anga ngumulilo uyo muntu ngwaatakoonshi kushimya.

Jelemiya 7:5

Amuleke nshila shanu amicito yanu ibiibi. Kamucitilana shintu cakutanyengelela.

Malilo 4:11

Mwaami Lesa wakusha bukali bwakwe boonse, ee, wapoomona bukali bwakwe buyoosha. Wakanyansha mulilo mundabala ya Siyoni uyo wakeetenta cakushika akulwiimbi lwa njiyo.

Esekelo 22:31

Paceebo ceeco ndaakubatila bukali bwangu buyoosha akubanyonyoola kuceeselela ca bukali bwangu ceebo ca sheesho nshebakacita beene beenka. Nebo neMwaami Lesa Shinkusu shoonse ndaamba.’ ”

Bene Lefi 26:28

ndaakumwaalukila akwiindilishaawo alimwi pamapensho anu mankanda osanwe aobilo.

Naamu 1:6

Ngani weenga weemikana kubukali bwakwe? Ngani ukonsha kwiimikana kubukali buyoosha? Bukali bwakwe bulanyaka anga ngumulilo. Mabwe oonse alapwayooka kunembo lyakwe.

Sefaniya 1:18

Silifa nabi golodi wabo teshi shikabafuneewo pabushiku ubo Mwaami Lesa ndyeshi akatondeshe bukali bwakwe. Mubukali bwakwe butenta anga ngumulilo cishi ca panshi cilaakunyonyoolwa coonse. Ulaakucinyonyoola cakufwambaana abantu boonse bekalaamo.

Sefaniya 3:5

Sombi Mwaami Lesa ululeme ucili mundabala iyo. Ulacita bululami, taaciti shilubo. Uloombolosha cakutanyengelela bushiku abushiku. Ciindi coonse taalilwi kucita boobo. Sombi bataluleme balabisha cakubula nsoni.

Luka 1:69

Watupa Mupulushi ucite nkusu kuswa mulunyungu lwakwe Defedi musebenshi wakwe.

Bene Loma 13:4

Ceebo mweendeleshi ngumusebenshi wakwe Lesa utoosebensela kucafwa ndiwe. Ono na ulacita shibiibi ncakwiila ulyeelete kumuloonda mukwiinga ulicite nkusu shakukupa mulandu. Anu mweendeleshi ngumusebenshi wakwe Lesa uyo upa mulandu bacita shibiibi mumusena wakwe Lesa.

Dutolonomi 32:22

Bukali bwangu bulaakunoonyaka anga ngumulilo kuya mukushika akumusena wa bafu. Ulaakunyonyoola cishi ca panshi ashisepo sha ncico, akukumika lwiimbi lwa tulundu.