زَكَرِيَّا 10:2 - الكتاب المقدس بالعربي الدارجي هنا تشاد

² لَاكِنْ كَنْ تَسْأَلَوْا الْأَصْنَامْ، يُرُدُّوا بِالْفَسَالَةْ وَ الشَّوَّافِينْ يِحَجُّوا بِكِدِبْ. حِلِمْهُمْ كُلَ مَا صَحِيحْ وَ يِصَبُّرُوكُو بِغَشّ. وَ فِي شَانْ دَا، الشَّعَبْ عَايْرِينْ مِثِلْ الْغَنَمْ وَ تِعِبَوْا بِسَبَبْ مَا عِنْدُهُمْ رَاعِي.

زَكَرِيَّا 10:2 Referenca të Kryqëzuara

مَتَّى 9:36

وَ عِيسَى شَافْ نَاسْ كَتِيرِينْ مَرَّةْ وَاحِدْ جَايِينْ لَيَّهْ وَ حَنَّ فَوْقهُمْ أَشَانْ هُمَّنْ تَعْبَانِينْ وَ عَيَّانِينْ مِثِلْ غَنَمْ الْمَا عِنْدُهُمْ رَاعِي.

حَبَقُوق 2:18

الصَّنَمْ الْيَنْجُرَهْ النَّجَّارْ يَنْفَعْ شُنُو؟ وَ التِّمْثَالْ هَنَا الْحَدِيدْ الْمَصْبُوبْ يِعَلِّمْ إِلَّا الْكِدِبْ. وَ مَالَا الْإِنْسَانْ يِآمِنْ بِأَصْنَامْ بُكُمْ الْهُو سَوَّاهُمْ بِإِيدَهْ؟

هُوشَع 3:4

وَ مِثِلْ دَا، بَنِي إِسْرَائِيلْ يَقْعُدُوا مُدَّةْ طَوِيلَةْ بَلَا مَلِكْ وَ بَلَا كَبِيرْ وَ بَلَا ضَحِيَّةْ وَ بَلَا حُجَارْ الْغَزَّوْهُمْ لِلْعِبَادَةْ وَ بَلَا فَرْمَلَةْ هَنَا رَاجِلْ الدِّينْ وَ بَلَا أَصْنَامْ.

حِزْقِيال 34:5

وَ الْغَنَمْ شَتَّوْا أَشَانْ مَا عِنْدُهُمْ رَاعِي. وَ هُمَّنْ بِقَوْا مَعَاشْ لِكُلَّ حَيْوَانَاتْ الْكَدَادَةْ وَ شَتَّوْا.

إرْمِيا 27:9

وَ كَنْ لَيْكُو إِنْتُو، مَا تَسْمَعَوْا كَلَامْ أَنْبِيَائْكُو وَ لَا شَوَّافِينْكُو وَ لَا الْيِكَلُّمُوا لَيْكُو بِحِلِمْ وَ لَا الْيِكَلُّمُوا مَعَ مَيْتِينْكُو وَ لَا سَحَّارِينْكُو. هُمَّنْ يُقُولُوا لَيْكُو إِنْتُو أَبَداً مَا تَخْدُمُوا لِمَلِكْ بَابِلْ.

تكوين 31:19

وَ فِي الْوَكِتْ دَاكْ، لَابَانْ مَا فِيهْ، مَشَى يَقْطَعْ صُوفْ غَنَمَهْ. وَ وَكِتْ هُمَّنْ مَاشِينْ، رَاحِيلْ سِرْقَتْ أَصْنَامْ أَبُوهَا.

حِزْقِيال 34:8

«أَنَا نَحْلِفْ بِأُسْمِي الْحَيّ. غَنَمِي إِنْتُو خَلَّيْتُوهُمْ لِلنَّهِبْ وَ بِقَوْا مَعَاشْ لِكُلَّ حَيْوَانَاتْ الْكَدَادَةْ أَشَانْ مَا عِنْدُهُمْ رُعْيَانْ. وَ مَا فَتَّشْتُوا غَنَمِي وَ لَاكِنْ قَاعِدِينْ تَسْرَحَوْا بِنُفُوسْكُو بَسْ، مَا بِغَنَمِي.» وَ دَا كَلَامْ اللّٰهْ الرَّبّ.

مِيخا 2:12

وَ اللّٰهْ قَالْ: «أَكِيدْ أَنَا نِلِمُّكُو كُلُّكُو، يَا ذُرِّيَّةْ يَعْقُوبْ وَ نَجْمَعْكُو كُلُّكُو الْفَضَّلْتُوا مِنْ بَنِي إِسْرَائِيلْ. وَ نِجِيبْكُو سَوَا مِثِلْ غَنَمْ فِي الزَّرِيبَةْ وَ مِثِلْ دَوْر فِي أُسْط الْمَرْعَى. وَ تَبْقَوْا مَجْمُوعَةْ كَبِيرَةْ الْعِنْدَهَا حَرَكَةْ.

