Jelemiya 20:16 - Baibo Busansulushi Bwa Libuku Ili

¹⁶ Muntu uyo aabe bweenka mbuli mandabala ayo Mwaami Lesa ngaakanyonyoola cakutaanyumfwila nkumbu. Aanyumfwe mibila macuunsacuunsa akooloma kwa nkondo lisuba ndyeliba pakati ka mutwi.

Jelemiya 20:16 Marejeleo ya Msalaba

Jelemiya 18:22

Mibila ainyumfwike mumaandaabo mwaakubatumina beshikubalwana cakuteengashila, mukwiinga balo bankabila cilindi ayi ngwiteemo. akuteya toose ayi bancatishe kumyeendo.

Jelemiya 18:8

sombi pesule mushobo uyo ngondakacenjesha wasanduka kuswa kushibiibi sha nguwo, teshi nkacite shintu shibiibi nshendakaamba kucita kuli nguwo.

Jelemiya 23:14

Pakati ka balaluki bene Jelusalemu apalo ndakabonaawo kubisha kwiinditewo, Balacita bulale alimwi mbabeshi. Balayuminisha bamucita shibi, cakwaamba ayi taaku nabi womwi ucileka kucita bubi. Boonse mbabiibibo anga mbene Sodoma kuli ndime. Ndushinisho bene Jelusalemu balibo anga mbene Gomola.”

Jelemiya 26:13

Ono amusandule nshila shanu amicito yanu akunyumfwila Mwaami Lesa, Lesa wanu. Lyalo Mwaami Lesa ndyeshi abule kumuletela mapensho ayo ngwaakaamba ayi ulaakumuletela.

Jelemiya 4:19

Buumba bwancaya, ee, buumba bwancaya! Ntokwaalabanganabo ceebo moyo wangu wacisa. Ncakwiila moyo wangu utookulunkunta cakuyanda kuncinkula. Nshikoonshi kuumunabo napaceyi ceebo ndanyuumfwa kulila kwa lupeenga ee, ndanyuumfwa ciyobeyobe ca nkondo.

Malilo 4:6

Mulandu wakapekwa bantu bangu wakeenda wooyo wakapekwa Sodoma, ndabala iyo yakanyonyoolwa cakufwambaana, ncakwiila kwakubula awiifunaako.

Esekelo 21:22

Ono cisolo cilaakuwita kumufwi wa kululyo uyo weshi ukanokwiimikanina ndabala ya Jelusalemu. Mwaami wa bene Babiloni ulaakuya kundabala iyo akuya mukutula minkulwa yakupwaishako lubumbu, kuya mukucitilako ciyobeyobe ca nkondo, kuya mukuyaamika minkulwa yakupwaishaako kuminjililo ya njiyo, kuyakako shitunta shakutantaawo pakulwana alimwi akukabako shilindi sha nkondo.

Osiya 10:14

nkondo ilaakwisa pali ndimwe shiyubilo shanu shoonse shilaakunyonyoolwa. Cilaakubabo anga mbushiku mwaami Shalimani ndyaakanyonyoola ndabala inene ya Beti Abelo muciindi ca nkondo akupwayoola baana abamanyinawabo ayi bafwe.

Osiya 11:8

“Anu inga ndakukakilanshi Efuleemu? Anu inga ndakwaabilanshi Isilaeli? Sa inga ndakunyonyoola bweenka mbondakacita Adima? Anu inga ndacita buyani kuli ndiwe bweenka mbondakacita Seboimu? Moyo wangu tookoonshi kunsuminisha kucita boobo. Lusuno lwangu pali ndiwe ndunene abuumbi!

Osiya 13:14

“Ndaakubapulusha kuswa kunkusu sha musena wa bafu. Ndaakubalubula kuswa munkusu sha lufu. Myaalu yako olufu ili kuli? Kunyonyoola kwako omusena wa bafu kuli kuli? “Teshi nkabeewo ankuumbu pabantu aba.

