Isaya 31:1 - Baibo Busansulushi Bwa Libuku Ili

¹ Maawe kuli baabo baya kucishi ca Ijipiti kwaamba ayi bacafwikwe, abo bacinkite manungo mumaaki, kufula kwa shikoci shabo ankusu shiinji isho shicite bantu babo beshikulwanina pamaaki. Maawe kubaabo bataciinki manungo muMwaami Lesa, Lesa Usalalite wa bene Isilaeli, nabi kusenga lucafwo kuli nguwe.

Isaya 31:1 Marejeleo ya Msalaba

Matalikilo 47:17

Aboobo bakaleta shifubwa shabo kuli Josefu alakwe wakabapa shakulya mukushintana amaaki, mbelele, mpongo, ŋombe, ambongolo shabo. Mwaaka uyo wakabapa shakulya mukushintana ashifubwa shabo shoonse.

2 Makani 16:7

Paciindi ico Anani mulaluki wakaya kumwaami Asa akumwaambila ayi, “Ono mukwiinga mwebo mwakacinka manungo mumwaami wa bene Silya pamusena wakucinka manungo muMwaami Lesa, Lesa wanu, bashilumamba bene Isilaeli boonse bamana kumuloboka.

2 Makani 16:9

Mwaami Lesa ulalama cishi coonse akupa nkusu kubaabo bashomeka kuli nguwe. Ono mwebo mwaciita cintu cabuluya, paceebo ceeco kuswa sunu munanoolwanabo lyoonse.”

Jobo 39:11

Sa inga wacinka manungo munkusu shiinji sha njiyo akwiilangila kwaamba ayi itoocita milimo yako iyumu?

Kulumbaisha 20:7

Bamwi balicinkite manungo mushikoci sha maaki, abamwi mumaaki abo. Sombi swebo tulicinkite manungo muMwaami Lesa, Lesa wesu.

Isaya 10:17

Lesa, ee, Mumuni wa bene Isilaeli ulaakuba mulilo. Ncakwiila Usalalite wa bene Isilaeli ulaakuba kubilima kwa mulilo uko kukonsha kutenta shoonse mubushiku bomwibo. Kutenta nabi myuumfwa ashisonsoonya.

Isaya 2:7

Cishi cabo ciliswitebo silifa agolodi, buboni bwabo bwafula abuumbi. Cishi cabo ciliswitebo maaki, shalo shikoci sha maaki a nkondo tashibelengeki.

Isaya 20:5

Lyalo abo bakalinga kucinkite manungo mubene Kushi akunoolisumpwita mubene Ijipiti balaakuloonda akulenshekwa nsoni.

Isaya 22:11

Mpeeke pakati ka malinga obilo mwakayakawo cishiba cakusungilaamo maanshi kwaamba ayi maanshi akalinga kukunka kuswa muCishiba Cikulukulu anooya mumo. Nakubi boobo Lesa uyo wakabambilabo limwi shintu shoonse ishi ayi shikacitike tamukwe kumubikaako maano.

Isaya 30:16

Mwebo mwakaamba ayi, ‘Sobwe. Swebo tulaakucica pamaaki esu.’ Anu ncibotu mulaakucica. Mwakaamba ayi, ‘Tulaakucica pamaaki esu eendaawo kucica.’ Sombi beshibakanooya cimutandaanya balaakumwiindaawo lubilo.

Isaya 36:6

Webo utooyeeyela kucafwikwa kubene Ijipiti. Ico inga caba anga nkushimpila kulitete pakweenda. Litete ilyo inga lyatyoka akukuyasa mulyaansa omwiine. Anu ubo mwaami wa bene Ijipiti mbwaabete na muntu wacinka manungo muli nguwe.’ ”

Isaya 36:9

Webo tookoonshi kukoma aweelaako pabacinenenene ba bene Asilya, nakubi boobo utooyeeya ayi bene Ijipiti bakutumine shikoci abeshikulwanina pamaaki!

Isaya 43:15

Nebo ndime Mwaami Lesa, Usalalite alimwi uyo wakamulenga nobene Isilaeli. Ncakwiila ndime Mwaami wanu.”

Isaya 5:12

Pakusekelela kwabo balalishilwa tulumbu tunene atuniini, misebe amitoolilo akunwa waini. Sombi kumilimo ya Mwaami Lesa tababikiiko amaano. Ncakwiila milimo ya maansaakwe baleesuula.

Isaya 57:9

Mulalinaneeka mafuta eendaawo kununkila amafuta amwibo akuya mukulambila lesa Moleki. Kulangoola balesa abo mulacita kutuma beshinkombe banu kulaale ee, cakubatumabo nabi kushuumbwe kwiine.

Isaya 64:7

Taaku nabi womwi umupaila nabi ulwanisha kwaamba ayi mumucaafwe. Mwalishisa kuswa kuli ndiswe akutusuula ceebo ca shibiibi shesu.

Isaya 9:12

Kwicwe bene Silya akumbo bene Filisiti, boonse bakalakama kwaamba ayi bamine bene Isilaeli. Nakubi boobo bukali bwakwe teshi bukamaane, sombi lyaansa lyakwe lilaakunoocitandabete mukubapa mulandu.

