Esekelo 7:8 - Baibo Busansulushi Bwa Libuku Ili

⁸ “ ‘Ono cakufwambaana ntoomulengesha kunyumfwa cilemeneshi coonse ca bukali bwangu. Ndaakumoombolosha kweelana amicito yanu akumupa mulandu pashintu shilensha bunya nshemwakacita.

Esekelo 7:8 Marejeleo ya Msalaba

2 Makani 34:21

“Kamuya mukeepushileko ndime abene Juda boonse kuMwaami Lesa pasheesho shilembetwe mulibuku lya Milawo ili lyacanikwa. Mwaami Lesa ulikalalite abuumbi pali ndiswe mukwiinga bamashali besu bakulukulu tabakwe kukonkela maswi a Mwaami Lesa mukutacita kweelana asheesho shoonse shilembetwe mulibuku ili.”

Kulumbaisha 79:6

Amukalalile mishobo iyo itamulambili, ee, malelo ayo atapaili kuli ndimwe.

Isaya 42:25

Paceebo ceeco bukali bwakwe bwakesa pali ndiswe. Bukali bwakwe bwakeenda munkondo iyo yakatupolela. Inkondo yakatukalalila soonse mucishi ca Isilaeli. Nakubi boobo tatukwe kuwishiba citoocitika. Ndushinisho taaku ciiyo ncetwakacanaamo nabi comwi.

Jelemiya 36:31

Ndaakukupa mulandu webo, bana bako abacinenenene bako ceebo ca shibiibi nshemwakacita. Bene Jelusalemu abene Juda ndaakubaletela mapensho oonse ngondakaamba kubaletela ceebo tabakwe kunyumfwila.’ ”

Jelemiya 7:20

Paceebo ceeco nebo neMwaami Lesa Shinkusu shoonse ndaakutila bukali bwangu buyoosha paŊanda yangu ino. Ndaakubutilila pabantu, pabanyama pashisamu alimwi apashishango. Bukali bwangu bulaakuba anga ngumulilo uyo muntu ngwaatakoonshi kushimya.

Malilo 2:17

Mwaami Lesa wakacita kweelana ambwaakapinga. Wakacita kweela amaswi akwe ngwaakashomesha kalekale ayi ulaakwaacita. Wakakoma kwakubula kukunyumfwila nkumbu. Ncakwiila wakaleka balwani kukusamwina mukukukoma. Wakapa nkusu shiinji kubalwani bako.

Malilo 2:4

Weeleka buta bwakwe bweenka mbuli mulwani. Ncakwiila lyaansa lyakwe lyalulyo lyalibambila. Wakamana kucaya bantu boonse balinga kutukonda bweenka bucita mulwani. Wakapukula bukali bwakwe anga ngumulilo pandabala inene ya Siyoni.

Malilo 4:11

Mwaami Lesa wakusha bukali bwakwe boonse, ee, wapoomona bukali bwakwe buyoosha. Wakanyansha mulilo mundabala ya Siyoni uyo wakeetenta cakushika akulwiimbi lwa njiyo.

Esekelo 11:21

Sombi abo balyaabite mukulambila shikoshanyo shifundoosha kumoyo ashibumbwabumbwa shilensha bunya, ndaakubapa mulandu kweelana anshebakacita. Nebo neMwaami Lesa Shinkusu shoonse ndaamba.”

Esekelo 14:19

“Nabi na ndatuma mwaalu mucishi ico akupomweeta bukali buyoosha pali ncico kwiinda mukutila bulowa kucaya bantu boonse alimwi ashifubwa shabo,

Esekelo 16:43

“ ‘Ono mukwiinga tamukwe kwiibaluka nshiku sha bucikula bwangu bwako, sombi wakankalasha mukucita shintu shoonse ishi. Ndushinisho ndaakukupa mulandu pasheesho nshewakacita. Ceebonshi wakeelikawo bufuule pasheesho shoonse shilensha bunya nshewakalinga kucita? Nebo neMwaami Shinkusu shoonse ndaamba.’ ”

Esekelo 16:59

Mwaami Lesa Shinkusu shoonse waamba ayi, “Ndaakukucita kweelana amboweelete ceebo wakasuula kushomesha kwako akupwaya cipangano cangu.

Esekelo 18:30

“Ono nebo neMwaami Lesa Shinkusu shoonse ndaamba ayi, ‘Mwebo nobene Isilaeli, ndaakoombolosha womwi awomwi kweelana anshila shakwe. Amusanduke kuswa kushilubo shanu! Mutaleeki shibiibi shanu ayi shimunyonyoole.

Esekelo 20:13

“ ‘Nakubi boobo bene Isilaeli bakangashukila muluyanga. Tabakwe kukonkela milasho yangu akukaka milawo yangu iyo ipa buumi kumuntu uyo wiinyumfwila. Bakabisha bushiku bomwi abomwi bwakookesha bwa Cibelu. Aboobo ndakalinga kulibambite kubalengesha kunyumfwa cilemeneshi ca bukali bwangu muluyanga.

Esekelo 20:21

“ ‘Nakubi boobo lishalane ilyo alyalo lyakangashukila. Tabakwe kukonkela milasho yangu akukaka milawo yangu iyo ipa buumi kumuntu uyo wiinyumfwila. Bakabisha bushiku bomwi abomwi bwakookesha bwa Cibelu. Aboobo ndakalinga kulibambite kubalengesha kunyumfwa cilemeneshi ca bukali bwangu muluyanga.

