1 Pita 2:9 - Baibo Busansulushi Bwa Libuku Ili

⁹ Sombi mwebo muli bantu basalitwe, bapailishi ba bwaami, mushobo usalalite alimwi bantu bakwe Lesa. Wakamusala kwaamba ayi mukashimikile shamicito yankusu ya wooyo wakamwiita kuswa kumunshinshe akumwinjisha mumumuni wakwe ukankamika.

1 Pita 2:9 Marejeleo ya Msalaba

Kulumbaisha 106:5

kwaamba ayi nkasangalale mukuswitilila kwa baabo mbomwakasala. Ee, kwaamba ayi anebo nkabeeko lubasu mukusangalala kwa mushobo wanu akumulumbaisha pantu pomwi abantu banu.

Kulumbaisha 118:27

Mwaami Lesa ncakwiila nguLesa, ulatucitila shibotu. Amutalike kusekelela kamucite amalala mumaansa, tibili muye mukashiike akucipaililo.

Kulumbaisha 135:4

Mwaami Lesa wakasala Jakobo kuba wakwe, wakasala Isilaeli ayi mbuboni bwakwe mbwaasunishi.

Kulumbaisha 22:30

Bacishalwa balaakunoosebensela Mwaami Lesa. Bantu balaakulwiita baabo bacisa shaMwaami Lesa uyo.

Kulumbaisha 33:12

Ulicite coolwe mushobo ucite Lesa ayi ngoMwaami Lesa wabo. Ncakwiila mushobo wa bantu abo mbwaakasala kutambula shintu nshaakashomesha.

Kulumbaisha 73:15

Nindakaamba ayi, “Ndaakwaamba bwakaamba bamucita shibi abo,” naakwiinga ndabishisha bantu banu.

Isaya 26:2

Amucalule minjililo ya ndabala kwaamba ayi mushobo ululeme unjile, ee, unjile mushobo uyo ushomeka.

Isaya 41:8

“Sombi mwebo nobene Isilaeli nobasebenshi bangu, nobamulunyungu lwakwe Jakobo, bantu mbondakasala, ee, nobamulunyungu lwakwe Abulaamu mweensuma,

Isaya 42:16

“Ndaakutanjilila boofu munshila nshebatana kwiindaawo. Ndaakusandula munshinshe wabo kuba mumuni akubeelanishisha misena ya mankununkunu kunembo lyabo. Anu ishi nsheshintu nsheshi nkacite, teshi nkabalekelesheewo, sobwe.

Isaya 44:1

Ono Mwaami Lesa waamba ayi, “Amukutike mwebo nobamulunyungu lwakwe Jakobo, nobasebenshi bangu. Amukutike nobene Isilaeli mukowa ngondakasala.

Isaya 61:6

Mulaakunokwiitwa ayi bapailishi ba Mwaami Lesa, ncakwiila basebenshi bakwe Lesa wesu. Buboni bwa mishobo imwi ndimwe mweshi mukanoobulya alimwi mulaakunoosangalala kwaamba ayi buboni ubo mbwanu.

Isaya 62:12

Bantu bakwe balaakunokwiitwa ayi, “Bantu basalalite, Bakalubulwa ba Mwaami Lesa.” Lyalo webo Jelusalemu ulaakunokwiitwa ayi, “Uyo Wakayandoolwa.” Teshi ukeetwewo tubili ayi, “Ndabala yakacaala cisuukila.”

Isaya 66:21

Ndaakusaloolaamo bamwi kuba bapailishi abamwi kucita mulimo wa bene Lefi.” Mwaami Lesa waamba.

Isaya 9:2

Bantu bakalinga kweenda mumunshinshe, babona mumuni unene. Ee, abo bali mumunshinshe ushiya mbi uyoosha, mumuni wabamunikila.

Malaki 3:17

Mwaami Lesa ulaamba ayi, “Balaakuba bantu bangu pabushiku ubo ndyeshi nkaciyeeye. Ncakwiila balaakuba bantu bangu nemwiine. Ndaakubanyumfwila nkumbu, bweenka mushali musankwa mbwaanyumfwila nkumbu mwanaakwe musankwa umusebensela.

Mateyo 4:16

Bantu bakalinga kwikala mumunshinshe bakabona mumuni unene. Abalo abo bakalinga kwikala mucishi ca cimfule ca lufu, mumuni ulaakubamunikila.”

Mateyo 5:16

Mbweeke ubo amwebo amuboneshe mumuni wanu kubantu, kwaamba ayi babone milimo yanu ibotu, akupa bulemu kuli Ishiwanu wa kwiculu.

Luka 1:79

Ulaakumunikila baabo bashiite mumunshinshe amucimfule ca lufu, akututanjilila munshila ya luumuno.”

Joni 17:19

Ceebo ca mbabo ndalibenga kuli ndimwe kwaamba ayi abalo balibeenge calushinisho kuli ndime.

Milimo ya Batumwi 20:28

Nkokwaamba ayi mulyeelete kulilama kabotu nobeene akulama likoto lya bantu abo Mushimu Usalashi mbowakamupa ayi mulame. Amweembele kabotu coonde cakwe Lesa, abo mbwaakapulusha ayi babe baakwe kwiinda mulufu lwa Mwanaakwe.

Milimo ya Batumwi 26:18

Ukabacalule meenso kwaamba ayi babone, ukabakushe mumunshinshe kwaamba ayi benjile mumumuni alimwi akubakusha munkusu shakwe Satana ukabenjishe munkusu shakwe Lesa. Kwiinda mulushomo lwabo muli ndime, Lesa ulaakubalekelela shibiibi shabo akuba amusena pakati ka bantu bakwe Lesa basalitwe.’

