Zaburi 46 - Swahili Revised Union Version - SRUVDC Swahili Revised Union Version - SRUVDC
Zaburi 46

¹ Mungu kwetu sisi ni kimbilio na nguvu, Msaada utakaoonekana tele wakati wa mateso.

² Kwa hiyo hatutaogopa ijapobadilika nchi, Ijapotetemeka milima moyoni mwa bahari.

³ Maji yake yajapovuma na kuumuka, Ijapopepesuka milima kwa kiburi chake.

⁴ Kuna mto, vijito vyake vyaufurahisha mji wa Mungu, Patakatifu pa maskani zake Aliye Juu.

⁵ Mungu yu katikati ya mji hautatetemeshwa; Mungu atausaidia asubuhi na mapema.

⁶ Mataifa yanaghadhibika na falme kutetemeka; Anatoa sauti yake, nchi inayeyuka.

⁷ BWANA wa majeshi yu pamoja nasi, Mungu wa Yakobo ni ngome yetu.

⁸ Njoni muyatazame matendo ya BWANA, Jinsi alivyofanya ukiwa katika nchi.

⁹ Avikomesha vita hata mwisho wa dunia; Avunja uta, akata mkuki, achoma moto magari.

¹⁰ Tulieni, mjue ya kuwa Mimi ni Mungu, Nitakuzwa katika mataifa, nitakuzwa katika nchi.

¹¹ BWANA wa majeshi yu pamoja nasi, Mungu wa Yakobo ni kimbilio letu.