1 Bene Kolinto 1:8 - Baibo Busansulushi Bwa Libuku Ili

⁸ Ulaakumuyumya kushikila akumamanino kwaamba ayi pabushiku bwakwisa Mwaami wesu Jesu Klistu mukacanike kamutacite kampenda.

1 Bene Kolinto 1:8 Marejeleo ya Msalaba

Kulumbaisha 37:17

Mukwiinga Mwaami Lesa ulaakuuma bamucita shibi mumanungo ayi bamane nkusu, sombi baluleme ulabeemikanina akubafuninina.

Kulumbaisha 37:28

Mukwiinga Mwaami Lesa ulisuni koombolosha cakutanyengelela, alimwi taalekeleshi bantu bakwe bashomeka. Nkokwaamba ayi lyoonse ulabafuna, sombi bamulunyungu lwa bamucita shibi balaakutandwaamo.

Luka 17:24

Mukwiinga bweenka bubeka mfula mwiculu kuswa kulubasu lumwi kushika kulubasu lumwi, mbweshi kukabe pabushiku bwakwisa MwanaaMuntu.

Luka 17:30

Kulaakuba bweenka ubo pabushiku MwanaaMuntu ndyeshi akayubululwe.

Bene Loma 14:4

Tooelete kubona musebenshi wa muntu umwi ayi utoobisha. Ngumwaami wakwe mwiine ngweenga wakonsha kwishiba na wacita kabotu nabi tau. Kwalo ndishi kwaamba ayi ulaakucita kabotu mukwiinga Lesa ulaakumuyumya.

Bene Loma 16:25

Atulumbaishe Lesa! Lakwe ulicite nkusu shakulengesha ayi mutolelele kushoma Makani Abotu aamba pali Jesu Klistu aya ngoonshimikila. Makani aya ancinencine akayubululwa, akalinga kushishitwe kwamyaaka iinji abuumbi.

Bene Loma 8:19

Shintu shoonse Lesa nshaakalenga shitoolindila abuumbi kuyubululwa kwa bana bakwe.

1 Bene Kolinto 3:13

Ono Bushiku bwakwisa kwakwe Klistu, milimo ya muntu ilaakuboneka patuba ceebo Bushiku ubo bulaakwiitondesha. Bushiku ubo bulaakwisa amulilo uyo weshi ukeeleshe kubota kwa milimo ya muntu womwi awomwi.

1 Bene Kolinto 5:5

mukaabe musankwa uyo kunkusu shakwe Satana kwaamba ayi mubili wakwe unyonyoolwe. Lyalo muuya wakwe ndyeshi ukapulushikwe pabushiku bwakwisa Mwaami Jesu.

2 Bene Kolinto 1:13

Makalata ngotumulembela ngoobu kubelenga akunyumfwa. Nakubi boobo bulya tamunyumfwishishi nshetulemba,

2 Bene Kolinto 1:14

sombi ndishi kwaamba ayi kunembo mulaakushinyumfwishisha. Lyalo pabushiku Mwaami wesu Jesu Klistu ndyeshi akese, noonse mulaakulilumbaisha ceebo cesu aswebo ceebo canu.

2 Bene Kolinto 1:21

Lesa ngowakatulengesha kwaamba ayi swebo amwebo tube bayumu muli Klistu. Peculu lya waawo ngowakatutuma,

Bene Efeso 5:27

Wakasuna ayi coonde cibe caakwe mwiine abulemu bwa ncico, cibe anga ngumuntu utacite kampenda nabi bubi buli boonse, utacite cintu nabi comwi cakumubisha, sombi kacisalalite alimwi kaciluleme.

Bene Filipi 1:10

kwaamba ayi mukakonshe kusala bwikaalo bwiindaawo kubota. Lyalo mulaakwaanguluka kuswa kububi boonse akutumpenda paBushiku ubo aakuboola Klistu.

Bene Filipi 1:6

Ndishinishite kwaamba ayi Lesa wakatalika ncito ibotu muli ndimwe ulaakutolelela akwiimanishisha paBushiku ubo aakuboola Klistu Jesu.

Bene Kolose 1:22

Sombi bulya kwiinda mulufu lwa Mwanaakwe, Lesa walengesha ayi mube beshicibusanyina. Wakacita boobo kwaamba ayi mwiimikane kamusalalite, kamutacite kampenda alimwi kamutacite cibiibi cili coonse pameenso akwe.

Bene Kolose 2:7

Mucinke manungo akuyaka buumi bwanu muli nguwe alimwi muyume mulushomo kweelana ambobakamwiisha. Mulyeelete kunoolumba Lesa lyoonse.

1 Bene Tesalonika 3:13

Lesa Ishiwesu ayumyeyumye myoyo yanu kwaamba ayi mubule kampenda alimwi musalale pameenso akwe, pakwisa Mwaami wesu Jesu abasalalite bakwe boonse.

1 Bene Tesalonika 5:2

Ceebo mwebo nobeene mulishi kale kabotu kwaamba ayi Bushiku bwakwisa kwa Mwaami Jesu, bulaakushikila cakutabwiingashila bweenka mwiipi mbweesa mashiku.

2 Bene Tesalonika 2:2

mutanyonyonganishikwi mumiyeeyo alimwi mutapenshekwi amyoyo pacikani cakwaamba ayi, “Bushiku bwa Mwaami bwashika.” Tacicite mulandu nabi kwaamba ayi maswi aya aswa mubulaluki, nabi ayi akaswa kuli ndiswe nabi munkalata njetwakalemba.

2 Bene Tesalonika 3:3

Sombi Lesa ulashomeka, aboobo utoomuyumyayumya akumufuna kuswa kuMubiibi ulya.

2 Timoti 1:12

Nceceeco ncentoopengela bobulya. Nakubi boobo nshinyumfwi nsoni ceebo ndimwishi uyo ngoonshoma. Aboobo ndishinishite kwaamba ayi ulakonsha kusunga isho shoonse nshaakabika mumaansa angu ayi ndame kushikila bushiku bwakoombolosha.

2 Timoti 1:18

Nkumbu shakwe Lesa shikabe anguwe pabushiku bwakoombolosha. Webo ulishi kale kabotu kufula kwa shintu nshaakancitila muEfeso.

1 Pita 5:10

Pakumana kupenshekwa kwaciindi ciniini, Lesa shiluse loonse, uyo wakamwiita ayi kwiinda muli Klistu mukatambule bulemu bwakwe butamaani, ulaakumubotesha cakumaninina mumushimu. Ulaakumuyumya mulushomo, kumupa nkusu alimwi akumubika palwiimbi luyumu.

2 Pita 3:10

Sombi Bushiku bwakwisa kwa Mwaami, bulaakwisa anga ngumwiipi. PaBushiku ubo, liculu lilaakumana acoongo cinene, shintu shoonse sha kwiculu shilaakupya akunyonyoolwa, acalo cishi ca panshi ashintu shoonse shiliimo shilaakupya.

2 Pita 3:14

Paceebo ceeco nomusunikwi, pakunoolindila kwisa kwa Bushiku ubu, amusebense cankusu kwaamba ayi mukacanike kamuli muluumuno, kamusalalite alimwi kamutacite kampenda pameenso akwe Lesa.