Zaburi 83 - Swahili Revised Union Version - SRUVDC

Sala ya hukumu juu ya adui wa Israeli Wimbo. Zaburi ya Asafu.

¹ Ee Mungu, usistarehe, Ee Mungu, usinyamae, wala usitulie.

² Maana adui zako wanafanya ghasia, Nao wakuchukiao wameviinua vichwa vyao.

³ Juu ya watu wako wanafanya hila, Na kushauriana juu yao uliowaficha.

⁴ Wamesema, Njoni, tuwakatilie mbali wasiwe taifa, Na jina la Israeli halitakumbukwa tena.

⁵ Maana wanashauriana kwa moyo mmoja, Juu yako wanafanyana agano.

⁶ Hema za Edomu, na Waishmaeli, Na Moabu, na Wahagari,

⁷ Gebali, na Amoni, na Amaleki, Na Filisti, nao wanaokaa Tiro,

⁸ Ashuri naye amepatana nao, Wamewasaidia wana wa Lutu.

⁹ Uwatende kama ulivyowatenda Midiani, Sisera, Na Yabini, penye kijito cha Kishoni.

¹⁰ Ambao waliangamizwa Endori; Wakawa samadi juu ya nchi.

¹¹ Uwafanye wakuu wao kama Orebu na Zeebu, Na wakuu wao wote kama Zeba na Zalmuna.

¹² Ambao Walisema, Na tutamalaki makao ya Mungu.

¹³ Ee Mungu, uwafanye kama mavumbi ya kisulisuli, Kama ya makapi mbele ya upepo,

¹⁴ Kama moto uteketezao msitu, Kama miali ya moto iiwashayo milima,

¹⁵ Ndivyo utakavyowafuatia kwa tufani yako, Na kuwafadhaisha kwa dhoruba yako.

¹⁶ Uzijaze nyuso zao fedheha; Ili wapate kulitafuta jina lako, Ee BWANA.

¹⁷ Waaibike, wafadhaike milele, Naam, watahayarike na kupotea.

¹⁸ Wajue ya kuwa Wewe, uitwaye jina lako YEHOVA, Ndiwe peke yako Uliye Juu, juu ya nchi yote.