Isaya 61:3 - Baibo Busansulushi Bwa Libuku Ili

³ Wakantuma kucafwa baabo balila muSiyoni, kubafwalika ngala yakukondwa kuteshi milota ya buumba. Kubapa mafuta atondesha kusangalala kuteshi mapensho aleta minsonshi. Kubalengesha kwiimba nyimbo shakulumbaisha kuteshi buumba. Balaakunokwiitwa ayi mibanga yabululami iyo Mwaami Lesa njaakashanga kwaamba ayi atondeshe bulemu bwakwe.

Isaya 61:3 Marejeleo ya Msalaba

Esita 8:15

Lyalo Modekayi wakaswa kuŋanda ya bwaami kaafwete shakufwala sha bwaami sha mushobo wa liculu akutuba, mungaanjo wa nsalu iteshimite ifubelafubela amushini wa golodi unene. Lyalo bamundabala inene ya Susa bakasekelela cakusangalala abuumbi mumikwakwa.

Esita 9:22

mukwiinga nshenshiku baJuda nshebakalifuna kubalwani babo. Uyo ngomweenshi wakuungumana abuumba uyo wakasandamunwa kuba mweenshi wakusekelela akusangalala. Wakabalembela ayi nshiiku isho shibe shakusekelela akusangalala, kupaana shipo sha shakulya alimwi akupa bakandu shakulya.

Kulumbaisha 104:15

waini wakusangalasha myoyo yabo, mafuta a olifi akubakondelesha alimwi ashinkwa wakubapa nkusu.

Kulumbaisha 149:4

Ceebo Mwaami Lesa ulakondwa mubantu bakwe, ulalemeka baliceesha mukubapa nkusu shakukoma.

Kulumbaisha 23:5

Mwebo mulamambila shakulya balwani bangu kabambwene. Mulantambula akumpa bulemu bwa muntu wakatambwa kukusekelela, alimwi akususha nkomeshi yangu cakusempooka.

Kulumbaisha 30:11

Mwakapilula kulila kwangu ayi kube kushana. Ncakwiila mwakankusha buumba akundetela kusangalala.

Kulumbaisha 30:12

Aboobo teshi nkoomune, sombi ndaakunoomwiimbila lyoonse. NoBaami baLesa, baLesa bangu, ndaakunoomulumba kwalyoonse alyoonse.

Kulumbaisha 45:7

Mwebo ncemusunibo mbululami, sombi bubi mulibupatite. Nceceeco Lesa, Lesa wanu ncaakamusalila, akumupa kusangalala kwiindaawo, pabamaami bamwi boonse.

Shikushimikila 9:8

Kofwala shakufwala shacipaale lyoonse alimwi kuteenda amisusu itabikitwe mafuta.

Isaya 12:1

Pabushiku ubo mulaakwiimba ayi, “Ndanoomulumbaisha noBaami baLesa. Nabi mwakalinga kukalalite pali ndime, bukali bwanu sunu bwamana. Ono sunu mwankalika moyo.

Isaya 26:2

Amucalule minjililo ya ndabala kwaamba ayi mushobo ululeme unjile, ee, unjile mushobo uyo ushomeka.

Isaya 44:23

Amwiimbe nyimbo shakusangalala noliculu ceebo Mwaami Lesa ngowacita boobo. Amwiimbe cakoolobesha nocishi ca panshi. Amwebo notulundu, nomisaansa ashisamu shoonse amwiimbe. Ceebo Mwaami Lesa ngowalubula bamulunyungu lwakwe Jakobo. Ncakwiila Mwaami Lesa ngowatondesha bulemu mbwaacite muIsilaeli.

Isaya 46:13

Bushiku bwakupulushikwa kwanu ndabuleta pafwaafwi. Ndushinisho tabubete kulaale, sobwe. Teshi nkacelweewo kukoma balwani bangu. Ndabala ya Jelusalemu ndaakwiipulusha onoono akuletela bene Isilaeli bulemu.”

Isaya 52:1

Amubuke, Amubuke! Amubuke nobamundabala inene ya Siyoni! Amube ankusu mbuli kataanshi. Amufwale shakufwala shanu sha bulemu, nobamundabala ya Jelusalemu, ndabala inene isalalite. Balya bakunsengwe batapalwitwe teshi bakenjilewo tubili mundabala yanu.

