Zaburi 72 - Swahili Revised Union Version - SRUVDC

Sala ya kumtakia mfalme neema Ya Sulemani

¹ Ee Mungu, mpe mfalme hukumu zako, Na mwana wa mfalme haki yako.

² Atawaamua watu wako kwa haki, Na watu wako walioonewa kwa hukumu.

³ Milimana iwaletee watu amani, Na pamoja na vilima, ilete haki.

⁴ Na atawatetea watu walioonewa, Awaokoe wahitaji, na kumwaangamiza mdhalimu.

⁵ Watakuogopa wakati wote wa kudumu jua, Na wakati wa kung'aa mwezi kizazi hata kizazi.

⁶ Atashuka kama mvua juu ya majani yaliyokatwa, Kama manyunyu yainyweshayo nchi.

⁷ Haki na isitawi wakati wa maisha yake yote, Nayo amani iwepo, hadi mwezi utakapokoma.

⁸ Na awe na enzi toka bahari hadi bahari, Toka Mto hadi miisho ya dunia.

⁹ Wakaao jangwani na wainame mbele zake; Adui zake na warambe mavumbi.

¹⁰ Wafalme wa Tarshishi na visiwa na walete kodi; Wafalme wa Sheba na Seba na watoe vipawa.

¹¹ Naam, wafalme wote na wamsujudie; Na mataifa yote wamtumikie.

¹² Kwa maana atamkomboa mhitaji aliapo, Na mtu aliyeonewa iwapo hana msaidizi.

¹³ Atawahurumia wanyonge na maskini, Na nafsi za wahitaji ataziokoa.

¹⁴ Atawakomboa kutoka kwa maonevu na udhalimu, Maana damu yao ina thamani machoni pake.

¹⁵ Na aishi maisha marefu! Na wampe dhahabu ya Sheba; Na wamwombee daima; Na kumbariki mchana kutwa.

¹⁶ Na uwepo wingi wa nafaka Katika ardhi juu ya milima; Matunda yake na yawayewaye kama ilivyo katika milima ya Lebanoni, Na watu wa mjini wasitawi kama majani ya nchi.

¹⁷ Jina lake na lidumu milele, Pindi ling'aapo jua, umaarufu wake uwepo; Mataifa yote na wabarikiwe katika yeye, Na kumwita heri.

* * *

¹⁸ Na ahimidiwe BWANA, Mungu, Mungu wa Israeli, Atendaye miujiza Yeye peke yake;

¹⁹ Jina lake tukufu na lihimidiwe milele; Dunia yote na ijae utukufu wake. Amina na Amina.

* * *

²⁰ Maombi ya Daudi mwana wa Yese, yamekwisha.