Zaburi 110 - Swahili Revised Union Version - SRUVDC

Hakikisho la ushindi kwa mteule wa Mungu Ya Daudi. Zaburi.

¹ Neno la BWANA kwa Bwana wangu, Uketi upande wangu wa kulia, Hadi niwafanyapo adui zako Kuwa chini ya miguu yako.

² BWANA atainyosha toka Sayuni Fimbo ya nguvu zako. Uwe na enzi kati ya adui zako;

³ Watu wako watajitoa kwa hiari, Siku ya uwezo wako; Kwa uzuri wa utakatifu, Tokea tumbo la asubuhi, Unao umande wa ujana wako.

⁴ BWANA ameapa, Wala hataghairi, Ndiwe kuhani hata milele, Kwa mfano wa Melkizedeki.

⁵ Bwana yu mkono wako wa kulia; Atawaponda wafalme, Siku ya ghadhabu yake.

⁶ Atahukumu kati ya mataifa, Ataijaza nchi mizoga; Atawaponda wakuu katika nchi nyingi.

⁷ Atakunywa maji ya mto njiani; Kwa hiyo atakiinua kichwa chake kwa ushindi.