Zaburi 129 - Swahili Revised Union Version - SRUVDC

Sala ya kushindwa kwa adui za Israeli Wimbo wa Kupanda mlima

¹ Mara nyingi wamenitesa tangu ujana wangu, Israeli na aseme sasa,

² Mara nyingi wamenitesa tangu ujana wangu, Lakini hawakuniweza.

³ Wakulima wamelima mgongoni mwangu, Wamefanya mirefu mifuo yao.

⁴ BWANA ndiye mwenye haki, Amezikata kamba zao wasio haki.

⁵ Na waaibishwe, warudishwe nyuma, Wote wanaoichukia Sayuni.

⁶ Na wawe kama majani ya darini Yanyaukayo kabla hayajamea.

⁷ Ambayo mvunaji haujazi mkono wake, Wala mfunga miganda kifua chake.

⁸ Wapitao nao hawasemi, Amani ya BWANA ikae nanyi, Twawabariki kwa jina la BWANA.