Zaburi 68 - Swahili Revised Union Version - SRUVDC

Sifa na shukrani Kwa mwimbishaji. Ya Daudi. Zaburi. Wimbo.

¹ Mungu na ainuke, adui zake watawanyike, Nao wamchukiao huukimbia uso wake.

² Kama moshi upeperushwavyo, Ndivyo uwapeperushavyo wao; Kama nta iyeyukavyo mbele ya moto, Ndivyo waovu wapoteavyo usoni pa Mungu.

³ Bali wenye haki hufurahi, Na kuushangilia uso wa Mungu, Naam, hupiga kelele kwa furaha.

⁴ Mwimbieni Mungu, lisifuni jina lake, Mwimbieni wimbo yeye apitaye katika mawingu, Jina lake ni YAHU; Shangilieni mbele zake.

⁵ Baba wa yatima na mwamuzi wa wajane, Ni Mungu aliye katika kao lake takatifu.

⁶ Mungu huwapa wapweke makao yao; Huwapa wafungwa uhuru na kuwafanikisha; Bali wakaidi huishi katika nchi kavu.

⁷ Ee Mungu, ulipowaongoza watu wako, Ulipopita nyikani,

⁸ Nchi ilitetemeka Naam, mbingu zilidondoka usoni pa Mungu; Hata Sinai usoni pa Mungu; Mungu wa Israeli.

⁹ Ee Mungu, ulinyesha mvua ya neema; Urithi wako ulipochoka uliutia nguvu.

¹⁰ Watu wako wakafanya makao ya huko; Ee Mungu, kwa wema wako uliwaruzuku walioonewa.

¹¹ Bwana analitoa neno lake; Wanawake watangazao habari ni jeshi kubwa;

¹² Wafalme wa majeshi wanakimbia, wanakimbia; Na mwanamke akaaye nyumbani anagawa nyara.

¹³ Kwa nini kulala mazizini arukapo hua, Mbawa zake ziking'aa kama fedha Na manyoya yake kama dhahabu?

¹⁴ Mwenyezi Mungu alipotawanya wafalme huko, Kulinyesha theluji katika Salmoni.

¹⁵ Ni mlima wa Mungu mlima Bashani, Ni mlima mrefu mlima Bashani.

¹⁶ Enyi milima mirefu, kwani kuutazama kwa wivu Mlima alioutamani Mungu akae juu yake? Naam, BWANA atakaa juu yake milele.

¹⁷ Magari ya Mungu ni elfu ishirini, maelfu kwa maelfu; Bwana yumo kati yao kama katika Sinai, Katika patakatifu.

¹⁸ Wewe umepaa juu, umeteka mateka, Umepewa vipawa katikati ya wanadamu; Naam, hata na wakaidi, BWANA Mungu akae nao.

¹⁹ Na ahimidiwe Bwana, Siku kwa siku hutuchukulia mzigo wetu; Mungu ndiye wokovu wetu.

²⁰ Mungu wetu ni Mungu wa kuokoa; Na njia za kutoka mautini zina YEHOVA Bwana.

²¹ Naam, Mungu atakipasua kichwa cha adui zake, Utosi wenye nywele wa mtu afululizaye kukosa.

²² Bwana alisema, Kutoka Bashani nitawarudisha, Nitawarudisha kutoka vilindi vya bahari;

²³ Uuchovye mguu wako katika damu ya adui zako, Na ulimi wa mbwa zako upate sehemu yake.

²⁴ Ee Mungu, wameiona miendo yako; Miendo ya Mungu wangu, Mfalme wangu, katika patakatifu.

²⁵ Waimbaji hutangulia, nyuma yao wapigao vinanda, Kati ya wanawali wapiga matari.

²⁶ Mhimidini Mungu katika mikutano, Bwana katika makusanyiko ya Israeli.

²⁷ Yuko Benyamini mdogo, mtawala wao; Wakuu wa Yuda, kundi lao; Wakuu wa Zabuloni; Wakuu wa Naftali.

²⁸ Ee Mungu, uziamuru nguvu zako; Ee Mungu, uwe hodari uliyetufanyia makuu.

²⁹ Kwa ajili ya hekalu lako Yerusalemu Wafalme watakuletea hedaya.

³⁰ Mkemee mnyama wa mafunjoni; Kundi la mafahali, na ndama za watu; Hata wanyenyekee na kuleta vipande vya fedha, Uwatawanye watu wapendao vita.

³¹ Masheki watakuja kutoka Misri, Kushi itahimiza kumnyoshea Mungu mikono yake.

³² Enyi falme za dunia, mwimbieni Mungu, Msifuni Bwana kwa nyimbo.

³³ Apandaye mbingu za mbingu za tangu milele; Aitoa sauti yake, sauti ya nguvu.

³⁴ Mhesabieni Mungu nguvu; Enzi yake imo juu ya Israeli; Na nguvu zake ziko mawinguni.

³⁵ Mungu ni mwenye kutisha Kutoka patakatifu pako. Ndiye Mungu wa Israeli; Yeye huwapa watu wake nguvu na uwezo. Na ahimidiwe Mungu.