Danyelo 9:25 - Baibo Busansulushi Bwa Libuku Ili

²⁵ Shiba akunyumfwishisha cikani ici. Kuswa bushiku ndyeshi kukapekwe mulasho wakuyakulula Jelusalemu kushikila Mutanjilili Usalitwe wakwe Lesa akese, palaakwiinda myaaka ili 7 kufushikwa mankanda ali 7. Ndabala ya Jelusalemu ilaakuyakululwa akuba amikwakwa alimwi amalinga ayumu. Ndabala iyo ilaakunooliiko kwamyaaka ili 7 kufushikwa mankanda ali 62, sombi ico cilaakuba ciindi ca mapensho.

Danyelo 9:25 Marejeleo ya Msalaba

2 Samwelo 15:25

Kuswawaawo mwaami Defedi wakaambila Sadoki ayi, “Amubooshe Libokoshi lya Cipangano ca Mwaami Lesa kundabala inene ya Jelusalemu. Na Mwaami Lesa akanyumfwile nkumbu ulaakumboosha ayi nkaliboone alimwi, pantu pomwi amusena uyo molikala.

Esila 4:24

Aboobo mulimo wa kuyaka Ŋanda yakwe Lesa alimwi muJelusalemu wakeemikana kushikila mumwaaka wabili mubulelo bwakwe Dalyasi mwaami wa kuPesha.

Esila 7:1

Ono ndikwaakeenda myaaka iinji, Atasakisesi kaali mwaami wa kuPesha, kwakalinga muntu wakalinga kwiitwa ayi Esila. Esila wakalinga wamulunyungu lwakwe Aloni mupailishi munene mukwiinga wakashalwa kuli Selaya, Selaya wakashalwa kuli Asaliya, Asaliya wakashalwa kuli Ilikiya,

Esila 7:8

Wakashika kuJelusalemu mumweenshi wasanu mumwaaka wasanu ayobilo.

Neyemiya 3:1

Lyalo Eliyashibu mupailishi munene abapailishinyina bamwi bakatalika mulimo. Bakayakulula Mwinjililo wa Mbelele. Bakausalasha akwiimika shisasa mumisena yeelete. Bakayakulula akusalasha lubumbu kushikila akuŊanda ilaamfu ya Mwaanda alimwi aŊanda ilaamfu ya Ananelo.

Neyemiya 4:2

Lyalo wakaamba pameenso ababye abashilumamba bene Samaliya ayi, “Ino baJuda aba balefukite batoocitanshi? Sa batooyeeya kuyakulula lubumbu lwabo? Sa balo batooyeeya ayi inga bamanisha mulimo pabushiku bomwi kwiinda mukubenga milambu? Sa inga bapanga mabwe akuyakishako kuswa pamabwe aya akapwayoolwa akutentwa?”

Neyemiya 4:8

Lyalo bakapangana kulwana Jelusalemu alimwi akubusha shimfulunganya.

Neyemiya 6:15

Lyalo lubumbu lwakamanishikwa pabushiku bwamakumi obilo anshiiku shosanwe mumweenshi wa Eluli. Nkokwaamba ayi mulimo uyo wakatola nshiku makumi osanwe anshiiku shobilo.

Kulumbaisha 71:10

Bulya balwani bangu batooyanda kuncaya. Balabandika pantu pomwi miyeeyo mukupinga ndime.

Shikushimikila 3:3

Kuli ciindi cakucaya aciindi cakushilika. Kuli ciindi cakumwaya aciindi cakuyaka.

Isaya 55:4

Amubone, lakwe ndakamusala kuba kamboni kubantu boonse. Ndakamulengesha kuba mutanjilili wa mishobo imwi yoonse.

Isaya 9:6

Ceebo mwaana washalwa pakati kesu, ee, twapekwa mwaana musankwa. Bweendeleshi boonse bulaakuba mumaansaakwe. Liina lyakwe unanokwiitwa ayi, “Shikupanda maano Mubotu,” “Lesa Shinkusu shoonse,” “Mushali musankwa wamuyayaya,” alimwi ayi, “Mwaami wa Luumuno.”

Danyelo 8:11

Lyakalisumpula cakunyansha aMuleli wa likoto lya kwiculu. Lyakakasha milambu ya bushiku abushiku iyo yakalinga kubengwa kuMuleli uyo akubisha Ŋanda yakwe.

