Isaya 53:10 - Baibo Busansulushi Bwa Libuku Ili

¹⁰ Mwaami Lesa waamba ayi, “Sombi wakalinga ngumuyeeyo wangu neMwaami Lesa wakwaamba ayi alyatilililwe akumulengesha ayi apenge munshila iyo. Nebo neMwaami Lesa ndakacita boobo kwaamba ayi buumi bwakwe bube mulambu wakumana milandu. Nakubi boobo bamulunyungu lwakwe ulaakubabona alimwi ulaakwikala buumi bulaamfu. Kwiinda muli nguwe lusuno lwangu neMwaami Lesa lulaakuswitilila.

Isaya 53:10 Marejeleo ya Msalaba

Kulumbaisha 110:3

Bashilumamba bako balaakulyaaba amyoyo yoonse pabushiku bwa nkondo. Bacikula bwangu balaakwisa kuli ndiwe macuunsacuunsa bweenka mbuli mume patulundu tusalalite.

Kulumbaisha 147:11

Sombi ulasangalalila muli babo bamulemeka, abo bacinka manungo mulusuno lwakwe lutamaani.

Kulumbaisha 149:4

Ceebo Mwaami Lesa ulakondwa mubantu bakwe, ulalemeka baliceesha mukubapa nkusu shakukoma.

Kulumbaisha 21:4

Wakamusenga buumi ncakwiila amwebo mwakamupa. Mwakamupa buumi bwa lyoonse alyoonse.

Kulumbaisha 22:30

Bacishalwa balaakunoosebensela Mwaami Lesa. Bantu balaakulwiita baabo bacisa shaMwaami Lesa uyo.

Kulumbaisha 22:31

Balaakushimikila shalupulusho lwakwe kubantu batana kushalwa bulya. Balaakulwiitikwa shintu shoonse nshaakacita.

Kulumbaisha 69:26

ceebo balapensha baabo mbomwakapa mulandu, akwiilika mapensho pabaabo mbomwakacisa.

Kulumbaisha 72:17

Liina lya mwaami alikakalilile, ee, likanooliikobo bweenka mbuli lisuba. Mishobo imwi yoonse aikalilile kupekwa shoolwe kuswa kuli Lesa, mbweeke mbwaakapa mwaami uyo.

Kulumbaisha 72:7

Bululami bulaakukula kwabuumi bwakwe boonse, alwalo lusumpuko lulaakutolelela kushikila mweenshi ukacileeke kubala.

Kulumbaisha 89:29

Bwaami bulaakwikalilila pabamulunyungu lwako. Buleelo bwako teshi bukamaane kushikila liculu likamaane.

Kulumbaisha 89:36

Lunyungu lwakwe lulanooliikobo kwalyoonse alyoonse. Cuuna ca bwaami bwakwe cilaakukalilila pameenso angu, kulilabo lisuba kalicibala.

Isaya 42:1

Mwaami Lesa waamba ayi, “Ono anooyu musebenshi wangu, uyo ngoompa nkusu. Ee, ngondakasala alimwi muli nguwe ndakondwa. Ndaakumupa Mushimu wangu, alimwi ulaakuleta koombolosha cakutanyengelela kumishobo yoonse.

Isaya 46:10

Kuswa kumatalikilo ndakaambila limwi sheshi shikacitike. Ee, ndakashaambila limwi kashitana kucitika. Nebo ndakaamba ayi miyeeyo yangu teshi ikeelewo munshila alimwi ayi ndaakucita shintu shoonse nshendapinga kucita.

Isaya 49:4

Mpomunyaawo ndakaamba ayi, “Anu ndakalinga kulipenshabo kusebensa. Ee, ndakalinga kumanabo nkusu kwakubula mpindu. Sombi shintu shoonse sheelete ndime shili mumaansa a Mwaami Lesa. Ncakwiila cilambu cangu cilaswabo kuli Lesa wangu.

Isaya 53:12

Paceebo ceeco ndaakumupa musena wabulemu, ee, kumupa musena pakati ka yeeyo ya basankwa bacite mpuwo mukwiinga waaba buumi kushikila akulufu, mukwiinga alakwe wabelengelwa pantu pomwi abamucita shibi alimwi mukwiinga wakabwesa shibiibi sha bantu baanji akubeemikanina ayi balekelelwe.”

Isaya 54:3

Nyinsa kumbasu shoonse ncakwiila ulaakushisenya. Bantu bako balaakubwesa cishi ico cili mumaansa a mishobo imwi bulya. Ee, mandabala anene ayo alinga mumatongo alaakusula bantu alimwi.

