Zaburi 12 - Swahili Revised Union Version - SRUVDC Swahili Revised Union Version - SRUVDC
Zaburi 12

¹ Tuokoe, ee BWANA, maana hamna tena amchaye Mungu Maana waaminifu wametoweka katika wanadamu.

² Husemezana yasiyofaa kila mtu na mwenziwe, Wenye midomo ya kujipendekeza; Husemezana kwa mioyo ya unafiki;

³ BWANA ataikata midomo yote ya kujipendekeza, Na ulimi unenao maneno ya kiburi;

⁴ Waliosema, Kwa ndimi zetu tutashinda; Midomo yetu ni yetu wenyewe, Ni nani aliye bwana juu yetu?

⁵ Kwa ajili ya kuonewa kwao wanyonge, Kwa ajili ya kuugua kwao wahitaji, Sasa nitasimama, asema BWANA, Nitamweka salama yeye wanayemfyonya.

⁶ Maneno ya BWANA ni maneno safi, Ni fedha iliyojaribiwa kalibuni juu ya nchi; Iliyosafishwa mara saba.

⁷ Wewe, BWANA, ndiwe utakayetuhifadhi, Utatulinda na kizazi hiki milele.

⁸ Wasio haki hutembea pande zote, Huku ufisadi ukitukuka kati ya wanadamu.