Jelemiya 17:11 - Baibo Busansulushi Bwa Libuku Ili

¹¹ Muntu uyo ubilila munshila italuleme ulibo anga ngukwale ufukamina mayi ngaatana kushala. Buboni bulaakumumanina pakati ka nshiku sha buumi bwakwe. Lyalo kumamanino ulaakubonekabo bukaluyaluya.

Jelemiya 17:11 Marejeleo ya Msalaba

Jobo 20:21

Wakalinga kulya buboni bwakwe cakumaninisha. Aboobo buboni bwakwe boonse bwamana cakufwambaana.

Kulumbaisha 49:13

Ono iyi njenshila ya bantu bacinka manungo muli mbabo beene. Ee, aya ngomeelelesho a baabo bacinkite manungo mububoni bwabo.

Kulumbaisha 55:23

Sombi bantu abo basunishi kutila bulowa akubeca, mwebo nobaLesa mulaakubawaala mumusena wa bafu. Teshi bakamaane amusa wa nshiku shabo. Nakubi boobo nebo ndanoocinkite manungo muli ndimwe.

Tushimpi 13:11

Maali acanwa mukutashomeka alamana bwangu, bubile bwakututukila buleenda, sombi ucana maali paniini paniini, alafula.

Tushimpi 15:27

Uyo ubilila mukutashomeka ulaletela bamuŋanda yakwe mapensho, sombi uyo ukaka makulo, ulaakuba abuumi.

Tushimpi 21:6

Buboni bwakucanina munshila yakutashomeka bulafwambaana kushimingana, sombi tabuciti boobo kabutana kukutola mukoose ka lufu.

Tushimpi 23:5

Bubile nabi wabucana mbwa ciindi ciniibo. Ndushinisho bulaakuba amapapaminwa akuuluka anga ngumumbankwashi.

Tushimpi 28:16

Muleli utacite maano ulalela bantu calunkutwe, sombi uyo upatite bubile bwakucanina munshila shibiibi ulaakukala buumi bulaamfu.

Tushimpi 28:20

Muntu ushomeka ulaakupekwa coolwe cinene abuumbi, sombi uyo usuni kubila cakufwambaana, ulaakupekwa mulandu.

Tushimpi 28:22

Muntu mwiinyu ulisunibo kubila cakufwambaana, sombi teeshi kwaamba ayi bukandu bulibo muliimfwa.

Tushimpi 28:8

Uyo ubilila mukukomenya mweelo wa cinyona mucila pankongole nshaapa, ulabikilabo babye abo bafwita nkumbu bakandu.

Jelemiya 22:13

Mapensho kuli wooyo uyaka ŋanda yakwe ya bwaami kwiinda mukutalulama. Mapensho kuli wooyo uyaka shipinda sha peculu kwiinda mukoombolosha cakunyengelela ee, kuli wooyo usebenseshabo bantunyina kwakubula kubafolesha.

Jelemiya 22:17

Sombi mwebo meenso anu amyoyo yanu ilibo kumpindu yakucana kwiinda mubwiipi, kutila bulowa bwa bantu batacite mulandu, alimwi amukulyatilila akupensha bantu.”

Jelemiya 6:13

Kuswabo kubantu bataaku ambobabete kushika akubaabo balemekwa, boonse balicitebo miyeeyo yabumbilileewo. Balaluki abapailishi abalo ngumushobo womwibo, boonse balacenjeeka bantu.

Jelemiya 8:10

Paceebo ceeco, bamakaabo ndaakubapa kubasankwa bamwi, ayalo myuunda yabo kubantu bamwi. Kutalikilabo kumuntubo kushika kubalemekwa, boonse beenka basuni kubilila mubwiipi. Balaluki abapailishi boonse abalo mbeshikubeca.

Amosi 3:10

Mwaami Lesa waamba ayi, “Bantu abo balasusha malinga ashintu shakusaala. Tabacishi kucita shintu shiluleme, napaceyi.”

Mika 2:9

Mulatandaanya banakashi ba bantu bangu, ee, kubatandaanya kuswa mumaandaabo abotu. Mulaakukusha coolwe cangu pabana babo ayi bacibuule kwalyoonse alyoonse.

Mika 7:3

Boonse mbantu bacibwene kucita bubi. Alakwe muleli ulisuni kupekwa shipo, shikoombolosha ulisuni makulo, alakwe shinkusu ulaambabo nshaasuni cakutasenga. Bantu abo boonse balacatana pantu pomwi mukupinga kucita bubi.

Sefaniya 1:9

Pabushiku bweenka ubo ndaakunyonyoola boonse abo balambila anga mbakunsengwe ee, abo beepa akucaya kwaamba ayi basushe shintu muŋanda ya mwaami wabo ngobalambila.”

Sekaliya 5:4

Mwaami Lesa Shinkusu shoonse waamba ayi, ‘Ndaakutuma lishingo ilyo lyeshi likenjile muŋanda ya mwiipi woonse amuŋanda ya wooyo ushomesha cakulumbila cabubeshi muliina lyangu. Lilaakunooshiite mumaandaabo kushikila likaanyonyoole cakumaninina.’ ”

Malaki 3:5

Mwaami Lesa Shinkusu shoonse utokwaamba ayi, “Ndaakwisa pakati kanu cakutasowa ciindi mukoombolosha. Ndaakushinina beshimampelampela, beshibulale, beshikupa bukamboni bwakubeca, banyengelela beshincito pamaali ngobafola, abaabo banyengelela bamukalubinje banakashi, bana banshiwa alimwi abaswamashi. Nkokwaamba ayi ndaakushinina boonse batandemeki.

Mateyo 23:13

“Mapensho kuli ndimwe nobafundishi ba Milawo abaFalisi, mwebo nomwaamba nshemutaciti! Mulacalila bantu mulyango wa muBweene bwa kwiculu. Mwebo nobeene tamusuni kwinjila alimwi mulakasha baabo basuni. [

Luka 12:20

Sombi Lesa wakamwaambila ayi, ‘Webo omuluya! Sunu lyeenka mashiku utoofwa. Ino shintu shoonse ishi nshiwakalinga kubamba kushika cecino ciindi shitooba shakwe ni?’ ”

1 Timoti 6:9

Sombi abo basunishi kubila balawita mumasunko akucatwa mutoose twa shiyanda mubili shiinji shabuluya alimwi shinyonyoola. Shintu isho shilabanjisha mukunyonyooka kwa buumi bwabo akuloba.

Taitasi 1:11

Aba balyeelete kukashikwa mukwiinga batoonyonyonganya bamumaanda boonse mbobapolela kwiinda mukwiisha shintu isho nshebateelete. Balacita boobo kwaamba ayi babilile mpawo.

2 Pita 2:14

Tabalangibo mwanakashi cakutamukumbwa, balisunibo kucita bufuule lyoonse. Balalengesha bateshi bayumu mulushomo kubisha. Bakeshibila kuyandishisha buboni. Lesa ulaakubapa mulandu!

2 Pita 2:3

Ceebo cakusuna bubile, balaakusebensesha makani akubeca. Mulandu wabo utoobalindilila kuswabo kale kale alimwi kunyonyoolwa kwabo kulibambitwe kale.