Jelemiya 19:7 - Baibo Busansulushi Bwa Libuku Ili

⁷ Mumusena uno ndaakunyonyoola miyeeyo ya bene Juda aya bene Jelusalemu. Ndaakulengesha balwani babo kubakoma akubacaya munkondo. Mituntu yabo ilaakuba shakulya sha bayuni abanyama bamuluundu.

Jelemiya 19:7 Marejeleo ya Msalaba

2 Baami 21:14

Ndaakufutatila abo beshi bakacaaleewo akubaaba mumaansa a balwani babo. Balwani abo balaakubakoma akusaala cishi cabo.

Tushimpi 21:30

Taaku busongo bwa muntu, lushibo nabi miyeeyo yakwe isho sheenga shaswitilila mukulwana Mwaami Lesa.

Isaya 29:14

Paceebo ceeco bantu aba ndaakubakankamika alimwi. Balaakubona shaankamiko peculu lya shaankamiko. Ndaakumana busongo bwa basongo, alimwi ndaakulobya maano a bantu bacenjete.”

Isaya 8:10

Amupangane muyeeyo bwakucita, sombi teshi mukaswitilileewo. Cili coonse nceshi mubambe teshi cikasebenseewo mukwiinga Mwaami Lesa uli aswebo.

Jelemiya 15:2

Ono na bakwiipushe ayi, ‘Ino tuye kuli?’ ubalwiite ayi, ‘Mwaami Lesa waamba ayi, abo beelete kufwa lufu ŋanda, balaakufwa. Abo beelete kufwa kunkondo, balaakufwa munkondo. Abo beelete kufwa kunsala, balaakufwa kunsala. Abo beelete kutolwa mubusha, balaakuya mubusha.’

Jelemiya 15:9

Lyalo mushali mwanakashi wa baana bosanwe abobilo ulaakulefuka akufwa. Lakwe lisuba lilaakumupilila kaliciliiko. Ndushinisho ulaakunyumfwa nsoni akusebaana. Kuswawaawo, abo boonse beshi bakacaaleewo ndaakubacaisha kubalwani babo. Nebo neMwaami Lesa ndaamba.”

Jelemiya 16:4

Balaakufwa kumalwashi ayoosha. Teshi bakalilweewo nabi kubikwa. Sombi mibili yabo ilaakubabo anga ngamatombe apantantaala peculu lya nshi. Balaakuloba kunkondo akunsala. Lyalo mituntu yabo ilaakuba cakulya ca bayuni abanyama bamuluundu.

Jelemiya 18:21

Aboobo noBaami baLesa, amusuminishe bana babo kufwa kunsala. Amubaabe munkondo ayi bafwite mumo. Amulengeshe bamakaabo kubula baana alimwi akuba bamukalubinje. Amulengeshe bameebaabo kucaikwa kumalwashi akulengesha bacikula bwangu basankwa kucaikwa munkondo.

Jelemiya 21:7

Kuswawaawo ndaakwaaba ndiwe Sedekiya omwaami wa bene Juda, bacinenenene bako abantu bamundabala ino abo beshi bakapuluke kumwaalu, nkondo alimwi ansala kuli Nebukadinesa mwaami wa kuBabiloni akubalwani banu basuni kumucaya. Nebukadinesa ulaakubacaya munkondo, teshi akabafwitewo luse nabi nkumbu.’ Nebo neMwaami Lesa ndaamba.”

Jelemiya 22:19

Ulaakufukilwabo anga nimbongolo, nkokwaamba ayi ulaakukwelwa akusowelwa pansengwe lya minjililo ya Jelusalemu.”

Jelemiya 22:25

Ndaakukwaaba mumaansa abaabo mbooloonda abo basuni kukucaya. Nkokwaamba ayi ndaakukwaaba kuli Nebukadinesa mwaami wa kuBabiloni alimwi abashilumamba bakwe.

Jelemiya 32:28

Aboobo ndaakwaaba ndabala inene iyi kuli Nebukadinesa mwaami wa bene Babiloni abashilumamba bakwe abo beshi bakeekoome

Jelemiya 34:20

Ono bantu abo boonse ndaakubaaba kubalwani baabo abo bafwima buumi bwabo. Mituntu yabo ilaakuba shakulya sha bayuni alimwi abanyama ba muluundu.

Jelemiya 46:26

Ndaakubaaba mumaansa a baabo babafwima, ee, kuli Nebukadinesa mwaami wa bene Babiloni abamatanjilili ba bashilumamba bakwe. Pesule lya sheeshi, bantu balaakuboola alimwi muIjipiti akunookala bweenka mbuli kale kale. Nebo neMwaami Lesa ndaamba.”

Jelemiya 7:33

Lyalo mituntu ya bantu aba ilaakuba cakulya ca bayuni abanyama bamuluundu kwakubula amuntu nabi womwi ubakonga.

Jelemiya 8:2

Alaakubikwabo patuba akanoobalilwabo lumwi, mweenshi anyenyeenshi shoonse sha mwiculu isho nshebakalinga kusuni, kusebensela, kwiipushako akulambila. Teshi bakaabunjikeewo nabi kwaafukila. Sombi alaakubabo anga ngamatombe apantantaala peculu lya nshi.

Jelemiya 8:8

Ino inga mwaamba buyani ayi, ‘Tuli basongo mukwiinga tulicite milawo ya Mwaami Lesa?’ Nakubi boobo balembi babeshi balemba milawo iyo cakutashomeka.

Jelemiya 8:9

Basongo banu balaakulenshekwa nsoni. Balaakulenshekwa buumba akucatwa. Abo bakakaka maswi a Mwaami Lesa, ino mbusongonshi mbobacite?

Malilo 3:37

Anu ngani weenga waamba makani akucitika acitika? Ee, ngani ukonsha kucita cintu ico Mwaami Lesa ncaatakwe kusuminisha?

Bene Lefi 26:17

Ndaakumufutatila ayi mukakomwe alimwi abo bamupatite balaakumweendelesha. Mulaakuloonda cakwaamba ayi mulaakucica nabi taaku utoomutandaanya.

Bene Lefi 26:25

Mpeeke ndaakuleta nkondo pali ndimwe akumupensha ceebo ca kupwaya cipangano cesu. Na mukabungane mumandabalaanu anene mukuyuba, lyalo ndaakumutumina malwashi atashilikwi. Aboobo mulaakukakatishikwa kulyaaba mumaansa a balwani banu.

Bene Loma 3:31

Ono sa ici cilaamba ayi Milawo teecite ncito nditutokwaamba ayi nkwiinda mulushomo? Napaceyuubo! Tutooyumyabo Milawo.

Bene Loma 4:14

Nkokwaamba ayi na Lesa nshaashomesha shilatambulwa kwiinda mukukonkela Milawo, ingayi kushoma muli Lesa taaku mbokubete asheesho nshaashomesha taaku mboshibete.

1 Samwelo 17:46

Sunu Mwaami Lesa utookwaaba mumaansaangu ayi kuncaaye akukusutula mutwi. Mibili ya bene Filisiti sunu ntooipa bayuni abanyama bamuluundu. Lyalo bantu ba mucishi ca panshi coonse batooshiba ayi muli Lesa muIsilaeli.