Amosi 2:15 - Baibo Busansulushi Bwa Libuku Ili

¹⁵ Beshimata teshi bakakonshe kwiimikana. Bashilumamba beendaawo lubilo teshi bakaciceewo, napaceyi. Ncakwiila abeshimaaki teshi bakafunewo buumi bwabo.

Amosi 2:15 Marejeleo ya Msalaba

Shikushimikila 9:11

Kuli acimwi cintu ncendakabona pacishi ca panshi. Mulubilo lwakushiyana teshibo baabo boobite kumyeendo bashiya bamwi. Teshibo bayumu bakoma munkondo. Teshi basongo bacana shakulya lyoonse. Teshi bacenjete bacana buboni lyoonse alimwi teshi beeite basumpuka lyoonse, sombi boonse balashamwa pashiindi shipusenepusene.

Isaya 31:3

Bene Ijipiti teshi balesa, mbantubo. Aalo Maaki abo taacite nkusu sha bulesa. Aboobo bushiku Mwaami Lesa aakutondesha bukali bwakwe mushobo uyumu ulaakunyonyoolwa akulobeshekwa pantu pomwi amushobo uyo ucafwikwa kuli nguwo.

Jelemiya 51:56

Shikunyonyoola ulaakulwana Babiloni. Bashilumamba bene Babiloni balaakucatwa amata abo alaakutyoloolwa. Ceebo nebo neMwaami Lesa ndi Lesa uboosha cishole. Ncakwiila ndaakuboosha cishole kweelana ambobakacita.

Esekelo 39:3

Kuswawaawo ndaakuuma buta bwako kuswa kulyaansa lyako lyacipiko akulengesha mifwi ili kulyaansa lyalulyo kuloka.

Amosi 9:1

Ndakabona Mwaami Lesa kaaimfwi pacipaililo. Wakaamba ayi, “Amuume macinko a Ŋanda yakwe Lesa kwaamba ayi cipinda cakumwinjililo coonse citenkaane. Mwaawishile pamitwi ya bantu. Taaku nabi womwi eshi akaloboke, ee, taaku nabi womwi eshi akapuluke.

Agayi 2:22

Ndaakunyonyoola bamaami amalelo a bakunsengwe akumanisha nkusu sha ngawo. Ndaakusandamuna shikoci shabo abaabo beshikusheensha. Maaki abo alaakumana kufwa abalo abeshikwaatanta balaakucayana beene abeene.”

Sekaliya 10:5

Boonse pantu pomwi balaakuba anga mbashilumamba beshinkusu abo balyatoola balwani babo kubapisha mumatipa mumikwakwa. Ceebo cakwaamba ayi nebo neMwaami Lesa ndi ambabo, balaakunoolwana akukoma balwani babo beshimaaki.