Zaburi 78 - Swahili Revised Union Version - SRUVDC Swahili Revised Union Version - SRUVDC
Zaburi 78

¹ Enyi watu wangu, sikilizeni sheria yangu, Tegeni masikio kwa maneno ya kinywa changu.

² Nitafumbua kinywa changu kwa mithali, Niyatamke mafumbo ya kale.

³ Mambo tuliyoyasikia na kuyafahamu, Ambayo baba zetu walituambia.

⁴ Hayo hatutawaficha wana wao, Huku tukiwaambia kizazi kingine, Sifa za BWANA, na nguvu zake, Na mambo yake ya ajabu aliyoyafanya.

⁵ Maana alikaza ushuhuda katika Yakobo, Na sheria aliiweka katika Israeli. Aliyowaamuru baba zetu Wawajulishe wana wao,

⁶ Ili kizazi kingine wawe na habari, Ndio hao wana watakaozaliwa. Wasimame na kuwaambia wana wao.

⁷ Wamwekee Mungu tumaini lao. Wala wasiyasahau matendo ya Mungu, Bali wazishike amri zake.

⁸ Naam, wasiwe kama baba zao, Kizazi cha ukaidi na uasi. Kizazi kisichojitengeneza moyo, Wala roho yake haikuwa amini kwa Mungu.

⁹ Wale Waefraimu, wenye silaha, wapiga upinde, Walirudi nyuma siku ya vita.

¹⁰ Hawakulishika agano la Mungu; Wakakataa kufuata sheria yake;

¹¹ Wakayasahau matendo yake, Na mambo yake ya ajabu aliyowaonesha.

¹² Mbele ya baba zao alifanya mambo ya ajabu, Katika nchi ya Misri, konde la Soani.

¹³ Aliipasua bahari akawavusha; Aliyafanya maji yasimame kama ukuta.

¹⁴ Akawaongoza kwa wingu mchana, Na usiku kucha kwa nuru ya moto.

¹⁵ Akapasua miamba jangwani; Akawanywesha maji mengi kama maji ya vilindi.

¹⁶ Akafanya vijito vitokeze katika mwamba, Na kufanya maji yatiririke kama mito.

¹⁷ Lakini wakazidi kumtenda dhambi, Walipomwasi Aliye Juu katika jangwa.

¹⁸ Wakamjaribu Mungu mioyoni mwao Kwa kutaka chakula kwa tamaa zao.

¹⁹ Naam, walimwambia Mungu, wakasema, Je! Mungu aweza kuandaa meza jangwani?

²⁰ Tazama, aliupiga mwamba; Maji yakabubujika, ikafurika mito. Pia aweza kutupa chakula? Atawaandalia watu wake nyama?

²¹ Hivyo BWANA aliposikia akaghadhibika; Moto ukawashwa juu ya Yakobo, Hasira nayo ikapanda juu ya Israeli.

²² Kwa kuwa hawakumwamini Mungu, Wala hawakuutumainia wokovu wake.

²³ Lakini aliyaamuru mawingu juu; Akaifungua milango ya mbinguni;

²⁴ Akawanyeshea mana ili wale; Akawapa nafaka ya mbinguni.

²⁵ Mwanadamu akala chakula walacho malaika; Akawapelekea chakula cha kuwashibisha.

²⁶ Aliuelekeza upepo wa mashariki kuvuma toka mbinguni; Na kwa uweza wake akauongoza upepo wa kusini.

²⁷ Akawanyeshea nyama kama mavumbi, Na ndege wenye mbawa, Kama mchanga wa bahari.

²⁸ Akawaangusha kati ya matuo yao, Pande zote za maskani zao.

²⁹ Wakala wakashiba sana; Maana aliwaletea walivyovitamani;

³⁰ Lakini kabla ya kuitosheleza shauku yao, Huku chakula kikiwa bado kinywani mwao,

³¹ Hasira ya Mungu ikapanda juu yao, Akawaua waliokuwa wanono; Akawaangusha chini vijana wa Israeli.

³² Pamoja na hayo wakazidi kutenda dhambi, Wala hawakuyaamini matendo yake ya ajabu.

³³ Kwa hiyo akazikomesha siku zao kama pumzi, Na miaka yao kwa hofu ya kuwastusha.

³⁴ Alipowaua ndipo walipokuwa wakimtafuta; Wakarudi wakamtaka Mungu kwa bidii.

³⁵ Wakakumbuka kuwa Mungu ni mwamba wao, Na Mungu Aliye Juu ni mkombozi wao.

