Yobu 4 - Swahili Revised Union Version - SRUVDC

Elifazi anena: Ayubu ametenda dhambi

¹ Ndipo huyo Elifazi, Mtemani, akajibu na kusema,

² Mtu akijaribu kuzungumza nawe, je! Utaona ni vibaya? Lakini ni nani awezaye kujizuia asinene?

³ Tazama, wewe umewafunza watu wengi, Nawe umeitia nguvu mikono iliyokuwa minyonge.

⁴ Maneno yako yamemtegemeza huyo aliyekuwa anaanguka, Nawe umeyaimarisha magoti manyonge.

⁵ Lakini sasa haya yamekufikia wewe, nawe wafa moyo; Yamekugusa, nawe wafadhaika.

⁶ Je! Dini yako siyo tegemeo lako? Na matumaini yako si huo uelekevu wa njia zako?

⁷ Kumbuka, tafadhali, ni nani aliyeangamia akiwa hana hatia? Au ni wapi hao waelekevu walikatiliwa mbali?

⁸ Kama mimi nilivyoona, hao walimao maovu, Na kupanda madhara, huvuna yayo hayo.

⁹ Kwa pumzi za Mungu huangamia. Na kwa kuvuma kwa hasira zake humalizika.

¹⁰ Kunguruma kwake simba, na sauti ya simba mkali, Na meno ya simba wachanga, yamevunjika.

¹¹ Simba mzee huangamia kwa kukosa mawindo, Nao watoto wa simba jike wametawanyika mbalimbali.

¹² Basi, nililetewa neno kwa siri, Sikio langu likasikia manong'ono yake.

¹³ Katika mawazo yaliyotoka katika maono ya usiku, Hapo usingizi mzito uwaangukiapo wanadamu.

¹⁴ Hofu iliniangukia na kutetemeka, Iliyoitetemesha mifupa yangu yote.

¹⁵ Ndipo pepo ilipita mbele ya uso wangu; Na nywele za mwili wangu zilisimama.

¹⁶ Hiyo pepo ilisimama kimya, nisiweze kutambua sura zake, Mfano ulikuwa mbele ya macho yangu; Kulikuwa kimya, nami nilisikia sauti, ikinena,

¹⁷ Je! Binadamu atakuwa na haki kuliko Mungu? Je! Mtu atakuwa safi kuliko Muumba wake?

¹⁸ Tazama, yeye hawategemei watumishi wake; Na malaika wake huwahesabia kosa;

¹⁹ Je! Si zaidi sana hao wakaao katika nyumba za udongo, Ambazo misingi yao i katika mchanga, Hao wanaopondwa kama nondo!

²⁰ Kati ya asubuhi na jioni huvunjwa-vunjwa; Waangamia milele wala hapana atiaye moyoni.

²¹ Je! Kamba ya hema yao haikung'olewa ndani yao? Nao hufa hata bila kuwa na hekima.