Mathayo 8 - New Testament in Swahili (Zanzibar) Revised Edition 1921

¹ ALIPOSHUKA mlimani, makutano mengi walimfuata.

² Akaja mwenye ukoma akamsujudu, akinena, Bwana, ukitaka, waweza kunitakasa.

³ Yesu akanyosha mkono wake, akamgusa, akinena, Nataka: takasika. Marra ukoma wake ukatakasika.

⁴ Yesu akamwambia, Angalia, usimwambie mtu; illa enenda zako, ukajionyeshe kwa kuhani, utoe sadaka kama alivyoamuru Musa, iwe ushuhuda kwao.

⁵ Hatta Yesu alipoingia Kapernaum, akida alimjia, akamsihi,

⁶ akinena, Bwana, mtumishi wangu amelala nyumbani, mgonjwa wa kupooza, anaumwa sana.

⁷ Yesu akamwambia. Nitakuja, nimponye.

⁸ Akida akamjibu, akasema, Si stahili yangu wewe uingie chini ya dari yangu: lakini sema neno tu, na mtumishi wangu atapona.

⁹ Maana na mimi ni mtu chini ya mamlaka, nina askari chini yangu: nikimwambia huyu, Nenda, huenda; na huyu, Njoo, huja; au mtumwa wangu, Fanya hivi, hufanya.

¹⁰ Yesu aliposikia haya, akastaajabu, akawaambia wale waliomfuata, Amin, nawaambieni, Sijaona imani kubwa kama hii, hatta katika Israeli.

¹¹ Nami nawaambieni, ya kwamba wengi watakuja kutoka mashariki na magbaribi, wataketi pamoja na Ibrabimu, na Isaak, na Yakob katika ufalme wa mbinguni;

¹² bali wana wa ufalme watatupwa katika giza la nje; ndiko kutakuwa kilio na kusaga meno.

¹³ Yesu akamwambia akida, Nenda zako: na kadiri ulivyoamini upate. Mtumishi wake akapona saa ileile.

¹⁴ Hatta Yesu alijiofika nyumbani kwa Petro, akamwona mama wa mkewe amelala hawezi homa.

¹⁵ Akamgusa mkono wake, homa ikamwacha; nae akaondoka, akawatumikia.

¹⁶ Ilipokuwa jioni, wakamletea wengi wenye pepo: akawafukuza pepo kwa neno lake, akawaponya wote waliokuwa hawawezi,

¹⁷ illi litimie lile neno lililonenwa na nabii Isaya, akisema, Mwenyewe alitwaa magonjwa yetu, na kuchukua maradhi zetu.

¹⁸ Yesu alipoona makutano mengi wakimzunguka, akaamuru kuvuka hatta ngʼambu.

¹⁹ Mwandishi mmoja akamwendea, akamwambia, Mwalimu, nitakufuata ko kote uendako.

²⁰ Yesu akamwambia, Mbweha wana matundu, na ndege za anga vituo; bali Mwana wa Adamu hana pa kulaza kichwa chake.

²¹ Mwingine katika wanafunzi wake akamwambia, Bwana, nipe rukhusa kwanza, niende nikamzike baba yangu.

²² Lakini Yesu akamwambia, Nifuate; waache wafu wazike wafu wao.

²³ Akapanda chomboni, wanafunzi wake wakamfuata.

²⁴ Kukawa msukosuko mkuu baharini, hatta chombo kikafunikizwa na mawimbi: nae alikuwa amelala.

²⁵ Wanafunzi wake wakamwendea, wakamwamsha, wakinena, Bwana, tuokoe tunaangamia.

²⁶ Akawaambia, Mbona mu waoga, enyi wa imani haba? Marra akaondoka, akazikemea pepo na bahari; kukawa shwari kuu.

²⁷ Wale watu wakastaajabu, wakinena. Huyo ni mtu wa namna gani hatta pepo na bahari zamtii?

²⁸ Alipofika ngʼambu, katika inchi ya Wagergesene, watu wawili wenye pepo walikutana nae, wanatoka makaburini, wakali mno, hatta mtu asiweze kupita njia ile.

²⁹ Wakapiga kelele, wakinena, Tuna nini nawe, Yesu, Mwana wa Mungu? Je, umekuja kutuadhibu kabla ya muhulla?

³⁰ Bassi, kulikuwako mbali kundi la nguruwe wengi wakilisha.

³¹ Pepo wakamsihi, wakinena, Ukitufukuza, tuache twende, tukaingie katika kundi la nguruwe.

³² Akawaambia. Nendeni. Wakatoka, wakaingia katika kundi la nguruwe: na, kumbe! kundi lote la nguruwe likatelemka kwa kassi gengeni, wakaingia baharini, wakafa majini.

³³ Wachungaji wakakimbia, wakaenda zao mjini, wakayakhubiri yote, na mambo ya wenye pepo pia.

³⁴ Mji wote ukatoka kwenda kumlaki Yesu; walipomwona, wakamsihi aondoke mipakani mwao.