³⁶ Lakini walimdanganya kwa vinywa vyao, Wakamwambia uongo kwa ndimi zao.

³⁷ Kwa maana mioyo yao haikuwa thabiti kwake, Wala hawakuwa waaminifu katika agano lake.

³⁸ Lakini Yeye, kwa kuwa anayo rehema, Husamehe uovu wala haangamizi. Mara nyingi huipishia mbali ghadhabu yake, Wala haiwashi hasira yake yote.

³⁹ Akakumbuka ya kuwa wao ni kiwiliwili, Upepo upitao wala haurudi.

⁴⁰ Walimwasi jangwani mara ngapi? Na kumhuzunisha nyikani!

⁴¹ Wakamjaribu Mungu tena na tena; Na kumkasirisha Mtakatifu wa Israeli.

⁴² Hawakuukumbuka mkono wake, Wala siku ile alipowakomboa na mtesi.

⁴³ Alivyoziweka ishara zake katika Misri, Na miujiza yake katika uwanda wa Soani.

⁴⁴ Aligeuza mito yao kuwa damu, Ili wasipate kunywa maji kutoka vijito vyao.

⁴⁵ Aliwapelekea mainzi wakawala, Na vyura wakawaharibu.

⁴⁶ Akawapa tunutu mazao yao, Na nzige matunda ya kazi yao.

⁴⁷ Aliiharibu mizabibu yao kwa mvua ya mawe, Na mikuyu yao kwa mawe ya barafu.

⁴⁸ Akaacha ng'ombe zao wapigwe kwa mvua ya mawe, Na makundi yao kwa umeme.

⁴⁹ Akawapelekea ukali wa hasira yake, Ghadhabu, na uchungu, na taabu, Kundi la malaika waletao mabaya.

⁵⁰ Akaifanyia njia hasira yake; Wala hakuziepusha roho zao kutoka kwa mauti, Bali aliiachia tauni uhai wao;

⁵¹ Akampiga kila mzaliwa wa kwanza wa Misri, Malimbuko ya nguvu katika hema za Hamu.

⁵² Kisha akawaongoza watu wake kama kondoo, Akawachunga kama kundi jangwani.

⁵³ Hao akawachukua salama wala hawakuogopa, Bali bahari iliwafunika adui zao.

⁵⁴ Akawapeleka hadi mpaka wake mtakatifu, Mlima alioununua kwa mkono wake wa kulia.

⁵⁵ Akawafukuza mataifa mbele yao, Akawapimia urithi kwa kamba, Na kuwakalisha makabila ya Israeli katika hema zao.

⁵⁶ Lakini walimjaribu Mungu Aliye Juu, wakamwasi, Wala hawakuzishika shuhuda zake.

⁵⁷ Bali walirudi nyuma, wakahaini kama baba zao; Wakayumba kama upinde usiofaa.

⁵⁸ Wakamkasirisha kwa mahali pao pa juu, Wakamtia wivu kwa sanamu zao.

⁵⁹ Mungu alisikia, akaghadhibika, Akamkataa Israeli kabisa.

⁶⁰ Akaiacha maskani ya Shilo, Hema aliyoiweka katikati ya wanadamu;

⁶¹ Akaziacha nguvu zake kutekwa, Na fahari yake mkononi mwa mtesi.

⁶² Akawatoa watu wake wapigwe kwa upanga; Akaughadhibikia urithi wake.

⁶³ Moto ukawala vijana wao, Wanawali wao hawakuimbiwa nyimbo za arusi,

⁶⁴ Makuhani wao walianguka kwa upanga, Wala wajane wao hawakuomboleza.

⁶⁵ Ndipo Bwana alipoamka kama aliyelala usingizi, Kama shujaa apigaye kelele kwa sababu ya mvinyo;

⁶⁶ Akawapiga watesi wake akawarudisha nyuma, Akawatia aibu ya milele.

⁶⁷ Ila akaikataa hema ya Yusufu; Wala hakuichagua kabila la Efraimu.

⁶⁸ Bali aliichagua kabila la Yuda, Mlima Sayuni alioupenda.

⁶⁹ Akajenga patakatifu pake kama vilele, Kama dunia aliyoiweka imara milele.

⁷⁰ Akamchagua Daudi, mtumishi wake, Akamwondoa katika mazizi ya kondoo.

⁷¹ Nyuma ya kondoo wanyonyeshao alimwondoa, Awachunge Yakobo watu wake, na Israeli urithi wake.

⁷² Akawahudumia kwa ukamilifu wa moyo wake, Na kuwaongoza kwa busara ya mikono yake.