زَكَرِيَّا 10:7 - الكتاب المقدس بالعربي الدارجي هنا تشاد

⁷ نَاسْ قَبِيلَةْ أَفْرَايِمْ يَبْقَوْا مِثِلْ فُرَّاسْ وَ يِنْمَلُوا بِالْفَرَحْ مِثِلْ الشِّرْبَوْا الْخَمَرْ. وَكِتْ يِشِيفُوهُمْ، عِيَالْهُمْ يِنْبَسْطُوا وَ قُلُوبْهُمْ يَفْرَحَوْا فِي شَانْ اللّٰهْ.

زَكَرِيَّا 10:7 Referenca të Kryqëzuara

زَكَرِيَّا 9:15

اللّٰهْ الْقَادِرْ يَحْمِي شَعَبَهْ وَ هُمَّنْ يِدَمُّرُوا وَ يَخَرْبُوا الْعَدُو بِحُجَارْ الْمِقْلَاعْ. وَ يَشَرْبَوْا وَ يِكَوْرُكُوا مِثِلْ سَكَّارَى. وَ يِنْمَلُوا بِدَمّ عُدْوَانْهُمْ مِثِلْ كَاسْ الْيُرُشُّوا بَيَّهْ قُرُونْ الْمَدْبَحْ.

1 بُطْرُس 1:8

وَ الْمَسِيحْ دَا، إِنْتُو تِحِبُّوهْ حَتَّى كَانْ مَا شِفْتُوهْ كُلَ. وَ كَنْ إِنْتُو مَا قَاعِدِينْ تِشِيفُوهْ كُلَ، إِنْتُو مُؤمِنِينْ بَيَّهْ وَ تَفْرَحَوْا بَيَّهْ بِفَرْحَةْ مَجِيدَةْ وَ كَبِيرَةْ الْأَبَداً مَا تِلْوَصَّفْ.

فِلِبِّي 4:4

أَفْرَحَوْا بِرَبِّنَا عِيسَى دَايْماً وَ بَتَّانْ نُقُولْ لَيْكُو، أَفْرَحَوْا!

أعمال الرُسُل 2:26

وَ فِي شَانْ دَا، قَلْبِي يَفْرَحْ وَ لِسَانِي يِغَنِّي بِفَرَحْ. وَ جِسْمِي يَرْقُدْ بِعَشَمْ

يُوحَنَّا 16:22

وَ يَبْقَى لَيْكُو مِثِلْ دَا. هَسَّعْ تَتْعَبَوْا لَاكِنْ أَنَا نِقَبِّلْ بَتَّانْ نِشِيفْكُو وَ إِنْتُو تَفْرَحَوْا فَرْحَةْ شَدِيدَةْ وَ مَا فِي نَادُمْ يِشِيلْ مِنْكُو الْفَرْحَةْ دِي.

لُوقا 1:47

وَ نَفْرَحْ بِلْحَيْن بِاللّٰهْ الْيِنَجِّينِي.

زَكَرِيَّا 9:17

أَيْوَى، هُمَّنْ يَفْرَحَوْا زِيَادَةْ وَ يَبْقَوْا جَمِيلِينْ مَرَّةْ وَاحِدْ! وَ الْقَمَحْ يِأَكِّلْ الصُّبْيَانْ وَ الْخَمَرْ الْجَدِيدْ يِكَبِّرْ الْبَنَاتْ.

صَفَنْيا 3:14

زَغْرِطِي، يَا صَهْيُون الْمِثِلْ بِنَيَّةْ! أَصْرَخَيْ بِفَرَحْ، يَا إِسْرَائِيلْ! أَفْرَحَيْ وَ أَنْبَسْطِي بِكُلَّ قَلِبْكِ، يَا مَدِينَةْ الْقُدُسْ الْمِثِلْ بِنَيَّةْ!

حَبَقُوق 3:18

بَيْدَا كُلَ، أَنَا نِنْبَسِطْ بِاللّٰهْ وَ نَفْرَحْ بِإِلٰـهِي الْيِنَجِّينِي.