Danyelo 8:25

Ono ceebo cakwaamba ayi ulaakunoocenjete abuumbi, ulaakuswitilila munshila shakwe shakubeca. Ulaakulisumpula akunyonyoola bantu baanji cakutabacenjesha. Ulaakunyansha aMuleli wa baleli boonse, sombi ulaakunyonyoolwa cakubula kusebenseshawo nkusu shabuntu.

Danyelo 9:23

Ndiwatalikabo kupaila kuli Lesa, wakukumbula. Ndesa mukukulwiita kukumbula kwakwe ceebo webo ulalemekwa abuumbi pameenso akwe Lesa. Ono kutikisha mbweshi noosansulula akunyumfwisha cili anga nciloto ico mbocaamba.

Mika 5:1

Nobene Jelusalemu, amubunjike bashilumamba banu, twashingulukwa a balwani. Booma muleli wa bene Isilaeli kumeenso amusako.

Mika 5:2

Mwaami Lesa waamba ayi, “Sombi webo Betileemu Efulata, nabi uli ndabala iniini mucishi ca Juda, kuswa muli ndiwe, ndaakuleta muleli wa bene Isilaeli. Mukowa wakwe wakatalikabo kalekale, ee, kuswa kunshiku sha kumatalikilo.”

Mateyo 13:23

Sombi mbuto shakalokela mubulongo bubotu mbantu abo banyumfwa maswi akwe Lesa akwaacita. Aboobo balacata shisepo, bamwi mwaanda, bamwi makumi osanwe alyomwi abalo bamwi makumi otatwe.”

Mateyo 24:15

“Aboobo, na mukabone Cintu cilya Ciloondesha ico ncaakaamba mulaluki mukulukulu Danyelo, kaciimfwi paMusena Usalalite (utoobelenga anyumfwishishe),

Maako 13:14

“Na mukabone Cintu cilya Ciloondesha ico cibisha kaciimfwi pamusena mpociteelete kuba, (utoobelenga anyumfwishishe), lyalo abo bali kuJudeya bakacicile kutulundu.

Joni 1:41

Cintu citaanshi ncaakacita Andulu, nkubona Simoni akumwaambila ayi, “Twamucana Klistu.” (Ili liina lilaamba ayi “Usalitwe wakwe Lesa.”)

Joni 4:25

Mwanakashi uyo wakaamba ayi, “Ndishi kwaamba ayi Usalitwe wakwe Lesa (wiitwa ayi Klistu) ulaakwisa. Na akese, ulaakutusansulwita shintu shoonse.”

Milimo ya Batumwi 3:15

Mwebo mwakacaya wooyo upa buumi bwancinencine, sombi Lesa wakamubusha kuswa kubafu. Ono swebo tuli bakamboni pacikani ici.

Milimo ya Batumwi 5:31

Sombi Lesa wakamusumpula akumubika kulubasu lwakwe lwalulyo ayi abe Mwaami alimwi aMupulushi. Wakacita boobo ayi bantu ba muIsilaeli babe aciindi cakusanduka kuswa kushibiibi shabo, balekelelwe.

Milimo ya Batumwi 8:30

Ncakwiila Filipo wakacicilaako, wakanyumfwa kaabelenga mulibuku lyakalemba mulaluki mukulukulu Isaya. Lyalo wakamwiipusha ayi, “Sa utokwaanyumfwishisha makani ngootobelenga?”

Bene Efeso 5:16

Muciindi coonse mulyeelete kucita shintu shibotu mukwiinga shino nshiku shabica.

Ciyubululo 1:5

Alakwe Jesu Klistu amupe luse aluumuno. Lakwe ngokamboni ushomeka, ngowakataanguna kubushikwa kuswa kubafu alimwi ngomweendeleshi wa bamaami boonse ba mucishi ca panshi. Jesu Klistu ulitusuni alimwi kwiinda mulufu ndwaakalibenga, wakatwaangulula kuswa kushibiibi shesu shoonse.

Ciyubululo 19:16

Apalo pacisani cakwe apalibelo, pakalinga kulembetwe liina lyakwaamba ayi, “Mwaami wa bamaami, Mweendeleshi wa beendeleshi.”