Bene Efeso 2:15 - Baibo Busansulushi Bwa Libuku Ili

¹⁵ Lakwe wakamanisha Milawo akwiisha koonse kwa baJuda ayi pamishobo yobilo ilya, apange mushobo womwi muli nguwe akuleta luumuno munshila yeeyo.

Bene Efeso 2:15 Marejeleo ya Msalaba

Isaya 9:6

Ceebo mwaana washalwa pakati kesu, ee, twapekwa mwaana musankwa. Bweendeleshi boonse bulaakuba mumaansaakwe. Liina lyakwe unanokwiitwa ayi, “Shikupanda maano Mubotu,” “Lesa Shinkusu shoonse,” “Mushali musankwa wamuyayaya,” alimwi ayi, “Mwaami wa Luumuno.”

2 Bene Kolinto 5:17

Aboobo na muntu waba muli Klistu ulaba abuumi bupya. Shikulukulu shamana, nkokwaamba ayi shoonse shaba shipya.

Bene Galatiya 3:10

Paceebo ceeco, boonse abo basuni kululamikwa pameenso akwe Lesa kwiinda mukukonkela Milawo, balishinganishitwe. Mukwiinga Malembo akwe Lesa alaamba ayi, “Uyo woonse utaciti shoonse shilembetwe muMilawo yakwe ulishinganishitwe kuli Lesa.”

Bene Galatiya 3:28

Aboobo taapu bupusano buliiwo pakati ka baJuda abaswamashi bakunsengwe, pakati ka basha alimwi abaangulukite nabi pakati ka basankwa alimwi abanakashi ceebo noonse muli womwi muli Klistu Jesu.

Bene Galatiya 6:15

Mukwiinga kupalulwa nabi kutapalulwa taaku mbokubeteewo, sombi cintu cinene nkuba abuumi bupya.

Bene Efeso 2:10

Ceebo cakuba muli Klistu, Lesa wakalengesha ayi tube mbotubete bulya, kwaamba ayi tucite milimo ibotu iyo Lesa njaakabambilabo limwi ayi twiiciite.

Bene Efeso 2:14

Mukwiinga Klistu mwiine wakatupa luumuno pakuleta baJuda alimwi abaswamashi bakunsengwe pantu pomwi ayi babe mushobo womwi. Ndyaakalyaaba, wakamwaya lubumbu lwakalinga kutupansaanya.

Bene Efeso 2:16

Klistu wakafwa pamucilingano ayi amanishe lupato lwakalingaawo pakati ka mishobo yobilo ilya ayi apange mubili womwi. Mukucita boobo, wakababoosha pantu pomwi aLesa.

Bene Efeso 4:16

Lakwe ngooendelesha shipansha shoonse sha mubili akushicatanya pantu pomwi. Ono na cipansha cili coonse casebensa mulimo wa ncico, mubili woonse ulakula akuliyaka mulusuno.

Bene Kolose 2:14

Wakashiminganya milandu yesu alimwi aMilawo ya njiyo yoonse, akwiimanisha kwiinda mukwiipopa pamucilingano.

Bene Kolose 2:20

Mwebo mwakafwa pantu pomwi aKlistu, aboobo tamubeteko lubasu kushintu sha kwishibila kwa mucishi ca panshi. Ceebonshi mucicita anga mbantu bacite buumi bwa mucishi? Ceebonshi mulakonkela milawo yakwaamba ayi,

Bene Kolose 3:10

akwinjila mubuumi bupya. Buumi ubu Mulengi wanu utoobubotesha lyoonse mucikoshanyo cakwe kwaamba ayi mumwishibe kabotu.

Bene Kolose 3:11

Mubuumi bupya ubu taaku bupusano buliiwo pakati ka baJuda abaswamashi bakunsengwe, bakapalulwa abatana kupalulwa, batacite lushibo, beshinkondo baloondesha, pakati ka basha abaangulukite, sombi cinene nguKlistu mukwiinga lakwe nsheshoonse alimwi uli muboonse.

Bene Kolose 3:15

Luumuno Klistu ndwaapa, alweendeleshe myoyo yanu. Lesa wakamwiita kwaamba ayi mube aluumuno ndomunya ulu mukwiinga muli shipansha sha mubili womwi. Amube amyoyo yakulumba.

Bene Ebulu 7:16

Lakwe taakwe kuba mupailishi kwiinda mumilawo yaamba palunyungu mwaakashalwa, sombi wakaba mupailishi kwiinda munkusu sha buumi bwakwe butamaani.

Bene Ebulu 8:13

Kwiinda mumaswi akwaamba ayi, “Cipangano cipya,” Lesa walengesha ayi cipangano citaanshi cibule mulimo. Ono na cintu coonse cabula mulimo alimwi cakubuluka, ingayi cili pafwaafwi kuloba.

Bene Ebulu 9:23

Nkokwaamba ayi shintu isho shakalinga kwiimikanina shancinencine sha kwiculu, mboshakalinga kusalashikwa ubo. Sombi shintu sha kwiculu shiine kwaamba ayi shisalashikwe, kulayandika milambu yiinda payeeyo yakalinga kwiimikaninwa.