Milimo ya Batumwi 26:28

Lyalo mwaami Agilipa wakeepusha Paulo ayi, “Sa utooyeeya ayi mumaswi aniinibo aya inga wansandula kuba mwine Klistu?”

Bene Loma 9:24

Ceebo ndiswe baabo mbaakasala, kuteshi kuswa kumushobo wa baJuda weenka, sombi akubaswamashi bakunsengwe.

1 Bene Kolinto 3:17

Aboobo na muntu wanyonyoola Ŋanda yakwe Lesa alakwe Lesa ulaakumunyonyoola. Ceebo Ŋanda yakwe Lesa ilisalalite alimwi mwebo ndimwe Ŋanda iyo.

Bene Efeso 1:14

Mushimu Usalashi ncecitondesho cakwaamba ayi tulaakutambula shoolwe shoonse nshaakashomesha bantu bakwe. Aboobo tulaba alushomo ayi Lesa ulaakwaangulula cancinencine bantu bakwe. Atulumbaishe bulemu bwakwe!

Bene Efeso 1:6

Atulumbaishe Lesa ceebo ca luse lwakwe luteelekwi kucintu cimwi, ulo ndwaakatutondesha muMwanaakwe uyo ngwaasuni abuumbi.

Bene Efeso 3:21

Coonde acimulemeke kwiinda muli Klistu Jesu mumashalane oonse, lyoonse alyoonse! Ameni.

Dutolonomi 10:15

Ono lusuno lwa Mwaami Lesa pabamashali banu bakulukulu lwakalinga lunene abuumbi, cakwaamba ayi wakasala mwebo kuba bantu bakwe kuleka bamwi boonse alimwi mucili bantu bakwe asunu.

Dutolonomi 14:2

Mwebo muli bantu ba Mwaami Lesa, Lesa wanu. Wakamusala ayi mube bantu bakwe mwiine kuswa pamishobo yoonse ya mucishi ca panshi.

Dutolonomi 18:2

Teshi bakapekweewo cipansha ca cishi mbuli mikowa imwi yoonse. Balo ncebakapekwa ncoolwe cakuba bapailishi ba Mwaami Lesa, Lesa wanu kweelana ambwaakashomesha.

Dutolonomi 4:20

sombi mwebo muli baabo mbwaakapulusha kuswa muIjipiti, umo mwakalingabo anga mumunyumbi. Wakamukushaamo kwaamba ayi mube bantu bakwe mwiine kweelana ambomubete bulya.

Dutolonomi 7:6

Mukacite boobo ceebo muli bantu ba Mwaami Lesa, Lesa wanu, alimwi mulisalalite. Mwaami Lesa wakamusala ayi mube bantu bakwe kuswa pakati ka mishobo imwi yoonse ili pacishi ca panshi ipusenepusene.

Bene Filipi 3:14

Aboobo ndacicila kushika kumeelelesho kwaamba ayi nkatambule cilambu kwiculu ncakatwiitila Lesa kwiinda muli Klistu Jesu.

Bene Kolose 1:13

Wakatukusha munkusu sha munshinshe akutwinjisha muBweene bwa Mwanaakwe usunikwi.

2 Timoti 1:9

Wakatupulusha akutwiita ayi tube bantu bakwe basalalite, kuteshi ceebo ca ceeco ncetwakacita, sombi kwiinda mukuyanda kwakwe mwiine alimwi aluse lwakwe. Luse ulo wakabaalo pali ndiswe kwiinda muli Klistu Jesu ciindi kacitana kutalika.

Taitasi 2:14

Lakwe uyo wakalibenga kutufuna kububi boonse akutusalasha kwaamba ayi tube bantu bakwe beene abo balibambite kucita shibotu.

1 Pita 1:2

Mumiyeeyo yakwe Lesa Ishiwesu wakamusala. Mwakasalashikwa aMushimu Usalashi ayi munoonyumfwila Jesu Klistu akusanshikwa abulowa bwakwe. Luse aluumuno shikomene muli ndimwe lyoonse alyoonse.

1 Pita 2:5

Amwebo mube anga ngamabwe oomi ayo Lesa ngweshi ayakishe ŋanda yakwe ya mushimu. Muŋanda iyo mweshi mukasebensele mbuli bapailishi basalalite mukubenga milambu ya mushimu itambulwa kuli Lesa kwiinda muli Jesu Klistu.

1 Pita 4:11

Uyo woonse ushimikila, ulyeelete kwaamba maswi akwe Lesa. Uyo woonse usebensa milimo mucoonde, ulyeelete kusebensa kweelana ankusu Lesa nshaamupa, kwaamba ayi mushintu shoonse Lesa alemekwe kwiinda muli Jesu Klistu. Bulemu ankusu nshakwe Jesu Klistu lyoonse alyoonse. Ameni.

Ciyubululo 1:6

Lakwe wakatulengesha kuba bamaami ayi tusebensele Lesa Ishi anga mbapailishi. Jesu Klistu apekwe bulemu alimwi ankusu lyoonse alyoonse. Ameni.

Ciyubululo 20:6

Balicite coolwe alimwi balisalalite abo beshi bakataangune kubushikwa kuswa kubafu. Kuli mbabo, lufu lwabili talucite nkusu, sombi balaakuba bapailishi bakwe Lesa alimwi aKlistu. Lyalo balaakweendelesha pantu pomwi anguwe kwamyaaka ili cuulu.

Ciyubululo 5:10

Wakalengesha kwaamba ayi babe bamaami, kwaamba ayi basebensele Lesa wesu anga mbapailishi, aboobo balaakweendelesha mucishi ca panshi.”

1 Samwelo 12:22

Mwaami Lesa wakashomesha cakulumbila ayi teshi akamushiyeewo mukwiinga cakamukonda kwaamba ayi mwebo mube bantu bakwe.