2 Makabisi 15 - Baibo Busansulushi Bwa Libuku Ili

Nikanoli mbwaakapingila kucita cibiibi

¹ Nikanoli ndyaakanyumfwa ayi Judasi abantu bakwe bali kulubasu lya ku Samaliya, wakalibambila ayi akabalwane pabushiku bwa Cibelu, kwaamba ayi atakacani mapesho.

² BaJuda mbakakatisha kumukonkela, bakamulwiita ayi, “Mutaciti cintu cibiibi coobulya, mwebo mulemeneshe bushiku ubo Lesa ubona shoonse mbwaakalemenesha akubusandula kuba busalalite kwiinda nshiku shoonse.”

³ Sombi Nikanoli mubiibi pababiibi wakeepusha ayi, “Sa kuli mwaami kwiculu wakapingula kulemenesha bushiku bwa Cibelu?”

⁴ Balo bakamukumbula ayi, “Ncakwiila, ngu mwaami Lesa muumi. Mwaami wakwiculu, uyo wakaamba ayi tunoolemenesha bushiku bwa Cibelu.”

⁵ Sombi Nikanoli wakaamba ayi, “Anebo ndimwaami pacishi capaanshi, aboobo ntoopingula ayi amubwese shilwanyo shanu, mukacite ico mwaami ncamutuma.” Sombi isho nshakalinga kusuni, tabakwe kushicita.

Judasi mbwaakalibambila kulwana

⁶ Ono pakucana kwaamba ayi Nikanoli wakalinga kumeka akulisumpula, wakashinisha ayi ulakuyaka cakwiibalukilaawo mbwaakakoma Judasi abantu bakwe.

⁷ Sombi Makabisi taakwe kucileka kushoma ayi utoocana lucafwo kuswa kuMwaami Lesa.

⁸ Wakaambila bantu bakwe ayi bataloondi nkondo yabantu batashomi, sombi bebaluke lucafwo luswita kwiculu kuswabo kalekale. Wakabaambila alimwi ayi balindile Wankusu Shoonse utoobalengesha kukoma.

⁹ Judasi wakabayumya yumya pakubalwiita maswi a Milawo abalaluki, akubeebalusha nkondo shobakakoma. Pakucita boobo wakayumya shiso shabo.

¹⁰ Ndyaakabayumya myooyo yabo, wakabapa milawo yakwe, akubalwiita bubiibi bwabatashomi, abo bapwaya Cipangano ncobakalumbila.

¹¹ Wakabapa nshaakalinga kusunikwi mukulwana nkondo kuteshibo mayawo nabi masumo, sombi kubayumya amaswi abotu.

¹² Isho nshaakabona sheeshi: Wakabona Onyasi uyo wakalinga Mupailishi Munene, kaapaila, kanyamwite maansaakwe pamushobo woonse wabene Juda. Onyasi uyo wakalinga muntu mubotu alimwi wabulemu, muntu utalisumpuli alimwi mubombu, wakalinga kwaamba kabotu kabotu uyo wakashibila kukala kabotu kuswa kubwanike bwakwe.

¹³ Pesule lyakwe kwakabonekela muntu umwi kuli Judasi. Muntu uyu wakalinga kucite mfwii, wabulemu alimwi aciimo cabuntu cikankamika.

¹⁴ Lyalo Onyasi wakaamba ayi, “Uyu ngu Cibusa wabamakwesu, lyalo ulaapailila mushobo woonse andabala yoonse Isalalite. Uyu eenka ngu Jelemiya, Mulaluki wakwe Lesa.”

¹⁵ Lyalo Jelemiya wakatandabika lyaansa lyakwe, akupa Judasi mupeeni wagolodi akwaamba ayi,

¹⁶ “Ngooyu mupeeni usalalite, ceenka ici cipo caswa kuli Lesa, ico ceshi ukoomishe balwani bako.”

¹⁷ Ndibakanyumfwa maswi alemu akwe Judasi, boonse bakayumishikwa ceebo maswi ayo akabapa nkusu, akababonesha busankwa bacikula bwangu. Lyalo bene Juda bakapangana ayi batakalilili mumisumba yankondo sombi bacicile balwanibabo, akulwanaabo cankusu, ayi nkondo imane bwangu. Bakayeeya sheesho pakucana ayi Ŋanda yakwe Lesa andabala shakalinga mumapesho anene.

¹⁸ Tebakalinga kubikako maano kubakaabo, banababo, babyaabo nabi bamakwababo sombi bakalinga kulibilika a Ŋanda yakwe Lesa Isalalalite.

¹⁹ Abalo bakalinga kweelete kucaala mundabala bakapenga mumyooyo, pakunooyeeya mbweshishibe kunkondo itoolwaninwa muluundu.

Kukomwa akufwa kwakwe Nikanoli

²⁰ Ciindi coonse ico boonse bakalinga kulindila ayi babone nkondo mbweshi imane. Balwani bakalinga babungana akushika pafwaafwi, beshilumamba bakeemikana mumindando, nsofu kabashibikite pamusena weelete, beshilumamba balwanina pamaaki bakalinga kushiite mweela.

