Zaburi 3 - Swahili Revised Union Version - SRUVDC

Mwamini Mungu katika dhiki Zaburi ya Daudi alipomkimbia mwanawe, Absalomu.

¹ BWANA, watesi wangu wamezidi kuwa wengi, Ni wengi wanaonishambulia,

² Ni wengi wanaoiambia nafsi yangu, Hana wokovu huyu kwa Mungu.

³ Lakini Wewe, BWANA, U ngao yangu pande zote, Utukufu wangu na mwinua kichwa changu.

⁴ Kwa sauti yangu namwita BWANA Naye aniitikia toka mlima wake mtakatifu.

⁵ Nilijilaza na kulala usingizi, kisha ninaamka tena, Kwa kuwa BWANA ananitegemeza.

⁶ Sitayaogopa maelfu na maelfu ya watu, Waliojipanga Juu yangu pande zote.

⁷ BWANA, uinuke, Mungu wangu, uniokoe, Maana umewapiga taya adui zangu wote; Umewavunja meno wasio haki.

⁸ Wokovu ni wa BWANA; Baraka yako na iwe juu ya watu wako.