1 Samwelo 21:5 - Baibo Busansulushi Bwa Libuku Ili

⁵ Defedi wakakumbula ayi, “Ee, tulalitalamusha kubalutundu lyoonsebo na tulicite lweendo naluceyi. Ono inga twabulilaanshi kulicata bulya mulweendo lusalalite mbuli loolu!”

1 Samwelo 21:5 Marejeleo ya Msalaba

Kulonga 19:14

Lyalo Mose wakaseluka pakalundu akulwiita bantu ayi balibambile kulambila Lesa. Paceebo ceeci bakacapa shakufwala shabo,

Kulonga 19:15

alimwi Mose wakabaambila ayi, “Isona mukanoolibambite alimwi bulya paciindi ici tamweelete kukumana abamakaanu.”

Kulonga 25:30

Tebulu iyi ilyeelete kutulwa kunembo lya Libokoshi lya Cipangano. Apalo peculu patebulu, palyeelete kunoocanika cimaande cipekwa kuli ndime lyoonsebo.

Bene Lefi 24:9

Shimaande ishi nshakwe Aloni alimwi abamulunyungu lwakwe, alimwi balaakushilita mumusena usalalite mukwiinga ncipansha cisalalite abuumbi ca shakulya shipekwa kuli ndime neMwaami Lesa ayi nsha bapailishi.”

Bene Lefi 8:26

Ndyaakamana kucita boobo, wakabwesa cimaande comwi kuswa mumutaanga wa shimaande shakabengwa kuMwaami Lesa, cimaande comwi cakapangwa amafuta, alimwi acimaande cipampamene comwi akushibika peculu lya mafuta alimwi amweendo wakululyo wakatako.

Milimo ya Batumwi 9:15

Sombi Mwaami wakamwaambila alimwi ayi, “Koyabo mukwiinga ndamusala kwaamba ayi ansebensele akunshibya kubaswamashi bakunsengwe, bamaami alimwi abene Isilaeli.

1 Bene Kolinto 7:5

Tamweelete kukakilana, sombibo na mwasuminishanya kwiimikana kwaciindi ciniini kwaamba ayi mubebo aciindi cakupaila. Camanabo ciindi cakupaila mulyeelete kutalika kukumana alimwi kwaamba ayi Satana atamusunki ceebo cakwaalilwa kulicata.

1 Pita 3:17

Ncibotu kupenshekwa ceebo cakucita shiluleme, na kakuli kuyanda kwakwe Lesa, kwiinda kupenshekwa ceebo cakucita shibiibi.