Isaya 25:1 - Baibo Busansulushi Bwa Libuku Ili

¹ NoBaami baLesa, ndimwe baLesa bangu. Ndanoosumpula akulumbaisha liina lyanu. Mwakacita shintu shikankamika abuumbi kwiinda mukushomeka kwanu kutacite kampenda, ee, shintu isho nshemwakabambabo kale kale.

Isaya 25:1 Marejeleo ya Msalaba

Kulumbaisha 111:4

Wakalengesha ayi milimo yakwe ikankamika inokwiibalukwa. Ncakwiila Mwaami Lesa ngushiluse alimwi ngushinkumbu.

Kulumbaisha 118:28

Mwebo muli baLesa bangu, ndanoomulumba. Muli baLesa bangu, ncakwiila ndanoomusumpula.

Kulumbaisha 145:1

Ndaakumulumbaisha nobaLesa, noBaami bangu, akulemeka liina lyanu lyoonse alyoonse.

Kulumbaisha 146:2

Ndaakulumbaisha Mwaami Lesa kwabuumi bwangu boonse. Ndaakwiimba nyimbo shakulumbaisha kuli Lesa wangu ndyeencili muumi.

Kulumbaisha 31:15

Nebo lyoonse ndi mumaansaanu. Amumfuune kuswa kubalwani bangu, ee, kuswa kubaabo bampensha.

Kulumbaisha 40:5

Shintu shikankamika nshemwakatucitila nshiinji, noBaami baLesa, baLesa besu. Taaku ukonsha kushimika shintu nshemwakatubambila. Nshikoonshi kushaamba shoonse mukwiinga shafulisha.

Kulumbaisha 40:6

Mwebo tamusangalalili mumilambu nabi mushipo. Milambu yakutenta nabi yakumana shibiibi tamucite asho ncito. Sombi nebo mwakampa matwi akunyumfwila ndimwe.

Kulumbaisha 46:10

Lesa ulaamba ayi, “Amukale muluumuno akwishiba ayi nebo ndime Lesa, ulemekwa pakati ka mishobo yoonse, alimwi ulemekwa mucishi coonse ca panshi.”

Kulumbaisha 75:2

Mwakaamba ayi, “Ndakasala kale ciindi ceelete, ciindi nebo nceshi nkoomboloshe cabululami.

Kulumbaisha 78:4

Teshi tukashishiseewo kubana besu. Tulaakulwiita lishalane litoosa pankusu sha Mwaami Lesa amilimo yakwe ya nkusu, kubikaawo ashaankamiko isho nshaakacita.

Kulumbaisha 89:1

NoBaami baLesa, lyoonse ndaakwiimba lusuno lwanu lutamaani, alimwi ndaakwaamba pakushomeka kwanu mumashalane oonse acisa.

Kulumbaisha 98:1

Amwiimbile Mwaami Lesa lwiimbo lupya, mukwiinga wakacita shintu shikankamika. Lyaansa lyakwe lyalulyo, ee, mukono wakwe usalalite wamulengesha kukoma.

Kulumbaisha 99:5

Aalumbaishikwe Mwaami Lesa, Lesa wesu, amumulambile kunembo lya cuuna cakwe ca bwaami! Lakwe ulisalalite!

Kulonga 15:2

Mwaami Lesa ngoompa nkusu alimwi ndamwiimbila, mukwiinga ngomupulushi wangu. NgoLesa wangu, alimwi ntoomulumbaisha ngoLesa wa bata alimwi ntokwiimba pankusu shakwe.

Isaya 11:5

Bululami bulaakuba ngolaamba wakwe. Kushomeka ngolaamba wakwe wakufwala mubukome.

Isaya 12:1

Pabushiku ubo mulaakwiimba ayi, “Ndanoomulumbaisha noBaami baLesa. Nabi mwakalinga kukalalite pali ndime, bukali bwanu sunu bwamana. Ono sunu mwankalika moyo.

Isaya 26:13

NoBaami baLesa, baLesa besu nabi twakalelwaawo kale abamaami bamwi, sombi mwebo nweenka ndimwebo Baami baLesa besu.

Isaya 26:8

Swebo tulacita kweelana akuyanda kwanu alimwi tulalangila muli ndimwe. Tulisuni kubona liina lyanu kalisumpulwa akuya mpuwo.

