1 Wakorintho 16 - Swahili Revised Union Version - SRUVDC

Michango kwa watakatifu

¹ Kuhusu ile michango kwa ajili ya watakatifu, kama vile nilivyoamuru makanisa ya Galatia, nanyi fanyeni vivyo hivyo.

² Siku ya kwanza ya juma kila mmoja wenu na aweke akiba kwake, kwa kadiri ya kufanikiwa kwake; ili kwamba michango isifanyike hapo nitakapokuja;

³ nami nitakapofika nitawatuma kwa barua wale mtakaowachagua, wachukue hisani yenu mpaka Yerusalemu.

⁴ Na kama ikifaa niende na mimi, watasafiri pamoja nami.

Mipango ya usafiri

⁵ Lakini nitakuja kwenu, nikiisha kupita kati ya Makedonia; maana napita kati ya Makedonia.

⁶ Labda nitakaa kwenu; naam, labda wakati wote wa baridi, mpate kunisafirisha kokote nitakakokwenda.

⁷ Maana sipendi kuonana nanyi sasa, katika kupita tu, kwa sababu natarajia kukaa kwenu muda kidogo, Bwana akinijalia.

⁸ Lakini nitakaa Efeso hadi siku ya Pentekoste;

⁹ kwa maana nimefunguliwa mlango mkubwa wa kufaa sana, na wako wengi wanipingao.

¹⁰ Lakini, Timotheo akija, angalieni akae kwenu pasipo hofu; maana anaifanya kazi ya Bwana vile vile kama mimi mwenyewe;

¹¹ basi mtu yeyote asimdharau, lakini msafirisheni kwa amani, ili aje kwangu; maana ninamtazamia pamoja na ndugu zetu.

¹² Lakini kuhusu Apolo, ndugu yetu, nilimsihi sana aje kwenu pamoja na hao ndugu; ambaye si mapenzi yake kwenda sasa; lakini atakuja atakapopata nafasi.

Wasia wa mwisho na salamu

¹³ Kesheni, simameni imara katika imani, iweni na ujasiri, mkawe hodari.

¹⁴ Mambo yenu yote na yatendeke katika upendo.

¹⁵ Tena ndugu, nawasihi; (mnawajua watu wa nyumbani mwa Stefana kwamba ni malimbuko ya Akaya, nao wamejitia katika kazi ya kuwahudumia watakatifu);

¹⁶ watiini watu kama hawa, na kila mtu afanyaye kazi pamoja nao, na kujitaabisha.

¹⁷ Nami nafurahi kwa sababu ya kuja kwao Stefana na Fortunato na Akaiko; maana hawa wamenikirimia kwa wingi yale niliyopungukiwa kwenu.

¹⁸ Maana wameniburudisha roho yangu, na roho zenu pia; basi wajueni sana watu kama hao.

¹⁹ Makanisa ya Asia wawasalimu. Akila na Priska wawasalimu sana katika Bwana, pamoja na kanisa lililoko ndani ya nyumba yao.

²⁰ Ndugu wote wawasalimu. Salimianeni kwa busu takatifu.

²¹ Hii ni salamu yangu Paulo kwa mkono wangu mwenyewe.

²² Mtu awaye yote asiyempenda Bwana, na awe amelaaniwa. Maranatha.

²³ Neema ya Bwana Yesu na iwe pamoja nanyi.

²⁴ Pendo langu na liwe pamoja nanyi nyote katika Kristo Yesu.