Mathayo 22 - BIBLIA KISWAHILI

Mfano wa Karamu ya harusi

¹ Yesu akajibu, akawaambia tena kwa mifano, akisema,

² Ufalme wa mbinguni unafanana na mfalme mmoja aliyemfanyia mwanawe harusi.

³ Akawatuma watumwa wake wawaite walioalikwa kuja harusini; nao wakakataa kuja.

⁴ Akatuma tena watu kwa wengine, akisema, Waambieni wale walioalikwa, Tazameni, nimeandaa karamu yangu; ng'ombe zangu na vinono vimekwisha kuchinjwa, na vyote vimekuwa tayari, njoni harusini.

⁵ Lakini hawakujali, wakaenda zao, mmoja shambani kwake, mmoja kwenye biashara yake;

⁶ nao waliosalia wakawakamata watumwa wake, wakawadhulumu na kuwaua.

⁷ Basi yule mfalme akaghadhibika; akatuma majeshi yake, akawaangamiza wauaji wale, akauteketeza mji wao.

⁸ Kisha akawaambia watumwa wake, Harusi iko tayari, lakini wale walioalikwa hawakustahili.

⁹ Basi Nendeni hata njia panda za barabara, na wote mwaonao waiteni harusini.

¹⁰ Watumwa wale wakatoka wakaenda njia kuu, wakakusanya wote waliowaona, waovu kwa wema; harusi ikajaa wageni.

¹¹ Lakini alipoingia yule mfalme ili kuwatazama wageni wake, akaona mle mtu mmoja asiyevaa vazi la harusi.

¹² Akamwambia, Rafiki, uliingiaje humu nawe huna vazi la harusi? Naye akatekewa.

¹³ Mfalme akawaambia watumishi, Mfungeni mikono na miguu, mchukueni mkamtupe katika giza la nje; ndiko kutakuwako kilio na kusaga meno.

¹⁴ Kwa maana waitwao ni wengi, bali wateule ni wachache.

Swali juu ya kulipa kodi

¹⁵ Ndipo Mafarisayo wakaenda zao, wakafanya shauri, jinsi ya kumtega kwa maneno.

¹⁶ Wakatuma kwake wanafunzi wao pamoja na Maherodi, wakasema, Mwalimu, tunajua ya kuwa wewe u mtu wa kweli, na njia ya Mungu waifundisha katika kweli, wala hujali cheo cha mtu awaye yote, kwa maana hutazami sura za watu.

¹⁷ Basi utuambie, Waonaje? Ni halali kumpa Kaisari kodi, ama sivyo?

¹⁸ Lakini Yesu akaufahamu uovu wao, akasema, Mbona mnanijaribu, enyi wanafiki?

¹⁹ Nionesheni fedha ya kodi. Nao wakamletea dinari.

²⁰ Akawaambia, Ni ya nani sanamu hii, na anwani hii?

²¹ Wakamwambia, Ni ya Kaisari. Akawaambia, Basi, mpeni Kaisari yaliyo ya Kaisari, na Mungu yaliyo ya Mungu.

²² Waliposikia, walistaajabu, wakamwacha, wakaenda zao.

Swali kuhusu ufufuo

²³ Siku ile Masadukayo, watu wasemao ya kwamba hakuna kiyama, wakamwendea, wakamwuliza,

²⁴ wakisema, Mwalimu, Musa alisema, Mtu akifa, akiwa hana watoto, ndugu yake na amwoe yule mkewe, ili ampatie nduguye mzao.

²⁵ Basi, kwetu kulikuwa na ndugu saba; wa kwanza akaoa, akafariki, na kwa kuwa hana mzao, akamwachia nduguye mke wake.

²⁶ Vivyo hivyo wa pili naye, na wa tatu, hata wote saba.

²⁷ Mwisho wa wote yule mwanamke akafa naye.

²⁸ Basi, katika kiyama, atakuwa mke wa yupi kati ya wale saba? Maana wote walikuwa naye.

²⁹ Yesu akajibu, akawaambia, Mnapotea, kwa kuwa hamyajui maandiko wala uweza wa Mungu.

³⁰ Kwa maana katika kiyama hawaoi wala hawaolewi, bali huwa kama malaika mbinguni.

³¹ Tena kuhusu kiyama ya wafu, hamjalisoma neno lililonenwa na Mungu, akisema,

³² Mimi ni Mungu wa Abrahamu, na Mungu wa Isaka, na Mungu wa Yakobo? Mungu si Mungu wa wafu, bali wa walio hai.

³³ Na makutano waliposikia, walishangaa kwa mafunzo yake.

Amri iliyo kuu zaidi

³⁴ Na Mafarisayo waliposikia ya kwamba amewafumba kinywa wale Masadukayo, walifanya shauri pamoja.

³⁵ Mmoja wao, mwanasheria, akamwuliza, akimjaribu;

³⁶ Mwalimu, katika torati ni amri ipi iliyo kuu?

³⁷ Akamwambia, Mpende Bwana Mungu wako kwa moyo wako wote, na kwa roho yako yote, na kwa akili zako zote.

³⁸ Hii ndiyo amri iliyo kuu, tena ni ya kwanza.

³⁹ Na ya pili yafanana nayo, nayo ni hii, Mpende jirani yako kama nafsi yako.

⁴⁰ Katika amri hizi mbili hutegemea Torati yote na vitabu vya Manabii.

Swali kuhusu Mwana wa Daudi

⁴¹ Na Mafarisayo walipokusanyika, Yesu aliwauliza, akisema, Mnaonaje kuhusu Kristo?

⁴² Ni mwana wa nani? Wakamwambia, Ni wa Daudi.

⁴³ Akawauliza, Imekuwaje basi Daudi katika Roho kumwita Bwana, akisema,

⁴⁴ Bwana alimwambia Bwana wangu, Uketi katika mkono wangu wa kulia, Hata niwawekapo adui zako Kuwa chini ya miguu yako?

⁴⁵ Basi, Daudi akimwita Bwana, amekuwaje ni mwanawe?

⁴⁶ Wala hakuweza mtu kumjibu neno; wala hakuthubutu mtu yeyote tangu siku ile kumwuliza neno tena.