Zaburi 14 - Swahili Revised Union Version - SRUVDC

Kushutumiwa kwa wasiomwamini Mungu Kwa mwimbishaji. Zaburi ya Daudi.

¹ Mpumbavu husema moyoni, Hakuna Mungu; Wameharibu matendo yao na kuyafanya chukizo, Hakuna atendaye mema.

² Toka mbinguni BWANA aliwachungulia wanadamu, Aone kama yuko mtu mwenye hekima, Amtafutaye Mungu.

³ Wote wamepotoka, wameoza wote pamoja, Hakuna atendaye mema, La! Hata mmoja.

⁴ Je! Wote wafanyao maovu hawajui? Walao watu wangu kama walavyo mkate, Hawamwiti BWANA.

⁵ Hapo ndipo waovu watakaposhikwa na hofu nyingi, Maana Mungu yupo pamoja na kizazi cha haki.

⁶ Mnaiharibu mipango ya mtu mnyonge, Bali BWANA ndiye aliye kimbilio lake.

⁷ Laiti wokovu wa Israeli ungetoka katika Sayuni! BWANA awarudishapo wafungwa wa watu wake; Yakobo atashangilia, Israeli atafurahi.