Zaburi 76 - Swahili Revised Union Version - SRUVDC

Mungu wa Waisraeli – Mungu mkuu Kwa mwimbishaji: kwa ala za nyuzi za muziki. Zaburi ya Asafu. Wimbo.

¹ Katika Yuda Mungu amejulikana, Katika Israeli jina lake ni kuu.

² Kibanda chake pia kiko Salemu, Na maskani yake iko Sayuni.

³ Huko ndiko alikoivunja mishale ya uta, Ngao, upanga, na zana za vita.

⁴ Wewe U mwenye fahari na adhama, Toka milima ya mateka.

⁵ Wametekwa wenye moyo thabiti; Wamelala usingizi; Wala hawakuiona mikono yao Watu wote walio hodari.

⁶ Kwa kukemea kwako, Ee Mungu wa Yakobo, Gari na farasi wameshikwa na usingizi mzito.

⁷ Wewe ndiwe utishaye, naam, Wewe; Naye ni nani awezaye kusimama ukasirikapo?

⁸ Toka mbinguni ulitangaza hukumu; Nchi iliogopa, ikakaa kimya.

⁹ Mungu aliposimama ili kuhukumu Na kuwaokoa wapole wa dunia wote pia.

¹⁰ Maana hasira ya binadamu itakusifu, Masalio ya hasira utajifunga kama mshipi.

¹¹ Wekeni nadhiri na mziondoe Kwa BWANA, Mungu wenu. Wote wanaomzunguka wamletee hedaya, Yeye astahiliye kuogopwa.

¹² Yeye huzikata roho za wakuu; Na kuwatisha wafalme wa dunia.