Isaya 28:29

Busongo boonse ubo bulaswa kuMwaami Lesa Shinkusu shoonse, ee, kuli Lesa uyo ukankamanisha mukupanda maano amubusongo bwakwe.

Isaya 40:27

Ono ceebonshi nobamulunyungu lwakwe Jakobo mulaamba ayi, “Mwaami Lesa taabwene mapensho esu?” Ceebonshi mulatongooka ayi, “Lesa taabikiiko amaano kuli ndiswe nabi katulyatililwa?”

Isaya 46:10

Kuswa kumatalikilo ndakaambila limwi sheshi shikacitike. Ee, ndakashaambila limwi kashitana kucitika. Nebo ndakaamba ayi miyeeyo yangu teshi ikeelewo munshila alimwi ayi ndaakucita shintu shoonse nshendapinga kucita.

Isaya 46:11

Ncakwiila ntokwiita musankwa kuswa kwicwe. Ulaakwisa mukulwana cakutamwiingashila anga ngucikupwi kwaamba ayi acite kweelana amuyeeyo ngondakapanga.

Isaya 49:4

Mpomunyaawo ndakaamba ayi, “Anu ndakalinga kulipenshabo kusebensa. Ee, ndakalinga kumanabo nkusu kwakubula mpindu. Sombi shintu shoonse sheelete ndime shili mumaansa a Mwaami Lesa. Ncakwiila cilambu cangu cilaswabo kuli Lesa wangu.

Isaya 49:5

“Mwaami Lesa wakamumba nebo mumala muli bama ayi mbe musebenshi wakwe. Ee, ayi mbooshe bamulunyungu lwakwe Jakobo kuli nguwe. Wakacita boobo kwaamba ayi muyobolweteeko bene Isilaeli. Mwaami Lesa ulampa bulemu nebo alimwi muli nguwe mooncana nkusu.”

Isaya 61:10

Ndasangalala cankusu muMwaami Lesa. Moyo wangu ulisangalete abuumbi muli Lesa. Ceebo wamfwalika lupulusho anga ncakufwala ca peculu akumfwalika bululami anga ngumungaanjo. Wamfwalikabo bweenka shibwiinga nabi mupailishi mbwaalibotesha kumutwi, nabibo shibwiinga mbwaalibotesha ashakulibotesha sha makwebo.

Isaya 7:13

Mpomunyaawo Isaya wakaamba ayi, “Kutika ono webo owamulunyungu lwakwe Defedi! Sa kupensha bantu uku nkomucita teshi kuunji? Ono sa utooyanda kupensha aLesa wangu?

Jowelo 2:26

Mulaakulya shiinji akukuta. Ncakwiila mulaakunumbaisha nebo neMwaami Lesa, Lesa wanu uyo wakamucitila shintu shikankamika. Mwebo nobantu bangu teshi mukasebaanishikweewo tubili.

Shakubelenga 23:19

Lesa taabete anga mbantu abo babeshi. Taabete anga ngumuntu upilula miyeeyo yakwe. Coonse nceenga walasha, ulacicita alimwi na waamba, ncaamba cilacitwa.

Bene Efeso 1:11

Shoonse shintu shilacitwa kweelana amiyeeyo yakabamba Lesa alimwi akuyanda kwakwe. Aboobo Lesa wakatusala ayi tube bantu bakwe muli Klistu, nkokwaamba ayi ncaakatusalila kweelana ambwaakabamba kuswa kumatalikilo.

Ciyubululo 15:3

Bakalinga kwiimba lwiimbo lwakwe Mose musebenshi wakwe Lesa alimwi alwiimbo lwa Mwanaambelele ayi, “NoBaami baLesa Beshinkusu shoonse, micito yanu njinene alimwi ilakankamika abuumbi! NoBaami baLesa ba mishobo yoonse ya bantu, nshila shanu shililuleme alimwi nshalushinisho!

Ciyubululo 19:11

Lyalo ndakabona liculu lyacaluka, kucana paliimfwi liaki lituba. Wakalinga kutantiteewo uleetwa ayi Ushomeka, Walushinisho. Lakwe uloombolosha akulwana mubululami.

Ciyubululo 7:12

kabaamba ayi, “Ameni! Lesa wesu aalumbaishikwe, aapekwe bulemu abusongo, aalumbwe alimwi akupekwa nkusu abweendeleshi lyoonse alyoonse. Ameni!”