Isaya 61:10

Ndasangalala cankusu muMwaami Lesa. Moyo wangu ulisangalete abuumbi muli Lesa. Ceebo wamfwalika lupulusho anga ncakufwala ca peculu akumfwalika bululami anga ngumungaanjo. Wamfwalikabo bweenka shibwiinga nabi mupailishi mbwaalibotesha kumutwi, nabibo shibwiinga mbwaalibotesha ashakulibotesha sha makwebo.

Jelemiya 31:13

Bamyooye balaakushana akusangalala. Basankwa bacikula bwangu alimwi abamanene abalo balaakusangalala. Kulila kwabo ndaakukusandula kukabe kusangalala. Ndaakuboombulusha akubasangalasha mumusena wakubapa buumba.

Esekelo 34:29

Ndaakubapa cishi cicite bulongo bubotu. Teshi bakakolwewo tubili nsala mucishi nabi kushibulukwaawo kumishobo imwi.

Esekelo 47:7

Ono ndindakashika kooko, ndakabona shisamu shiinji kumbasu shobilo shoonse sha mulonga uyo.

Sekaliya 3:5

Mpomunyaawo munjelo wakaambila baabo bakalinga kwiimfwi akwe ayi, “Amumufwalike cisani cakumutwi citashipite.” Mpeeke bakamufwalika cisani ceenka ico. Bakamufwalika shakufwala shipya shimwi shoonse munjelo wa Mwaami Lesa kaaimfwi apo peenka.

Mateyo 15:13

Jesu wakakumbula ayi, “Mbewu ili yoonse njebatakwe kushanga baTa bali kwiculu ilaakutumunwa.

Mateyo 5:16

Mbweeke ubo amwebo amuboneshe mumuni wanu kubantu, kwaamba ayi babone milimo yanu ibotu, akupa bulemu kuli Ishiwanu wa kwiculu.

Luka 15:22

Sombi baishi bakaambila basebenshi babo ayi, ‘Amufwambaane! Amulete cakufwala cibotu afwale. Mumufwalike ninga kumunwe ansapato.

Joni 15:8

Na kamucata shisepo shiinji, ico inga caletela bulemu baTa, alimwi cilaakutondesha ayi muli bashikwiiya bangu bancinencine.

Joni 16:20

Ntoomulwiita calushinisho ayi mwebo mulaakulila akuungumana, sombi bamucishi balaakusangalala. Mulaakuungumana, sombi kuungumana kwanu kulaakuba kusangalala.

1 Bene Kolinto 3:9

Swebo soonse tuli basebenshi bakwe Lesa, mwebo muli muunda wakwe. Alimwi muli Ŋanda yakwe Lesa.

1 Bene Kolinto 6:20

Lesa wakamuula amweelo unene, aboobo amusebenseshe mibili yanu mukumupa bulemu.

Bene Filipi 1:11

Buumi bwanu bulaakutondesha micito ya bululami, iyo iswabo kuli Jesu Klistu, kwaamba ayi boonse balemeke akulumbaisha Lesa.

2 Bene Tesalonika 1:10

Shoonse ishi shilaakucitika pabushiku bunene bulya aakwisa mukutambulwa cabulemu akulumbaishikwa kubantu bakwe, nkokwaamba ayi abo boonse bashoma. Amwebo mulaakuba mulikoto lyabo ceebo mwakashoma makani ngotwakamulwiita.

Bene Ebulu 1:9

Ulisuni kucita shiluleme akupata shitaluleme. Nceceeco nebo, neLesa wako, ncendakakusalila akukunanika mafuta abonesha kusangalala kwiinda babyo bamwi boonse.”

1 Pita 2:9

Sombi mwebo muli bantu basalitwe, bapailishi ba bwaami, mushobo usalalite alimwi bantu bakwe Lesa. Wakamusala kwaamba ayi mukashimikile shamicito yankusu ya wooyo wakamwiita kuswa kumunshinshe akumwinjisha mumumuni wakwe ukankamika.

1 Pita 4:14

Na mwacobolwa ceebo ca liina lyakwe Klistu, mulicite coolwe, mukwiinga cilabonesha ayi Mushimu wakwe Lesa wa bulemu uli muli ndimwe.