Isaya 61:9

Bamulunyungu lwakwe balaakunooshibikitwe pakati ka mishobo imwi, ee, bana babo balaakunooshibikitwe pakati ka baswamashi. Boonse beshi bakanoobabona balaakunoosumina ayi ncakwiila aba mbantu Mwaami Lesa mbwaakapa coolwe.”

Isaya 66:22

“Ono bweenka liculu lipya acishi ca panshi cipya isho nsheshi nkalenge mbweshi shikabe shamuyayaya, mbweeke ubo bamulunyungu lwanu aliina lyanu mbweshi shikabule kuloba.

Isaya 9:7

Nkusu shakwe sha bwaami aluumuno shilaakutolelela kukula. Ulaakwikala pacuuna cakwe Defedi ca bwaami akweendelesha bulelo bwakwe. Ulaakunoolela cabululami akoombolosha cakutanyengelela kuswa bobulya kushikila kwalyoonse alyoonse. Mwaami Lesa Shinkusu shoonse washinisha kwaamba ayi shintu ishi shoonse ulaakushicita.

Jelemiya 32:41

Anebo ndaakunoosangalete amoyo wangu woonse pakubacitila shintu shibotu akubekalika mucishi cino kwanshiku shoonse.”

Esekelo 33:11

Balwiite kwaamba ayi, ‘Ndushinisho kweelana ambocibete lushinisho ayi nebo neMwaami Lesa ndi muumi, nebo nshisangalali kubona mucita shibi kaafwa? Sombi ndasangalala kumubona kaasanduka kuswa kunshila shakwe shibiibi akuba abuumi. Amusanduke! Amusanduke kuswa kunshila shanu shibiibi! Ceebonshi mutooyanda kufwa mwebo nobene Isilaeli?’

Esekelo 37:25

Balaakwikala mucishi ico ncendakapa musebenshi wangu Jakobo, ee, cishi ico cakalinga kwikalaamo bamashali banu bakulukulu. Balo, bana babo alimwi abamulunyungu lwabo balaakunookala mumo kwamuyayaya. Wamulunyungu lwakwe Defedi ngweshi akabe mwaami wabo kwalyoonse alyoonse.

Danyelo 9:24

“Myaaka ili 70 kufushikwa mankanda ali 7, nceciindi Lesa ncaapimina bene mishaanu andabala yanu isalalite kwaamba ayi bakaanguluke kuswa kushibiibi akububi. Shibiibi shilaakulekelelwa abululami butamaani bulaakulengeshekwa kwikalilila kwaamba ayi cili anga nciloto amakani a bulaluki shikacitike cancinencine ayalo Ŋanda yakwe Lesa ilaakusalashikwa alimwi.

Mika 7:18

Ino ngani lesa weelene amwebo, lesa uyo ushiminganya shibiibi akulekelela milandu ya bantu banu bakacaala? Mwebo tamukalali kwa lyoonse alyoonse, sombi mulasangalala mukutondesha lusuno lutamaani.

Sefaniya 3:17

Mwaami Lesa, Lesa wako uli awebo. Ulicite nkusu shakukufuna. Ulaakukondwa abuumbi muli ndiwe. Ulaakukuletela buumi bupya mulusuno lwakwe. Ulaakusangalala pali ndiwe mukwiimba nyimbo

Sekaliya 13:7

Mwaami Lesa Shinkusu shoonse waamba ayi, “Nyamuka, webo omupeeni ulwane mweembeshi wangu! Ee, umulwaane uyo unsebensela. Umucaaye, lyalo mbelele shitoopalangana. Nebo nemwiine ntoolwana bantu bangu.

Mateyo 17:5

Ndyaakalinga kucaamba, kwakaboneka likumbi lituba tuu lyakabafwekelela, lyalo mulikumbi umo mwakanyumfwika liswi lyakwaamba ayi, “Uyu ngoMwanaangu ngoonsuni alimwi muli nguwe ndakondwa. Amumunyumfwile!”

Mateyo 3:17

Mpeeke liswi lyakanyumfwika kuswa kwiculu ayi, “Uyu ngoMwanaangu ngoonsuni. Pali nguwe ndikondetwe abuumbi.”

Luka 1:33

Ulaakuba mwaami wa mushobo wakwe Jakobo alimwi bweene bwakwe teshi bukamaneewo.”

Joni 1:29

Mpeeke bushiku bwakaboolaawo Joni wakabona Jesu keesa kuli nguwe. Lyalo wakoolobesha ayi, “Amubone Mwanaambelele wakwe Lesa uyo ukusha shibiibi sha bantu ba mucishi coonse ca panshi!

