Wimbo Ulio Bora 2 - Swahili Revised Union Version - SRUVDC

¹ Mimi ni ua la uwandani, Ni fahirisi ya mabondeni.

² Kama fahirisi kati ya miiba, Kadhalika mpenzi wangu kati ya binti.

³ Kama mpera kati ya miti ya msituni, Kadhalika mpendwa wangu kati ya vijana. Niliketi kivulini mwake kwa furaha, Na matunda yake niliyaonja kuwa matamu.

⁴ Akanileta mpaka nyumba ya karamu, Na bendera yake juu yangu ni mapenzi.

⁵ Nishibisheni zabibu, niburudisheni kwa mapera, Kwa maana nimezimia kwa mapenzi.

⁶ Mkono wake wa kushoto uko chini ya kichwa changu, Nao wa kulia unanikumbatia!

⁷ Nawasihi, enyi binti za Yerusalemu, Kwa paa na kwa ayala wa porini, Msiyachochee mapenzi, wala kuyaamsha, Hata yatakapoona vema yenyewe.

⁸ Sikiliza! Ni mpendwa wangu! Tazama, anakuja, Akiruka milimani, akichachawa vilimani.

⁹ Mpendwa wangu ni kama paa, au ayala. Tazama, asimama nyuma ya ukuta wetu, Achungulia dirishani, atazama kimiani.

¹⁰ Mpendwa wangu alinena, akaniambia, Ondoka, mpenzi wangu, mzuri wangu, uje zako,

¹¹ Maana tazama, majira ya baridi yamepita, Masika imekwisha, imekwenda zake;

¹² Maua yatokea katika nchi, Wakati wa kuimba umefika, Na sauti ya mwigo husikiwa kwetu.

¹³ Mtini wapevusha tini zake, Na mizabibu inachanua, Inatoa harufu yake nzuri; Ondoka, mpenzi wangu, mzuri wangu, uje zako.

¹⁴ Hua wangu, mafichoni mwa jabali, Katika sitara za, magenge Nitazame uso wako, nisikie sauti yako, Maana sauti yako ni tamu na uso wako unapendeza.

¹⁵ Tukamatie mbweha, Wale mbweha wadogo, Waiharibuo mizabibu, Maana mizabibu yetu yachanua.

¹⁶ Mpendwa wangu ni wangu, na mimi ni wake; Hulisha kundi lake penye nyinyoro.

¹⁷ Hata jua lipunge, na vivuli vikimbie, Unigeukie, mpendwa wangu, Nawe uwe kama paa, au ayala, Juu ya milima ya Betheri.