Yobu 19 - Swahili Revised Union Version - SRUVDC Swahili Revised Union Version - SRUVDC
Yobu 19

¹ Ndipo Ayubu akajibu, na kusema,

² Je! Mtanichukiza nafsi yangu hata lini, Na kunivunjavunja kwa maneno?

³ Mara kumi hizi mmenishutumu; Hamwoni haya kunifanyia mambo magumu.

⁴ Ingawaje nimekosa, Kosa langu hukaa kwangu mwenyewe.

⁵ Ikiwa mtajitukuza juu yangu, Na kufanya aibu yangu kuwa hoja juu yangu;

⁶ Jueni basi kuwa Mungu amenipotosha, Na kunizingira kwa wavu wake.

⁷ Tazama, nalia, Udhalimu, lakini sisikiwi; Naulilia msaada, wala hapana hukumu.

⁸ Yeye ameiziba njia yangu nisipate kupita, Na kutia giza katika mapito yangu.

⁹ Amenivua utukufu wangu, Na kuiondoa taji kichwani mwangu.

¹⁰ Amenibomoa pande zote, nami nimetoweka; Na tumaini langu ameling'oa kama mti.

¹¹ Tena ameziwasha ghadhabu zake juu yangu, Akanihesabia kuwa mmoja katika watesi wake.

¹² Majeshi yake husongea pamoja, na kunipandishia njia yao, Na kupiga kambi kuizunguka hema yangu.

¹³ Amewaweka ndugu zangu mbali nami, Na wanijuao wametengwa nami kabisa.

¹⁴ Watu wa ukoo wangu wamekoma, Na marafiki zangu niwapendao wamenisahau.

¹⁵ Wakaao nyumbani mwangu, na vijakazi vyangu, wanihesabu kuwa mgeni; Wageni nyumbani mwangu, na vijakazi wangu, wanihesabu kuwa mgeni.

¹⁶ Namwita mtumishi wangu, wala haniitikii, Ingawa namsihi kwa kinywa changu.

¹⁷ Pumzi zangu zimekuwa kinyaa kwa mke wangu, Nami ni machukizo kwa ndugu zangu.

¹⁸ Hata watoto wadogo hunidharau; Nikiondoka, huninena.

¹⁹ Marafiki zangu wote wa dhati wanichukia; Na hao niliowapenda wamenigeukia.

²⁰ Mfupa wangu unagandamana na ngozi yangu na nyama yangu, Nami nimeokoka na ngozi ya meno yangu tu.

²¹ Nihurumieni, nihurumieni, enyi rafiki zangu, Kwa maana mkono wa Mungu umenigusa.

²² Mbona ninyi mnaniudhi kama Mungu, Wala hamkutosheka na nyama yangu?

²³ Laiti maneno yangu yangeandikwa sasa! Laiti yangeandikwa kitabuni!

²⁴ Yakachorwa katika mwamba milele, Kwa kalamu ya chuma na risasi.

²⁵ Lakini mimi najua ya kuwa Mteteaji wangu yu hai, Na ya kuwa hatimaye atasimama juu ya nchi.

²⁶ Na baada ya ngozi yangu kuharibiwa hivi, Lakini, pasipokuwa na mwili wangu nitamwona Mungu;

²⁷ Nami nitamwona mimi nafsi yangu, Na macho yangu yatamtazama, wala si mwingine. Mtima wangu unazimia ndani yangu!

²⁸ Kama mkisema, Jinsi tutakavyomwudhi! Kwa kuwa shina la jambo hili limeonekana kwake;

²⁹ Uogopeni upanga; Kwa maana adhabu za upanga zina ghadhabu, Mpate kujua ya kwamba hukumu iko.