Joni 12:24

Ntoomulwiita calushinisho ayi luseke lwa maila, na lwabula kulokela mubulongo akufwa, inga kalulibo lomwi lyoonse, sombi na lwalokela mubulongo akufwa, lyalo inga lwashala ashimwi shiinji.

Joni 13:32

Ono na Lesa walemekwa kwiinda muMwanaakwe, nkokwaamba ayi alakwe Lesa mwiine ulaakulemeka Mwanaakwe alimwi utoocita boobo paciindi ceenka cino.

Bene Loma 6:9

Tulishi kwaamba ayi Jesu Klistu wakabushikwa kuswa kubafu alimwi teshi akafweewo. Aboobo lufu talucite nkusu alimwi pali nguwe.

Bene Loma 8:32

Lesa wakabenga Mwanaakwe mwiine ceebo ca ndiswe soonse. Ono na taakwe kukasha Mwanaakwe kupenshekwa, inga waalilwa buyani kutupa shintu shimwi shoonse?

Bene Loma 8:8

Nkokwaamba ayi abo bacitabo shiyanda mibili yabo, inga tabakoonshi kusangalasha Lesa.

2 Bene Kolinto 5:21

Klistu taakalinga kucite cibiibi, sombi Lesa wakabika shibiibi shesu pali nguwe kwaamba ayi swebo tube abululami bwakwe Lesa.

Bene Galatiya 3:13

Klistu wakatulubula kumashingo aswa muMilawo ndyaakashinganwa ceebo cesu mukwiinga Malembo akwe Lesa alaamba ayi, “Ulishinganishitwe woonse uyo upopwa pacisamu.”

Bene Efeso 1:5

wakabambilabo limwi ayi tulaakuba bana bakwe kwiinda muli Jesu Klistu. Ici cakamukondelesha alimwi kwakalinga nkuyanda kwakwe.

Bene Efeso 1:9

Lesa wakacita kweelana ambwaakabamba alimwi wakatushibisha muyeeyo wakwe wa bushishi uyo ngwaakayeeya ayi ulaakuucita kwiinda muli Klistu.

Bene Efeso 5:2

Shoonse nshemucita, shilyeelete kutondesha lusuno bweenka mbuli Klistu mbwaakatusuna. Wakaaba buumi bwakwe ceebo ca ndiswe akuba anga ncipo ca bweema bubotu alimwi anga ncipo ca munyama wakutenta cikondelesha pameenso akwe Lesa.

2 Bene Tesalonika 1:11

Paceebo ceeco tulamupailila lyoonse kwaamba ayi Lesa amulengeshe kuba bantu beelete kwikala buumi ubo mbwaakamwiitila. Tulapaila ayi kwiinda munkusu shakwe amulengeshe kukonsha kucita shintu shibotu nshemuyanda kucita akumanisha milimo itondesha lushomo lwanu.

Bene Ebulu 2:13

Wakaamba alimwi ayi, “Ndaakushoma muli Lesa.” Alimwi ayi, “Ndiwaano abaana abo Lesa mbwaakaampa.”

Bene Ebulu 7:27

Peculu lya waawo taabete mbuli bapailishi banene bamwi tau. Lakwe taceelete kunoocaya banyama nshiku shoonse pacipaililo ceebo ca shibiibi shakwe, kuboolaawo asha bantu. Wakacita boobo linkanda lyomwibo ndondoli, ndyaakalibenga mwiine ayi abe mulambu kuli Lesa.

Bene Ebulu 9:14

Ncakwiila bulowa bwakwe Klistu bwalo buleendaawo nkusu. Bulakonsha kutucitila shiindaawo. Kwiinda muMushimu utamaani, wakalibenga kuli Lesa anga ngumulambu utacite kampenda. Bulowa bwakwe bulasalasha myoyo yesu kumicito itacite ncito, kwaamba ayi tusebensele Lesa muumi.

1 Pita 2:24

Klistu mwiine wakayumuna shibiibi shesu mumubili wakwe pamucilingano kwaamba ayi tuswe munkusu sha shibiibi akwikala lyoonse mubululami. Ceebo ca shilonda shakwe mwashilikwa.

Ciyubululo 1:18

Ndime Wooyo Muumi! Ndakalinga kufwite, sombi ndi muumi ono, alimwi ndaakunoolibo muumi lyoonsebo. Ndicite nkusu palufu alimwi amusena wa bafu.