Esekelo 20:33

“Nebo neMwaami Lesa Shinkusu shoonse ndaamba ayi, ‘Kweelana ambocibete lushinisho ayi ndi muumi, ndaakumulela alyaansa lyangu lyankusu, lyaansa litambikitwe alimwi abukali buyoosha.

Esekelo 20:8

“ ‘Sombi balo bakangashukila akukaka kunyumfwila. Tabakwe kusowa shibumbwabumbwa shilensha bunya isho nshebakalinga kusuni nabi kusuula balesa ba bene Ijipiti. Aboobo ndakalinga kulibambite kubalengesha kunyumfwa cilemeneshi ca bukali bwangu muIjipiti.

Esekelo 22:31

Paceebo ceeco ndaakubatila bukali bwangu buyoosha akubanyonyoola kuceeselela ca bukali bwangu ceebo ca sheesho nshebakacita beene beenka. Nebo neMwaami Lesa Shinkusu shoonse ndaamba.’ ”

Esekelo 24:14

“Nebo neMwaami Lesa ndime ntokwaamba. Ciindi cangu cakucitawo comwi pali ndiwe cashikila. Teshi nkaboolewo pesule, kufwa nkumbu nabi kukulekabo, sobwe. Ulaakupekwa mulandu kweelana abwikaalo bwako alimwi amicito yako. Nebo neMwaami Lesa Shinkusu shoonse ndaamba.”

Esekelo 30:15

Ndaakutila bukali bwangu buyoosha pali Pelusyumu, ndabala icite lilinga mucishi ca Ijipiti. Ndaakunyonyoola bashilumamba boonse bali kuTebesi.

Esekelo 33:20

Nakubi boobo, mwebo nobene Isilaeli mulaamba ayi, ‘Nshila sha Mwaami Lesa tashilulemeewo,’ sombi nebo muntu womwi awomwi ndaakumoombolosha kweelana anshila shakwe mwiine.”

Esekelo 6:12

Abo bali kulaamfu balaakufwa kumwaalu. Abo bali pafwaafwi balaakufwa kunkondo. Abalo abo beshi bakapuluke akucaalaawo, balaakufwa kunsala. Anu ubo mbweshi nkabalengeshe kunyumfwa cilemeneshi coonse ca bukali bwangu.

Esekelo 7:27

Mwaami ulaakulila buumba, mwanaamwaami musankwa ulaakutyongola aalo maansa a bantu ba mucishi alaakunootutuma. Ndaakumupa mulandu kweelana amicito yanu akumoombolosha bweenka mbomwakalinga koombolosha bamwi. Lyalo mulaakwishiba ayi nebo ndi Mwaami Lesa.”

Esekelo 7:9

Teshi nkamufwite nkumbu nabi kumulangabo, sobwe. Ndushinisho ndaakumupa mulandu kweelana amicito yanu alimwi ashintu shilensha bunya nshemwakacita. Lyalo ndyeshi mukeshibe ayi nebo ndi Mwaami Lesa uyo umupa mulandu.’ ”

Esekelo 9:10

Aboobo teshi nkabafwitewo nkumbu nabi kubalangabo, sobwe. Sombi ndaakubacitila bweenka mbobakacitila bamwi.”

Esekelo 9:8

Ono kabaciya bucaya, nebo ndindakacaala neenka, ndakafukama cakushisha ciwa panshi akulila ayi, “Maawe noBaami balesa Beshinkusu shoonse! Sa mutooyanda kucaya boonse bakacaalaawo pabene Isilaeli mubukali bwanu buyoosha mbomwapoomweta pandabala ya Jelusalemu?”

Danyelo 9:11

Bene Isilaeli boonse bakapwaya milawo yanu akukaka kunyumfwila sheesho nshemwakaamba. Twakamubishisha, aboobo mwakatuletela mashingo alembetwe muMilawo yakwe Mose musebenshi wanu.

Danyelo 9:27

Muleli uyo ulaakuba acipangano ciyumu abantu baanji kwamyaaka ili 7. Musa wa ciindi ico waakwiinda, ulaakukasha kubenga milambu akupa shipo. Mpeeke ulaakubika Cintu cilya Ciloondesha pakansunswa ka ciluli ca Ŋanda yakwe Lesa alimwi cilaakunooli waawo kushikila uyo wakacibikaawo akanyonyoolwe kweelana akubamba kwakwe Lesa.”

Osiya 12:3

Jakobo wakalwana aEsau kabacili mulifumo alimwi ndyaakakula wakalwana aLesa.

Osiya 5:10

Mwaami Lesa waamba ayi, “Bamatanjilili ba bene Juda balibo anga mbantu balya basenya libwe lya manyinsa. Aboobo ndaakupoomweta bukali bwangu buyoosha pali mbabo.

Naamu 1:6

Ngani weenga weemikana kubukali bwakwe? Ngani ukonsha kwiimikana kubukali buyoosha? Bukali bwakwe bulanyaka anga ngumulilo. Mabwe oonse alapwayooka kunembo lyakwe.

Ciyubululo 14:10

ulaakunwa waini wa bukali bwakwe Lesa, uyo ngweshi ukatiilwe munkomeshi ya bukali bwakwe cakutatilako cakubombya bukali. Boonse bacita sheeshi balaakupenshekwa mumulilo alimwi asalufa pameenso abaanjelo basalalite alimwi aMwanaambelele.