Zaburi 80 - Swahili Revised Union Version - SRUVDC Swahili Revised Union Version - SRUVDC
Zaburi 80

¹ Wewe uchungaye Israeli, usikie, Wewe umwongozaye Yusufu kama kundi; Wewe uketiye juu ya makerubi, utoe nuru.

² Mbele ya Efraimu, na Benyamini, na Manase, Uziamshe nguvu zako, Uje, utuokoe.

³ Ee Mungu, uturudishe, Uangaze uso wako nasi tutaokoka.

⁴ Ee BWANA, Mungu wa majeshi, hadi lini Utayaghadhibikia maombi ya watu wako?

⁵ Umewalisha mkate wa machozi, Umewanywesha machozi kwa kipimo kikuu.

⁶ Unatufanya sababu ya ugomvi kwa jirani zetu, Na adui zetu wanacheka wao kwa wao.

⁷ Ee Mungu wa majeshi, uturudishe, Uangaze uso wako nasi tutaokoka.

⁸ Ulileta mzabibu kutoka Misri, Ukawafukuza mataifa ukaupanda.

⁹ Ulitengeneza nafasi mbele yake, Nao ukatia mizizi sana ukaijaza nchi.

¹⁰ Milima ilifunikwa kwa kivuli chake, Matawi yake ni kama mierezi ya Mungu.

¹¹ Nao uliyaeneza matawi yake hadi baharini, Na vichipukizi vyake hadi kunako Mto.

¹² Kwa nini umezibomoa kuta zake, Wakauchuma wote wapitao njiani?

¹³ Nguruwe wa msituni wanauharibu, Na hayawani wa kondeni wanautafuna.

¹⁴ Ee Mungu wa majeshi, tunakusihi, urudi, Utazame toka juu uone, uujie mzabibu huu.

¹⁵ Na mche ule ulioupanda Kwa mkono wako wa kulia; Na tawi lile ulilolifanya Kuwa imara kwa nafsi yako.

¹⁶ Umechomwa moto; umekatwa; Kwa lawama ya uso wako wanapotea.

¹⁷ Mkono wako na uwe juu yake Mtu aliye katika mkono wako wa kulia; Juu ya mwanadamu uliyeimarisha Kwa nafsi yako;

¹⁸ Kisha hatutakuacha kwa kurudi nyuma; Utuhuishe nasi tutaliitia jina lako.

¹⁹ Ee BWANA, Mungu wa majeshi, uturudishe, Uangaze uso wako nasi tutaokoka.