Zaburi 47 - Swahili Revised Union Version - SRUVDC

Utawala wa Mungu juu ya mataifa Kwa mwimbishaji. Ya Wakorahi. Zaburi.

¹ Enyi watu wote, pigeni makofi, Mpigieni Mungu kelele kwa Sauti ya shangwe.

² Kwa kuwa BWANA Aliye Juu, mwenye kuogofya, Ndiye mfalme mkuu juu ya dunia yote.

³ Amewatiisha watu wa nchi chini yetu, Na mataifa chini ya miguu yetu.

⁴ Ametuchagulia urithi wetu, Fahari ya Yakobo ampendaye.

⁵ Mungu amepaa kwa kelele za shangwe, BWANA kwa sauti ya baragumu.

⁶ Mwimbieni Mungu sifa, imbeni sifa; Imbeni sifa kwa mfalme wetu, imbeni sifa.

⁷ Maana Mungu ndiye mfalme wa dunia yote, Imbeni kwa zaburi.

⁸ Mungu ayatawala mataifa, Mungu ameketi katika kiti chake kitakatifu.

⁹ Wakuu wa watu wamekusanyika, Kama watu wa Mungu wa Abrahamu. Maana ngao za dunia zina Mungu, Ametukuka sana.