Tobiti 12 - Swahili Revised Union Version - SRUVDC

Malaika wa Rafaeli

¹ Halafu yake Tobiti akamwita mwanawe Tobia, akamwambia, Mwanangu, angalia mtu huyu aliyefuatana nawe alipwe mshahara wake, na lazima uongeze.

² Akamwambia, Baba, si hasara kwangu kumpa nusu ya zile mali nilizozileta.

³ Kwa maana amenirudisha kwako salama; akamponya mke wangu; akaniletea ile fedha; akakuponya na wewe pia.

⁴ Mzee akasema, Ni haki.

⁵ Basi akamwita malaika, akamwambia, Afadhali sana wewe utwae nusu ya yote mliyoleta.

Rafaeli atoa maonyo

⁶ Ndipo alipochukua wote wawili kwa faragha, akawaambia, Mhimidini Mungu, na kumshukuru, na kumwadhimisha; na kumpa shukrani mbele ya wote walio hai kwa mambo yote aliyowatendeeni. Ni vema kumhimidi Mungu na kulikuza jina lake; na kuyatangaza kwa heshima matendo ya Mungu. Basi msilegee katika kumshukuru.

⁷ Ni vema kuisetiri siri ya mfalme, bali kuyafunua kwa utukufu matendo ya Mungu. Mtende yaliyo mema, na mabaya hayatawapata.

⁸ Bora ni kusali pamoja na kufunga na kutoa sadaka za haki. Kidogo pamoja na haki ni bora kuliko wingi pasipo na haki. Yafaa kutoa sadaka kuliko kuweka akiba ya dhahabu.

⁹ Sadaka huokoa na mauti, nazo zitasafishia mbali dhambi zote. Watoao sadaka na kutenda haki watajaa uzima,

¹⁰ bali watendao dhambi ni adui za uhai wao wenyewe.

Kujitambulisha kwa Rafaeli

¹¹ Hakika sitawaficheni neno. Nimesema, Ni vema kuisetiri siri ya mfalme, bali kuyafunua kwa utukufu matendo ya Mungu.

¹² Basi hapo mliposali, wewe na mkweo Sara mimi niliupeleka ukumbusho wa sala zenu mbele zake Aliye Mtakatifu; na hapo ulipowazika wafu, nilikuwapo pamoja nawe vile vile.

¹³ Na hapo usipokawia kuondoka na kuacha chakula chako, ili uende kumzika yule mfu, tendo lako jema halikufichwa kwangu; lakini nilikuwapo pamoja nawe.

¹⁴ Na sasa Mungu amenituma ili niwaponye, wewe na mkweo Sara.

¹⁵ Mimi ndimi Rafaeli, mmojawapo wa malaika watakatifu saba, wapelekao sala za watakatifu, na kuingia mbele za utukufu wake Aliye Mtakatifu.

¹⁶ Mara wakafadhaika wote wawili, wakaanguka kifudifudi; kwa maana waliogopa.

¹⁷ Akawaambia, Msiogope, amani kwenu, mhimidini Mungu milele.

¹⁸ Maana sikuja kwa hisani yangu, bali nilikuja kwa mapenzi ya Mungu wetu. Kwa hiyo mhimidini Yeye milele.

¹⁹ Siku hizi zote nilionekana nanyi, lakini sikula wala sikunywa, ila ninyi mliona njozi.

²⁰ Sasa mshukuruni Mungu; kwa kuwa mimi ninapaa kwake aliyenituma; nanyi andikeni katika kitabu mambo yote yaliyotendeka. Nao walipoondoka hawakumwona tena.

²¹ Wakayakiri matendo makuu ya ajabu ya Mungu, na jinsi Malaika wa BWANA alivyowatokea.