Isaya 9:13

Bene Isilaeli tabakwe kusanduka kuswa kushibiibi shabo. Nakubi kwaamba ayi Mwaami Lesa Shinkusu shoonse wakabatondesha bukali bwakwe, tabakwe kupilukila kuli nguwe.

Jelemiya 17:5

Mwaami Lesa utokwaamba ayi, “Ulishingenwe uyo ucinka manungo mumuntunyina, ee, uyo ushoma mumuntubo ayi inga wamucafwa ncakwiila uyo ufutatila Mwaami Lesa.

Jelemiya 2:13

Bantu bangu bakacita shibiibi shobilo. Bamfutatila nebo nekantupu ka buumi akulikabila mikalo yabo beene, mikalo itakoonshi kusunga amaanshi.

Jelemiya 37:7

kwaambila Sedekiya ayi, “Bashilumamba ba bene Ijipiti bali munshila kwisa mukukucafwa kulwana. Teshi bakashiike, sombi balaakuboolelaamo kumishaabo kuIjipiti.

Jelemiya 42:14

na mwaambe ayi, ‘Sobwe, swebo tutooya kuIjipiti tuye tukekale uko nkweshi tukabule kubonawo nkondo, kunyumfwa lupeenga lwa nkondo nabi kufwa nsala,’

Esekelo 17:15

Sombi mwaami wa bene Juda lakwe wakaashuka akutuma beshikumwiimikanina kuIjipiti kuya mukuleta maaki alikoto lya bashilumamba linene. Sa muntu uyu ulaakuswitilila? Sa uyo weenga wacita sha mushobo uyo inga wapuluka? Sa inga wakonsha kupwaya cipangano amana wapuluka?’

Esekelo 29:16

Bene Isilaeli teshi bakacinkewo tubili manungo mucishi ca Ijipiti, sombi mapensho a ncico alaakunoobeebalushabo mbocibete cibiibi kusenga lucafwo kuli ncico. Lyalo ndyeshi bakeshibe ayi nebo ndi Mwaami Lesa Shinkusu shoonse.”

Danyelo 9:13

Mwakacita boobo kweelana amaswi alembetwe muMilawo yakwe Mose. Nakubi boobo noBaami baLesa, baLesa besu tatukwe kumukondelesha mukusanduka kuswa kushibiibi shesu nabi mukukonkela lushinisho lwanu.

Osiya 11:5

“Bakakaka kusandukila kuli ndime, aboobo balyeelete kuboolela kuIjipiti alimwi bene Asilya balaakunoobalela.

Osiya 11:9

Teshi nkacite kweelana abukali bwangu, teshi nkanyonyoolewo Isilaeli alimwi mukwiinga ndi Lesa, kuteshi muntu. Nebo neUsalalite ndi pakati kanu, aboobo teshi nkese kuli ndimwe mubukali bwangu buyoosha.

Osiya 14:3

Bene Asilya tabakoonshi kutupulusha. Maaki a nkondo taakoonshi kututabilila. Teshi tukaambewo tubili kusheesho shakapanga maanseesu ayi, ‘Balesa besu’ mukwiinga muli ndimwe bana banshiwa mobacana nkumbu.”

Osiya 7:7

“Balacaya baleli babo mubukali bwabo. Bamaami balacaikwa womwi awomwi, sombi taaku nabi womwi usenga lucafwo kuli ndime.”

Abakuku 1:12

NoBaami baLesa kuswa kumatalikilo muli baLesa. Mwebo ndimwe baLesa bangu Basalalite batafwi. Mwebo noBaami baLesa ndimwe mwakasala bene Babiloni kwaamba ayi bese batupeenshe ceebo ca mulandu wesu. Ncakwiila mwebo noMwaandami wesu mwakababika ayi batwaanishe.

Abakuku 3:3

Lesa wakesa kuswa kuEdomu, Lesa usalalite wakesa kuswa kuKalundu ka Palani. Bulemu bwakwe bwakafwekelesha liculu alimwi bamucishi ca panshi boonse bakamulumbaisha.

Sekaliya 10:5

Boonse pantu pomwi balaakuba anga mbashilumamba beshinkusu abo balyatoola balwani babo kubapisha mumatipa mumikwakwa. Ceebo cakwaamba ayi nebo neMwaami Lesa ndi ambabo, balaakunoolwana akukoma balwani babo beshimaaki.

Dutolonomi 17:16

Mwaami uyo teelete kuba amaaki aanji a bashilumamba bakwe nabi kutuma bantu bakwe kuIjipiti ayi bakaletelewo amwi, mukwiinga Mwaami Lesa wakakasha bantu bakwe kuboola nkuko.

Dutolonomi 20:1

“Na mutooya mukulwana abalwani banu, ono mwaboona ayi balicite maaki aanji, shikoci shiinji alimwi bashilumamba baanji kwiinda banenu, tamweelete kubaloonda. Mwaami Lesa, Lesa wanu uyo wakamukusha mucishi ca Ijipiti, ulaakuba amwebo.