إرْمِيا 32:39

وَ أَنَا نِوَحِّدْ قَلِبْهُمْ وَ دَرِبْهُمْ أَشَانْ يَخَافَوْا مِنِّي دَايْماً. وَ بَيْدَا، يَقْعُدُوا فِي رَاحَةْ، هُمَّنْ وَ عِيَالْهُمْ مِنْ بَعَدْهُمْ.

إشَعْيا 66:14

وَ إِنْتُو تِشِيفُوا وَ قُلُوبْكُو يَفْرَحَوْا وَ عُضَامْكُو يِقَوُّوا مِثِلْ الْقَشّ الْيِخَضِّرْ. وَ عَبِيدْ اللّٰهْ يَعَرْفُوا قُدُرْتَهْ وَ عُدْوَانَهْ يَعَرْفُوا لَعَنْتَهْ.

إشَعْيا 38:19

وَ لَاكِنْ الْحَيّ بَسْ يِمَجِّدَكْ مِثْلِي أَنَا الْيَوْم وَ الْأَبُو يِعَرِّفْ عِيَالَهْ بِأَمَانَكْ.

زَبُور 104:15

وَ دَوْل خَمَرْ الْيِفَرِّحْ قَلِبْ بَنِي آدَم وَ دِهِنْ الْيِنَوِّرْ وِجْهَهْ وَ أَكِلْ الْيَنْطِيهْ قُدْرَةْ.

زَبُور 102:28

عِيَالْ عَبِيدَكْ يَلْقَوْا مَسْكَنْ وَ ذُرِّيِّتْهُمْ يَثْبُتُوا قِدَّامَكْ.

زَبُور 28:7

اللّٰهْ هُو مَلْجَئِي وَ دَرَقَتِي. قَلْبِي أَتْوَكَّلْ عَلَيَّهْ وَ أَنَا لِقِيتْ الْفَزَعْ. أَنَا نَفْرَحْ بَيَّهْ بِكُلَّ قَلْبِي وَ نَشْكُرَهْ بِغِنَيْ.

زَبُور 13:5

لَاكِنْ أَنَا مُؤآمِنْ بِرَحْمَتَكْ وَ أَنَا فَرْحَانْ بِنَجَاتَكْ.

1 صَمُوِيل 2:1

وَ حِنَّةْ صَلَّتْ وَ قَالَتْ: «نِعْمَةْ اللّٰهْ مَلَتْ قَلْبِي بِالْفَرَحْ، اللّٰهْ رَفَعْ رَاسِي وَ أَنْطَانِي قُدْرَةْ. قِدَّامْ عُدْوَانِي، ضِحِكْت بِحِسّ عَالِي وَ بِنَجَاتَكْ أَنَا فِرِحْت، يَا رَبِّي.

تكوين 43:34

وَ بِإِذِنْ يُوسُفْ، شَالَوْا الْأَكِلْ الْقَاعِدْ قِدَّامَهْ وَ أَنْطَوْه لِأَخْوَانَهْ. وَ الْأَكِلْ الْأَنْطَوْه لِبَنْيَامِينْ يِسَاوِي خَمْسَةْ مَرَّاتْ أَكِلْ هَنَا أَخْوَانَهْ. وَ هُمَّنْ شِرْبَوْا خَمَرْ سَوَا لَحَدِّي فِرْحَوْا.

تكوين 18:19

أَنَا عَزَلْتَهْ لِيِوَصِّي عِيَالَهْ وَ ذُرِّيّتَهْ لِيِتَابُعُوا دَرِبْ اللّٰهْ وَ يِسَوُّوا الْحَقّ وَ الْعَدَالَةْ. وَ بِمِثِلْ دَا، أَنَا اللّٰهْ نِحَقِّقْ الشَّيّءْ الْقُلْت نِسَوِّيهْ لِإِبْرَاهِيمْ.»

