1 Mambo ya Nyakati 14 - Swahili Revised Union Version - SRUVDC

Daudi ajiimarisha katika Yerusalemu

¹ Naye Hiramu, mfalme wa Tiro, akatuma wajumbe kwa Daudi, akampelekea na mierezi, na waashi, na maseremala, ili wamjengee nyumba.

² Daudi akajua ya kwamba BWANA amemweka imara ili atawale Israeli, na kwamba milki yake imetukuka zaidi kwa ajili ya watu wake Israeli.

³ Tena Daudi akazidi kuoa wake huko Yerusalemu; akazidi kuzaa wana na binti.

⁴ Na haya ndiyo majina ya watoto aliozaliwa huko Yerusalemu; Shamua, na Shobabu, na Nathani, na Sulemani;

⁵ na Ibhari, na Elishua, na Elpeleti;

⁶ na Noga, na Nefegi, na Yafia;

⁷ na Elishama, na Eliada, na Elifeleti.

Kushindwa kwa Wafilisti

⁸ Wafilisti waliposikia ya kwamba Daudi ametiwa mafuta ili awe mfalme wa Israeli wote, Wafilisti wote wakapanda kumtafuta Daudi; naye Daudi akasikia, akatoka nje kupigana nao.

⁹ Basi hao Wafilisti walikuwa wamekuja na kujitawanya katika bonde la Warefai.

¹⁰ Daudi akamwuliza Mungu, akisema, Je! Nipande juu ya Wafilisti! Utawatia mikononi mwangu? Naye BWANA akamwambia, Panda; kwa kuwa nitawatia mikononi mwako.

¹¹ Basi wakapanda mpaka Baal-perasimu, Daudi naye akawapiga huko; Daudi akasema, BWANA amewafurikia adui zangu kwa mkono wangu, kama mafuriko ya maji. Basi wakapaita mahali pale jina lake Baal-perasimu.

¹² Nao wakaiacha miungu yao huko; naye Daudi akaamuru, ikateketezwa kwa moto.

¹³ Lakini hao Wafilisti wakajitawanya tena mara ya pili bondeni.

¹⁴ Na Daudi akamwuliza Mungu tena; naye Mungu akamwambia, Hutapanda kuwafuata; zunguka mbali nao, na kuwajia ukielekea miforsadi.

¹⁵ Kisha itakuwa utakapoisikia sauti ya kwenda katika vilele vya miforsadi, ndipo utakapokwenda nje vitani; kwa maana ndipo Mungu ametoka mbele yako, awapige jeshi la Wafilisti.

¹⁶ Daudi akafanya kama vile Mungu alivyomwamuru; wakawapiga jeshi la Wafilisti toka Geba mpaka Gezeri.

¹⁷ Sifa za Daudi zikafika nchi zote; naye BWANA akawaletea mataifa yote hofu yake.