²¹ Makabisi ndyaakabona kufula kwa bantu bakalinga kwisa kuli nguwe, wakabona ashilwanyo shabo shamishobo ishiyeneshiyene, alimwi abukali bwa nsofu shabo, wakanyamuna maansa kwiculu. Wakatalika kupaila kuli Lesa uyo ucita shaankamiko, ceebo wakashiba ayi Mwaami Lesa talangilishi nkusu yashilwanyo, sombi ulakomesha beelete kukoma, bweenka mbuli lakwe mwiine mbwaasuni.

²² Lyalo wakasenga Lesa ayi, “Webo OMwaami Lesa, wakatuma munjelo wako muciindi cakwe Esekiya, mwaami wakuJuda, lakwe wakacaya beshilumamba bakwe Senakelibu bakalinga 185,000.

²³ Webo omwine cishi cakwiculu, tuma alimwi munjelo wako mubotu onoono, ayi abape boowa akubatutumya balwanibesu aba.

²⁴ Bantu basampula liina lyako, abo basuni kulwana acoonde cako cisalalite, ubanyonyoole limwi a nkusu shako shinene.” Wakamanisha mupailo wakwe bweenka ubo.

²⁵ Nikanoli wakashika a likoto lyakwe, akulisha mapeenga akunokwiimba nyimbo shankondo.

²⁶ Sombi Judasi abeshilumamba bakwe bakatalika kulwana abo, kumwi kasenga lucafwo lwakwe Lesa.

²⁷ Lyalo Ndibakalinga kulwana akusebesesha shilwanyo shamumaansa, kumwi uku kabapaila mumoyo, wakacaya bantu beendilila 35,000. Aboobo wakakondwa abuumbi pakubona ayi Lesa wabacafwa.

²⁸ Ndiyakamana nkondo, ciindi ndibakalinga kuboolela akusangalala kunene, bakabone Nikanoli kalete kampa, kafwite, kafwete ashakufwala shakwe shankondo.

²⁹ Lyalo kwakalinga koolobesha amaswi apeculu, ceebo boonse bakalinga kulumbaisha Mwaami Lesa Shinkusu Shoonse mumulaka wine mishaabo.

³⁰ Judasi, uyo wakalyaaba kutanjilila nkondo yakupulusha bamakwabo mucishi cakwe, taakwe kuleka kubacitila nkumbu kutalikila kubwanike bwakwe, wakapingula ayi Nikanoli asutulwe mutwi alyaansa, akuyaasho kuJelusalemu.

³¹ Ndyaakashika kuJelusalemu, wakabunganya bantu boonse bamushobo wakwe akubika bapailishi pafwaafwi a cipaililo, akwiita boonse balya bekala mushaanda shilaafu shankondo.

³² Wakababonesha mutwi wakwe Nikanoli a lyaansa lyakwe ilyo muntu shikulisumpula ulya ndyaakalinga kutandabika mukulinyumfwa kutondeka Ŋanda yakwe Lesa Shinkusu Shoonse.

³³ Ndyaakamana wakasutula mulaka wakwe Nikanoli muntu utanyumfwi akwaamba ayi, “Ntootolela shiyuni ayi shilye, lyalo pafwaafwi a Ŋanda yakwe Lesa ntookwaanjikaawo shintu ishi shotwatimboola ceebo cakubapensha kwakwe.”

³⁴ Boonse bakalumbaisha Mwaami Lea wakwiculu ayi, “Alumbaishikwe Lesa uyo wacinjilisha musena wakwe ayi utabishikwi.”

³⁵ Pesule lyasheeshi Judasi wakapatika mutwi wakwe Nikanoli peculu lya ŋanda yankondo, ayi uboneke anga mbukamboni bwa lucafwo lwa Mwaami Lesa.

³⁶ Lyalo boonse bakanyumfwana ayi banokwiibaluka bushiku ubo. Bakapangana alimwi ayi banosekelela pabushiku bwa 13 mweenshi wa 12, wiitwa ayi Ada mumushobo wabene Silya. Bweenka ubu bwakalinga bushiku bukonkela bushiku bwakwe Modekayi.

Maswi akumanisha a Mulembi

³⁷ Aya ngomakani a Nikanoli. Kutalikila ciindi ceenka ico, ndabala yaJelusalemu yakalinga mumaansa aba Ebulu. Anebo ono makani angu tokwaalekela peenka apa.

³⁸ Na shondalemba ishi shitoonyumfwika kabotu, alimwi shilipite, sobwe sheenka ishi shendalinga kusuni. Sombi na tashikushi moyo nabi kucata moyo, amushome ayi ndakacita cinkonsha ayi nembe kabotu.

³⁹ Palya waini ulacisa kuunwa weenka, maanshi aalo taboti kwaanwa eenka, sombi waini nkusenkanya amaanshi cilaba cakunwa cibotu alimwi cikondelesha. Bweenka ubo buuya bwakulemba makani bulabotelesha bantu batoobelenga makani ayo, na ndashika waawo, ndeemikana.