1 Bene Kolinto 4:5 - Baibo Busansulushi Bwa Libuku Ili

⁵ Aboobo mutoomboloshi muntu nabi womwi kushikila Jesu Klistu akese mukoombolosha. Lakwe aakwisa ulaakuyubulula shabushishi bwa mumunshinshe alimwi ulaakubika patuba miyeeyo ya mumyoyo ya bantu. Lyalo Lesa ulaakulumbaisha muntu woonse kweelana ambwaaelete.

1 Bene Kolinto 4:5 Marejeleo ya Msalaba

Jobo 12:22

Ulayubulula shishisitwe sha mumunshinshe ushiya mbi akubika patuba isho shakalinga kufukilitwe panshi peene.

Tushimpi 12:8

Na muntu ulicite busongo, bantu balamulumbaisha, sombi na muntu taacite maano, bantu balamusebaanya.

Shikushimikila 11:9

Ocikula bwangu, kosangalala koocili mwanike. Moyo wako kaukupa kusangalala koocili cikula bwangu. Kokonkela ciyanda moyo wako alimwi acili coonse meenso ako ncaabona. Sombi koshiba ayi shintu shoonse ishi Lesa ulaakukoombolosha.

Shikushimikila 12:14

Ceebo Lesa ulaakoombolosha micito yoonse, kubikaawo ashintu shicitwa mubushishi, ncakwiila micito ibotu nabi ibiibi.

Jelemiya 16:17

Nshila shabo shoonse ndishibwene. Shilibo patuba kuli ndime alimwi taaku shibiibi shabo shiyubite pameenso angu.

Jelemiya 23:25

“Ndanyumfwa balaluki nshebaamba abo balaluka shabubeshi muliina lyangu. Balaamba ayi, ‘Ndaloota! Ndaloota!’

Osiya 8:13

Balabenga milambu kuli ndime akulya nyama ya njiyo. Sombi nebo neMwaami Lesa mumilambu iyo nshisangalaliliimo. Ono bulya ntokwiibaluka shibiibi shabo akubapa mulandu ceebo ca nshisho. Ndaakubaboosha kucishi ca Ijipiti.

Malaki 3:18

Paciindi ico bantu alimwi balaakubona bupusano buli pakati ka bantu baluleme abataluleme, bansebensela alimwi abatansebenseli.”

Mateyo 10:26

“Aboobo mutaloondi bantu. Taaku cintu cifweketwe ceshi cikabule kufwekulwa, nabi cishisitwe ceshi cikabule kushibikwa.

Mateyo 24:30

Lyalo kulaakuboneka citondesho ca MwanaaMuntu mwiculu, mpeeke bantu ba mishobo yoonse ya pacishi ca panshi balaakulila, ndyeshi bakabone MwanaaMuntu keesa mumakumbi ankusu alimwi abulemu bukankamika.

Mateyo 24:46

Ulicite coolwe musebenshi uyo Mwaami wakwe ngweshi akacane kaasebensa boobo.

Mateyo 25:21

Mwaami wakwe wakamwaambila ayi, ‘Wakacita kabotu, omusebenshi mubotu ushomeka. Ceebo washomeka pashintu shiniini, ono ntookupa mulimo wakulama shintu shiinji. Kosa usangalale akusekelela pantu pomwi anebo nemwaami wako.’

Mateyo 25:23

Mwaami wakwe wakamwaambila ayi, ‘Wakacita kabotu, omusebenshi mubotu ushomeka. Ceebo washomeka pashintu shiniini, ono ntookupa mulimo wakulama shintu shiinji. Kosa usangalale akusekelela pantu pomwi anebo nemwaami wako.’

Luka 6:37

“Mutoomboloshi bamwi kwaamba ayi amwebo Lesa atakamoomboloshi. Mutapi muntu mulandu kwaamba ayi mutapekwi mulandu amwebo. Sombi amumulekelele, Lesa alakwe ulaakumulekelela.

Joni 21:22

Jesu wakakumbula ayi, “Ino na kaansuni kwaamba ayi uyu anoolibo muumi kushikila nkese, sa ngumulandu wako uyo? Nkonkelebo!”

