Tobiti 8 - Swahili Revised Union Version - SRUVDC

Tobia atimua jini

¹ Walipokwisha kula wakamwingiza Tobia kwake.

² Naye alipokuwa akienda, akayakumbuka maneno ya Rafaeli, akayatwaa majivu ya ubani, akavitia juu yake moyo na ini vya samaki, akafukiza moshi.

³ Yule jini alipoisikia harufu, akakimbia hata kukimbilia pande za juu za Misri; huko ndiko malaika alikomfunga.

⁴ Na wakiisha kuwamo chumbani wote wawili. Tobia akaondoka kitandani, akasema, Ndugu yangu, ondoka, ili pamoja tumwombe Mungu atuhurumie.

⁵ Ndipo Tobia alipoanza kusema, Ee Mungu wa baba zetu, umehimidiwa; na jina lako takatifu tukufu limehimidiwa milele; mbingu nazo zikuhimidi, pamoja na viumbe vyako vyote.

⁶ Ndiwe uliyemuumba Adamu, ukampa mkewe Hawa, ili awe msaidizi na tegemeo; na kwao umetoka uzao wote wa wanadamu. Nawe ukasema, Si vema mwanamume akae peke yake; na tumfanyizie msaidizi wa kufanana naye.

⁷ Na sasa, Ee BWANA, simtwai huyu ndugu yangu kwa ajili ya tamaa, bali katika kweli. Uamuru nirehemiwe, hata niwahi kuona uzee pamoja naye.

⁸ Sara akasema pamoja naye, Amin.

⁹ Basi usiku ule wakalala usingizi wote wawili. Ragueli akaondoka mapema, akaenda akachimba kaburi;

¹⁰ akasema, Huenda huyu naye atakufa.

¹¹ Ragueli akarudi nyumbani, akamwambia mkewe Edna,

¹² Tuma mjakazi mmoja, amtazame kama yu hai. La! Amekufa, na tumzike; wala asijue mtu yeyote.

¹³ Basi yule mjakazi akaufungua mlango, akaingia; akawakuta wote wawili wamelala.

¹⁴ Akatoka akawaambia ya kwamba yu hai.

¹⁵ Mara Ragueli akamhimidi Mungu, akasema, Ee Mungu, umehimidiwa kwa sifa zote zilizo safi takatifu; kwa hiyo watakatifu wakuhimidi, pamoja na viumbe vyako vyote, na malaika wako wote; na wateule wako wote wakuhimidi milele.

¹⁶ Wewe umehimidiwa kwa kuwa umenifurahisha; wala yale niliyoyahofu hayakunipata; bali umetutendea sawasawa na rehema zako nyingi.

¹⁷ Wewe umehimidiwa kwa kuwa umewarehemu wawili hawa, walio watoto pekee wa wazazi wao. Ee BWANA, uwajalie rehema, ili waimalize maisha yao katika afya, pamoja na furaha na rehema.

¹⁸ Kisha Ragueli akawaamuru watumishi wake walifukie kaburi.

Karamu ya harusi

¹⁹ Akaifanya karamu ya arusi yao siku kumi na nne.

²⁰ Na kabla ya kuisha siku za karamu ya arusi, Ragueli akamwapisha Tobia asiondoke hata siku zile kumi na nne za karamu ya arusi zitimie.

²¹ Baadaye aitwae nusu ya mali zake zote, aende salama kwa baba yake; akasema, Na iliyobaki utapewa nitakapokufa mimi na mke wangu.