Zaburi 6 - Swahili Revised Union Version - SRUVDC

Sala ya kuponywa ugonjwa hatari Kwa mwimbishaji: kwa ala za muziki zenye nyuzi; kulingana na mtindo wa Sheminithi. Zaburi ya Daudi.

¹ BWANA, usinikemee kwa hasira yako, Wala usinirudi kwa ghadhabu yako.

² BWANA, unifadhili, maana ninanyauka; BWANA, uniponye, mifupa yangu imefadhaika.

³ Na nafsi yangu imefadhaika sana; Na Wewe, BWANA, hadi lini?

⁴ BWANA urudi, uniopoe nafsi yangu, Uniokoe kwa ajili ya fadhili zako.

⁵ Maana mautini hapana kumbukumbu lako; Katika kuzimu ni nani atakayekushukuru?

⁶ Nimechoka kwa kuugua kwangu; Kila usiku nakibubujikia kitanda changu; Nililowesha godoro langu kwa machozi yangu.

⁷ Macho yangu yameharibika kwa masumbufu, Na kuchakaa kwa sababu yao wanaoniudhi.

⁸ Ondokeni kwangu, ninyi nyote mtendao uovu; Kwa kuwa BWANA ameisikia sauti ya kilio changu.

⁹ BWANA ameisikia dua yangu; BWANA atayatakabali maombi yangu.

¹⁰ Adui zangu wote wataaibika na kufadhaika, Watarudi nyuma, kwa ghafla wataaibika.