أعمال الرُسُل 13:33

هَسَّعْ هُو سَوَّاهْ لَيْنَا أَنِحْنَ عِيَالْهُمْ. اللّٰهْ بَعَثْ عِيسَى مِنْ أُسْط الْمَيْتِينْ مِثِلْ الْكَلَامْ الْمَكْتُوبْ فِي الزَّبُورْ فِي الْفَصُلْ التَّانِي. مَكْتُوبْ: <إِنْتَ إِبْنِي وَ الْيَوْم، أَنَا بِقِيتْ أَبُوكْ.>

أعمال الرُسُل 2:39

أَشَانْ اللّٰهْ قَالْ هُو يَنْطِي الْبَرَكَةْ دِي لَيْكُو وَ لِعِيَالْكُو وَ لِكُلَّ النَّاسْ الْقَاعِدِينْ فِي بَكَانْ بَعِيدْ، أَيْوَى لِأَيِّ نَادُمْ الرَّبِّنَا اللّٰهْ يِنَادِيهْ.»

زَبُور 90:16

خَلِّي عَمَلَكْ يِبِينْ لِعَبِيدَكْ وَ عَظَمَتَكْ تِبِينْ لِعِيَالْهُمْ.

زَبُور 33:21

أَشَانْ مِنَّهْ هُو، جَايِ فَرَحْ قُلُوبْنَا وَ عَلَيْ أُسْمَهْ الْمُقَدَّسْ، أَتْوَكَّلْنَا.

إشَعْيا 54:13

وَ كُلَّ عِيَالْكِ يَبْقَوْا تَلَامِيذ اللّٰهْ وَ يِعِيشُوا فِي السَّلَامْ كَامِلْ.

حِزْقِيال 37:25

وَ يَسْكُنُوا فِي الْبَلَدْ الْأَنَا أَنْطَيْتهَا لِعَبْدِي يَعْقُوبْ وَ دِي الْبَلَدْ السَّكَنَوْا فَوْقهَا جُدُودْكُو. هُمَّنْ يَسْكُنُوا فَوْقهَا، هُمَّنْ وَ عِيَالْهُمْ وَ عِيَالْ عِيَالْهُمْ إِلَى الْأَبَدْ. وَ عَبْدِي الْمِثِلْ دَاوُدْ يَبْقَى مَلِكْ فَوْقهُمْ لِلْأَبَدْ.

يُوِيل 2:23

يَا نَاسْ صَهْيُون، أَفْرَحَوْا وَ أَنْبَسْطُوا بِاللّٰهْ إِلٰـهْكُو. أَشَانْ يِنَزِّلْ مَطَرْ أَوَّلْ الْخَرِيفْ الْوَاجِبْ لَيْكُو وَ يِنَزِّلْ لَيْكُو مَطَرْ الرِّشَاشْ وَ مَطَرْ الْخَرِيفْ مِثِلْ زَمَانْ.

إشَعْيا 25:9

وَ فِي الْيَوْم دَا، يُقُولُوا: «دَاهُو إِلٰـهْنَا. أَنِحْنَ خَطَّيْنَا عَشَمْنَا فَوْقَهْ وَ هُو نَجَّانَا. أَيْوَى، هُو بَسْ اللّٰهْ الْخَطَّيْنَا عَشَمْنَا فَوْقَهْ. يَلَّا نَفْرَحَوْا وَ نِنْبَسْطُوا أَشَانْ هُو نَجَّانَا!

زَكَرِيَّا 12:8

«وَ فِي الْيَوْم دَا، أَنَا اللّٰهْ نَحْمِي سُكَّانْ مَدِينَةْ الْقُدُسْ حَتَّى الضَّعِيفْ مِنْهُمْ كُلَ يَبْقَى شَدِيدْ مِثِلْ الْمَلِكْ دَاوُدْ. وَ ذُرِّيَّةْ دَاوُدْ يَلْقَوْا إِحْتِرَامْ مِثْلِي أَنَا الرَّبّ وَ مِثِلْ مَلَكْ اللّٰهْ الْمَاشِي قِدَّامْهُمْ.