Bene Loma 7:7 - Baibo Busansulushi Bwa Libuku Ili

⁷ Ino ono twaambe buyani? Sa twaambe ayi Milawo njibiibi? Sobwe, tabwishi mbocibete ubo! Sombi njiMilawo yakalengesha ayi nshibe bubi. Nikuteshi Milawo yaamba ayi, “Utabi amunyono pashintu sha mubyo”, naakwiinga nshishibiiwo lunkumbwa lwa mushobo uyu.

Bene Loma 7:7 Marejeleo ya Msalaba

Matalikilo 3:6

Mwanakashi ndyaakabona cisamu ico mbocakalinga kuboneka kabotu, ashisepo mboshakalinga kuboneka kubota kulya, alimwi ndyaakayeeya ayi inga wacana busongo mukushilya, wakayapaako akulya. Mpeeke wakayapa shimwi akupaako ibaye, alakwe wakalya.

2 Samwelo 11:2

Bumwi bushiku macolesha Defedi wakabuka pabulo bwakwe akuya ceendaana paciluli ca ŋanda yakwe ya bwaami. Ndyaakalinga waawo, wakabona mwanakashi kaasamba bulya. Mwanakashi uyo wakalinga mubotu abuumbi.

Kulumbaisha 119:96

Ndishi kwaamba ayi shintu shoonse shibotu shilicite meelelesho, sombi yalo milawo yanu teecitewo meelelesho.

Kulonga 20:17

“Utakumbwi ŋanda ya shikamukobonyoko camunyono. Utakumbwi mukamwiine, musha wakwe musankwa nabi mwanakashi, ŋombe shakwe, mbongolo shakwe nabi shintu shakwe shimwi.”

Mika 2:2

Ncakwiila na balisuni myuunda baleebwesa, na balisuni maanda balaabwesa. Balabwesa ŋanda ya muntu mukumwiinda kumaano akubwesa buboni bwakwe mbwaakapyana munshila njemunya.

Mateyo 5:28

Sombi nebo ntoomulwiita ayi uyo woonse ulangilisha mwanakashi calunkumbwa, wacita kale bulale anguwe mumoyo.

Luka 12:15

Lyalo Jesu wakaambila bantu abo ayi, “Amucenjele alimwi mulibaambe ayi mutabi bantu basunishi bubile. Ceebo buumi bwa muntu tabubete mukufula kwa buboni mbwaacite.”

Luka 20:16

Ulaakwisa mukucaya balimi abo akupa bamwi muunda uyo.” Bantu ndibakanyumfwa boobo bakaamba ayi, “Citakacitiki!”

Milimo ya Batumwi 20:33

Nshina kuyandawo kale kubwesa maali nabi cakufwala ca muntu umwi kwiinda mulunkumbwa.

Bene Loma 13:9

Mukwiinga milawo yaamba ayi, “Utaciti bulale, utacaayi, uteepi, utanyumfwili munyono mubyo ceebo ca shintu nshaacite” aimwi yoonse, ilasansululwa mumulawo womwibo waamba ayi, “Suna mubyo bweenka mboolisuni omwiine.”

Bene Loma 3:20

Ceebo taaku muntu ululamikwa pameenso akwe Lesa kwiinda mukucita bwaamba Milawo. Sombi Milawo ilalengeshabo bantu kwishiba ayi babisha.

Bene Loma 3:5

Ono na kutalulama kwesu kulalengesha kubonekela patuba ayi Lesa ulacita shiluleme, inga twaamba buyani pacikani ici? Sa inga twaamba ayi Lesa taaluleme pakutoombolosha akutupa mulandu? (Apa ndaamba bweenka bwaamba bantu.)

Bene Loma 4:1

Ono twaambe buyani pali Abulaamu mushali wesu mukulukulu sobaJuda? Nciinshi cakacitika pacikani ici?

Bene Loma 4:15

Milawo ilalengesha Lesa kupa milandu bantu, sombi na taaku Milawo, taaku muntu weenga weesotoka.

Bene Loma 5:20

Lesa wakapa bantu Milawo kwaamba ayi babone kufula kwa shibiibi shabo. Nakubi boobo shibiibi ndishakafula, luse lwakwe Lesa lwakeendaawo kufula.

Bene Loma 6:15

Ino ono cili buyani cikani ici? Sa tunoobishabo ceebo tatweendeleshekwi aMilawo, sombi aluse lwakwe Lesa? Kulaalebo!

Bene Loma 7:11

Ceebo bubi bwakacana nshila muMilawo alimwi kwiinda muMilawo bwakambeca akuncaya.

Bene Loma 7:13

Sa ici cilaamba ayi cintu cibotu ici ncecakanengesha ayi mfwe? Sobwe! Sombi mbubi bwakalengesha kwiinda mukusebensesha cintu cibotu ico kwaamba ayi bubi buboneke mbuli mbobubete. Aboobo kwiinda muMilawo bubi bulabicila limwi.

Bene Loma 7:5

Ceebo nditwakalinga kwikala mubuumi bwa buntu, kuyandishisha kubisha uko kwakayuminishikwa aMilawo, kwakalinga kweendelesha buumi bwesu. Aboobo kwakatuletela lufu.

Bene Loma 7:8

Sombi kwiinda muMilawo iyi, bubi bwakacana nshila yakulengesha miyeeyo yakukumbwa shintu shimwi shoonse muli ndime. Ceebo na taaku Milawo, bubi tabucite nkusu.

1 Bene Kolinto 15:56

Lubola lwa lufu ncibiibi alimwi cipa nkusu cibiibi, njiMilawo.

Bene Efeso 5:3

Ceebo muli bana bakwe Lesa, bufuule, kucita shintu shitaluleme alimwi akukumbwa camunyono shintu sha bamwi bantu, tasheelete kwaambwa pakati kanu, sobwe.

Dutolonomi 5:21

“ ‘Utakumbwi mukamwiine camunyono. Utakumbwi camunyono ŋanda ya shikamukobonyoko, muunda wakwe, musha wakwe musankwa nabi mwanakashi, ŋombe shakwe, mbongolo shakwe nabi shintu shakwe shimwi.’

Bene Kolose 3:5

Amucaye lunkumbwa loonse lwa mucishi ca panshi ulo luli muli ndimwe, mbuli bufuule, kucita shintu shitaluleme, lunkumbwa lubiibi, miyeeyo ibiibi alimwi abupambi. Mukwiinga kupamba akwalo kulikoshenye akulambila shibumbwabumbwa.

1 Bene Tesalonika 4:5

kuteshi mulunkumbwa lwa mubili anga mbantu bakunsengwe bateshi Lesa.

Bene Ebulu 7:19

Mukwiinga Milawo yakwe Mose taikwe kululika muntu nabi womwi. Sombi bulya tulicite kulangila kwiindaawo kubota uko kutusenya kufwaafwi aLesa.

Joshuwa 7:21

pashintu isho nshetwakabwesa, ndakabonawo cakufwala ca peculu cibotu abuumbi ca kuBabiloni, makilogilamu obilo a silifa alimwi acipimpita ca golodi cakalinga kulema musa wa kilogilamu. Ndakakumbwa shintu isho akushibwesa. Anu ndakashifukila mutente yangu, silifa njeili panshi peene.”