Zaburi 13 - Swahili Revised Union Version - SRUVDC

Sala ya ukombozi kutoka kwa adui Kwa mwimbishaji. Zaburi ya Daudi.

¹ Ee BWANA, utanisahau hadi lini, hata milele? Hadi lini utanificha uso wako?

² Nitakuwa na wasiwasi rohoni mwangu hadi lini, Nikihuzunika moyoni mchana kutwa? Adui yangu atatukuka juu yangu hadi lini?

³ Ee BWANA, Mungu wangu, uangalie, uniitikie; Uyatie nuru macho yangu, Nisije nikalala usingizi wa mauti.

⁴ Adui yangu asije akasema, Nimemshinda; Watesi wangu wasifurahi ninapoondoshwa.

⁵ Lakini mimi nimezitumainia fadhili zako; Moyo wangu na uufurahie wokovu wako.

⁶ Naam, nitamwimbia BWANA, Kwa kuwa amenitendea kwa ukarimu.