Joni 21:23

Aboobo mpuwo yakanyumfwika kubashoma muli Jesu boonse ayi shikwiiya uyo teshi akafwe. Sombi Jesu taakwe kwaamba ayi teshi akafwe, sobwe. Wakaamba ayi, “Ino na kaansuni kwaamba ayi uyu anoolibo muumi kushikila nkese, sa ngumulandu wako uyo?”

Joni 5:44

Ino ono inga mwashoma buyani na mulisunibo kulilumbaisha nobeene, sombi kamutasuni ayi mulumbaishikwe kuli Lesa womwibo eenka?

Bene Loma 14:4

Tooelete kubona musebenshi wa muntu umwi ayi utoobisha. Ngumwaami wakwe mwiine ngweenga wakonsha kwishiba na wacita kabotu nabi tau. Kwalo ndishi kwaamba ayi ulaakucita kabotu mukwiinga Lesa ulaakumuyumya.

Bene Loma 2:1

Omweensuma, webo nowoombolosha babyo, taaku mpweshi ukayubile mulandu, nabi ubaani. Ceebo ndiwoombolosha bamwi pabubi bweenka mboocita, awebo utolishinina omwiine.

Bene Loma 2:16

Mbweekoobo mbweshi cikabe pabushiku Lesa ndyeshi akoomboloshe bantu kwiinda muli Jesu Klistu pasheesho nshebayeeya beene, kweelana aMakani Abotu aya ngoonshimikila.

Bene Loma 2:29

Anu muJuda wancinencine ngooyo muJuda mumoyo. Akwalo kupalulwa kwancinencine nkooko kwa mumoyo kucitikwa aMushimu Usalashi. Kupalulwa uku takucitwi ceebo muntu wacita bwaamba Milawo. Muntu wa mushobo wooyo umulumbaisha nguLesa, teshi bantu, sobwe.

Bene Loma 2:7

Abo batolelela kucita shiluleme, kuyandoola bulemu kuli Lesa, shoolwe alimwi abuumi butamaani, Lesa ulaakubapa buumi ubo.

1 Bene Kolinto 1:7

Paceebo ceeco taaku cipo nabi comwi ca Mushimu ncemutacite bulya ndimutoolindilila kupiluka kwa Mwaami Jesu Klistu.

1 Bene Kolinto 11:16

Ono na kuli weenga wayanda kupikishanya pacikani ici, inga ndaamba ayi swebo tatucite cimwi ncotushibite nabi cishibite bamushoonde shakwe Lesa shoonse.

1 Bene Kolinto 11:26

Ici cilaamba ayi lyoonse ndimulya cimaande akunwita munkomeshi iyi mulaambilisha lufu lwakwe Jesu kushikila akaboole.

1 Bene Kolinto 15:23

Sombi womwi awomwi ulaakubushikwa paciindi cakwe ceelete, Klistu ngowakataanguna, ono aakwisa, mbaabo bamushoma.

1 Bene Kolinto 3:13

Ono Bushiku bwakwisa kwakwe Klistu, milimo ya muntu ilaakuboneka patuba ceebo Bushiku ubo bulaakwiitondesha. Bushiku ubo bulaakwisa amulilo uyo weshi ukeeleshe kubota kwa milimo ya muntu womwi awomwi.

1 Bene Kolinto 3:14

Na cakayaka muntu palwiimbi ulu capuluka mumulilo, muyaki uyo ulaakutambula cilambu.

1 Bene Kolinto 3:8

Aboobo taaku bupusano pali wooyo ushanga autilila ceebo Lesa ulaakulambula womwi awomwi kweelana amilimo njaakacita.

2 Bene Kolinto 10:18

Mukwiinga teshi wooyo ulilumbaisha mwiine utambulwa, sobwe. Sombi ngooyo Mwaami Lesa ngwaalumbaisha.

2 Bene Kolinto 10:9

Nshisuni kuboneka anga ntoomukonga mumakalata ngoomulembela.

