Zaburi 65 - Swahili Revised Union Version - SRUVDC

Shukrani kwa mavuno mengi Kwa mwimbishaji. Zaburi ya Daudi. Wimbo.

¹ Ee Mungu, wastahili sifa katika Sayuni, Na kwako Wewe itaondolewa nadhiri.

² Wewe usikiaye maombi, Wote wenye mwili watakujia.

³ Tutakapozidiwa na matendo maovu Wewe utatuondolea uovu wetu.

⁴ Heri mtu yule umchaguaye, Na kumkaribisha akae nyuani mwako. Na tushibe wema wa nyumba yako, Patakatifu pa hekalu lako.

⁵ Kwa mambo ya kutisha utatujibu, Katika haki, Ee Mungu wa wokovu wetu. Wewe uliye tumaini la miisho yote ya dunia, Na la bahari iliyo mbali sana,

⁶ Milima waiweka imara kwa nguvu zako, Huku ukijifunga uweza kama mshipi.

⁷ Watuliza kuvuma kwa bahari, Kuvuma kwa mawimbi yake, Na ghasia za watu;

⁸ Kwa hiyo wakaao mbali kabisa huogopa ishara zako; Milango ya asubuhi na jioni waifurahisha.

⁹ Umeijia nchi na kuisitawisha, Umeitajirisha sana; Mto wa Mungu umejaa maji; Wawapa watu nafaka Maana ndiwe uitengenezaye ardhi.

¹⁰ Matuta yake wayajaza maji; Wapasawazisha palipoinuka, Wailainisha nchi kwa manyunyu; Waibariki mimea yake.

¹¹ Umeuvika mwaka taji la wema wako; Mapito yako yadondoza unono.

¹² Huyadondokea malisho ya nyikani, Na vilima vimejawa na furaha.

¹³ Na malisho yamejawa na kondoo, Na mabonde yamepambwa nafaka, Yanashangilia, na kuimba pamoja kwa shangwe.