Zaburi 66 - Swahili Revised Union Version - SRUVDC

Sifa kwa ajili ya wema wa Mungu kwa Israeli Kwa mwimbishaji. Wimbo. Zaburi.

¹ Mpigie Mungu kelele za shangwe, nchi yote,

² Imbeni utukufu wa jina lake, Tukuzeni sifa zake.

³ Mwambieni Mungu, Matendo yako yatisha kama nini! Kwa ajili ya wingi wa nguvu zako, Adui zako watakuja kunyenyekea mbele zako.

⁴ Nchi yote itakusujudia na kukuimbia, Naam, italiimbia jina lako.

⁵ Njoni myaone matendo ya Mungu; Hutisha kwa mambo awatendayo wanadamu;

⁶ Aligeuza bahari ikawa nchi kavu; Katika mto walivuka kwa miguu; Huko ndiko tulikomfurahia yeye.

⁷ Atawalaye kwa uweza wake milele; Ambaye macho yake yanaangalia mataifa; Hebu wanaoasi wasijitukuze nafsi zao.

⁸ Enyi mataifa, mtukuzeni Mungu wetu, Itangazeni sauti ya sifa zake;

⁹ Aliyeiweka nafsi yetu katika uhai, Wala hakuuacha mguu wetu usogezwe.

¹⁰ Kwa maana umetupima, Ee Mungu, Umetujaribu inavyojaribiwa fedha.

¹¹ Ulituingiza ndani ya wavu, Na kuweka viunoni mwetu mzigo uliotulemea.

¹² Uliwapandisha watu Juu ya vichwa vyetu. Tulipitia motoni na majini; Ukatutoa na kutuleta kwenye ufanisi.

¹³ Nitaingia nyumbani mwako na kafara; Nitaondoa kwako nadhiri zangu;

¹⁴ Ambazo midomo yangu ilizinena; Kinywa changu kikazisema nilipokuwa taabuni.

¹⁵ Kafara za vinono nitakutolea, Pamoja na fukizo la kondoo dume, Nitatoa ng'ombe pamoja na mbuzi.

¹⁶ Njoni, sikieni, ninyi nyote mnaomcha Mungu, Nami nitayatangaza aliyonitendea roho yangu.

¹⁷ Nilimwita kwa kinywa changu, Na sifa kuu zilikuwa chini ya ulimi wangu.

¹⁸ Kama ningaliwaza maovu moyoni mwangu, Bwana asingesikia.

¹⁹ Hakika Mungu amesikia; Ameisikiliza sauti ya maombi yangu.

²⁰ Na ahimidiwe Mungu asiyeyakataa maombi yangu, Wala kuniondolea fadhili zake.