2 Bene Kolinto 4:2

Twakaleka shoonse sha bushishi shilensha nsoni. Tatuciti milimo mububeshi nabi kubika bubeshi mumaswi akwe Lesa. Sombi pameenso akwe Lesa tulaamba shalushinisho, akweelesha kulengesha bantu boonse ayi batutambule mumyoyo yabo.

2 Bene Kolinto 5:10

Ceebo soonse tulyeelete kuya mukwiimikana pameenso akwe Klistu ayi atoomboloshe. Muntu woonse ulaakutambula ncaaelete kweelana ashoonse nshaakacita, shibotu nabi shibiibi mubuumi bwa buntu buno.

1 Bene Tesalonika 5:2

Ceebo mwebo nobeene mulishi kale kabotu kwaamba ayi Bushiku bwakwisa kwa Mwaami Jesu, bulaakushikila cakutabwiingashila bweenka mwiipi mbweesa mashiku.

Bene Ebulu 4:13

Taaku cintu nabi comwi cishisitwe pameenso akwe Lesa, sombi shoonse shilengwa ulashibona bweenka mbuli mboshibete alimwi nkuli nguwe nkotweelete kusansulwita shoonse nshetwakacita.

Jemusi 4:11

Nobamakwesu, mutanoofuyana. Uyo ufuya nabi woombolosha mushominyina, ulacobola akoombolosha Milawo yakwe Lesa. Ono na woombolosha Milawo, ingayi wacileka kwiikonkela, akuba shikuyoombolosha.

Jemusi 5:7

Ono mwebo nobamakwesu, amube beshimoyonteeka kushikila Mwaami wesu akese. Amubone mulimi mbwaakomenya moyo kulindila shishango mumyuunda yakwe ayi shicate. Ulalindila mfula itaanshi ayakweelaako camoyonteeka.

Jemusi 5:9

Nobamakwesu, mutanootongookana kwaamba ayi Lesa atakamoomboloshi. Moomboloshi ulibo pafwaafwi kuboneka.

1 Pita 1:7

kwaamba ayi lushomo ndomucite lweeleshekwe akuboneka ayi ndwaalushinisho. Mukwiinga bweenka golodi, ukonsha kunyonyoolwa, mboweeleshekwa mumulilo alushomo ndomucite, ulo lwiinda pagolodi, mbolucitwa mumasunko. Lyalo Lesa ulaakumulumbaisha akumupa bulemu pabushiku Jesu Klistu aakuyubululwa.

1 Pita 5:4

Ono na Mweembeshi Munene akese, mulaakutambula mushini wa bulemu uyo weshi ukabule kumana.

2 Pita 3:12

Mutoolindilila Bushiku bwa Mwaami Lesa alimwi musebense cankusu kwaamba ayi bufwambaane kwisa. PaBushiku ubu, liculu lilaakupya akunyonyoolwa, ashalo sha kwiculu shilaakusunguluka kucikasaashi ca mulilo.

2 Pita 3:4

Balaakwaamba ayi, “Te Klistu wakashomesha ayi ulaakwisa? Ino uli kuli? Bamashali besu bakulukulu bakafwabo kale kale, sombi shintu shoonse shicilibo bweenka mboshakalinga kumatalikilo a cishi!”

Judi 1:14

Mbobaaba mbwaakalaluka Enoki, wasanu abobilo mubushalwe kuswa kuli Adamu, ndyakaamba ayi, “Amubone, Mwaami ulaakwisa abaanjelo bakwe basalalite bali shuulu ashuulu.

Ciyubululo 1:7

Amubone, utoosa amakumbi! Bantu boonse balaakumubona kubikaawo abaabo boonse bakamuyasa. Mishobo yoonse mucishi ca panshi ilaakulila ceebo ca nguwe. Ameni!

Ciyubululo 20:12

Lyalo ndakabona bafu, balemekwa abantubo, boonse kabeemfwi kunembo lya cuuna ca bwaami. Lyalo mabuku akacalulwa alimwi libuku limwi lyakacalulwa, ndyelibuku lya boomi. Bafu bakoomboloshekwa kweelana amicito yabo bweenka mbomwakalinga kulembetwe mumabuku.