Amosi 1:14

Ndaakutuma mulilo kumalinga a kuLaba, uyo weshi ukanyonyoole malinga. Kulaakuba ciyobeyobe ca nkondo pabushiku ubo. Nkondo ilaakukalalabo anga nimfula ya muuwo pabushiku ubo.

Amosi 2:2

Ndaakutuma mulilo pacishi ca Moabu, uyo weshi ukatente malinga a ndabala ya Kelyoti. Bene Moabu balaakufwita pakati ka ciyobeyobe ca nkondo, bashilumamba kabalisha mapeenga.

Amosi 4:11

“Ndakanyonyoola bamwi pakati kanu bweenka mbondakanyonyoola bene Sodoma abene Gomola. Mwakalingabo anga ndukuni lwayokolwa mumulilo. Sombi mwebo tamukwe kusandukilawo kuli ndime. Nebo neMwaami Lesa ndaamba.

Jona 3:4

Mpomunyaawo wakanyamuka akweenda mundabala inene iyo, kuswa macuunsa kushikila amacolesha pabushiku butaanshi. Lyalo wakatalika kushimikila ayi, “Na peende nshiku shili makumi one, ndabala inene ya Ninife ilaakunyonyweetwabo limwi.”

Jona 4:2

Mpeeke wakapaila ayi, “Sa te nceceeci ncendakaamba kaantana kuswa kumisheesu ayi cilaakucitika? Anu ncendakafwambaanina kulobokela kuTashishi. Ndakalinga kwishi ayi uli Lesa walusuno alimwi shinkumbu, utafwambaani kukalala, Lesa shiluse luteeli alimwi upilula miyeeyo akucileka kunyonyoola.

Sefaniya 1:16

bushiku bwa mapeenga a nkondo akulila kwa bashilumamba abo beshi bakalwane mandabala acite malinga alimwi amaanda alaamfu.

Sefaniya 2:9

Bweenka mbocibete lushinisho ayi Nebo neMwaami Lesa Shinkusu shoonse, Lesa wa bene Isilaeli ndi muumi, ntooshomesha cakulumbila ayi bene Moabu balaakuba anga mbene Sodoma abalo bene Amoni balaakuba anga mbene Gomola. Shishi shabo shilaakuba musena wa nsaku alimwi ashikanda sha mwiinyo, ee, shilaakuba shishi umo mutekaali bantu kwalyoonse alyoonse. Bantu bangu beshi bakacaaleewo, balaakusaala akubwesa shishi shabo.”

Luka 17:29

Sombi bushiku Loti ndyaakaswa muSodoma, mulilo asalufa shakaloka kuswa kwiculu akubanyonyoola boonse.

Dutolonomi 29:22

“Ono mumashalane ali kunembo, bamulunyungu lwanu alimwi abaswamashi baswa mushishi shili mulaale, balaakubona mapensho alimwi amalwashi ayo Mwaami Lesa ngweshi akalete mucishi canu.

Dutolonomi 29:23

Cishi canu coonse cilaakubabo luyanga, cilaakunoolibo ncikula. Taaku ceshi cikanoomenaawo nabi bwiisu boonse. Cilaakuba anga ngamandabala anene aSodoma aGomola, Adima alimwi aSeboyimu, ayo ngaakanyonyoola Mwaami Lesa ndyaakakalala abuumbi.

2 Pita 2:6

Abalo bantu ba mumandabala anene a Sodoma aGomola Lesa wakaboombolosha akubapa mulandu. Wakabanyonyoola amulilo. Ici cakaba citondesho ca sheesho sheshi shikacitike kubantu beshi bakabule kumunyumfwila kunembo.

Judi 1:7

Amwiibaluke andabala ya Sodoma aGomola amandabala akalinga pafwaafwi. Bantu ba mumandabala aya abalo bakatalika kucita bufuule alimwi akucitana shintu shilensha nsoni. Lesa wakabapa mulandu wa mulilo utamaani kwaamba ayi cibe citondesho kubantu boonse.