حِزْقِيال 21:29

وَ وَكِتْ قَاعِدِينْ يِشِيفُوا لَيْكُو رُؤْيَةْ سَاكِتْ وَ يِشَوُّفُوا لَيْكُو بِكِدِبْ، السَّيْف يَقْطَعْ رِقَابْ الْفَسْلِينْ هُمَّنْ الْيَوْمهُمْ قَرَّبْ وَ وَكِتْ عِقَابْهُمْ جَاءْ.

حِزْقِيال 21:21

أَشَانْ مَلِكْ بَابِلْ قَاعِدْ فِي مَشْبَكْ الدُّرُوبْ الْإِتْنَيْن دَوْل لِيِشَوِّفْ. وَ يِهِزّ النَّشَاشِيبْ وَ يَسْأَلْ الْأَصْنَامْ وَ يَكْشِفْ الْكِبْدَةْ.

مَراثِي إرْمِيا 2:14

بِرُؤْيَةْ سَاكِتْ، أَنْبِيَائْكِ حَجَّوْكِ وَ مَا أَوْرَوْكِ بِالْخَطَا الْإِنْتِ سَوَّيْتِيهْ أَشَانْ تُتُوبِي وَ مَا يِوَدُّوكِ فِي الْغُرْبَةْ. بِرُؤْيَةْ، حَجَّوْكِ وَ بِكَلَامْ كِدِبْ، غَشَّوْكِ.

إرْمِيا 51:23

وَ بَيْكِ إِنْتِ، أَنَا ضَرَبْت الرُّعْيَانْ وَ غَنَمْهُمْ وَ الْحَرَّاتِينْ وَ تِيرَانْهُمْ وَ الْحُكَّامْ وَ مَسَائِيلْهُمْ.»

إرْمِيا 50:17

بَنِي إِسْرَائِيلْ مِثِلْ غَنَمَايْ الْمُوَدِّرَةْ الْكَتَلَوْهَا الدِّيدَانْ. وَ مَلِكْ أَشُورْ هُو الْأَوَّلْ أَكَلْهَا وَ نَبُوخَدْنَصَرْ مَلِكْ بَابِلْ فِي الأَخِيرْ كَسَرْ عَضُمْهَا.

إرْمِيا 37:19

وَ وَيْن أَنْبِيَائْكُو الْغَشَّوْكُو وَ قَالَوْا: ‹مَلِكْ بَابِلْ مَا يَجِي ضِدُّكُو وَلَّا ضِدّ الْبَلَدْ دِي.›

إرْمِيا 29:8

وَ دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: «مَا تِنْغَشَّوْا بِكَلَامْ الْأَنْبِيَاء الْمَعَاكُو وَ لَا بِكَلَامْ الشَّوَّافِينْ وَ مَا تِتَابُعُوا تَفْسِيرْ حِلِمْهُمْ كُلَ.

إرْمِيا 28:15

وَ إِرْمِيَا قَالْ لِحَنَنْيَا: «أَسْمَعْ، يَا حَنَنْيَا! اللّٰهْ مَا رَسَّلَكْ وَ إِنْتَ قَاعِدْ تُغُشّ الشَّعَبْ دَا لِيُخُطُّوا عَشَمْهُمْ فِي كِدْبَكْ.

إرْمِيا 23:17

بِكِدِبْ، هُمَّنْ يُقُولُوا لِلنَّاسْ الْيَنْكُرُونِي: ‹اللّٰهْ قَالْ إِنْتُو تَلْقَوْا السَّلَامْ.› وَ بِغَشّ، يُقُولُوا لِأَيِّ وَاحِدْ الْيِقَوِّي رَاسَهْ: ‹الْفَسَالَةْ دِي مَا تَجِي لَيْك.›

إرْمِيا 14:22

هَلْ مِنْ الْإِلٰـهَاتْ الزَّايْلِينْ هَنَا الْأُمَمْ دَوْل فِي وَاحِدْ الْيَقْدَرْ يِنَزِّلْ الْأَلْمِي وَلَّا؟ هَلْ السَّمَاءْ ذَاتْهَا تِنَزِّلْ الْمَطَرْ وَلَّا؟ لَا! إِلَّا بَيْك إِنْتَ اللّٰهْ إِلٰـهْنَا. وَ أَنِحْنَ نَرْجَوْك بِعَشَمْ أَشَانْ إِنْتَ بَسْ التِّسَوِّي كُلَّ شَيّءْ.»

إرْمِيا 14:13

وَ أَنَا إِرْمِيَا قُلْت: «يَا اللّٰهْ رَبِّي، دَاهُو الْأَنْبِيَاء قَالَوْا لَيْهُمْ كَدَرْ مَا يِشِيفُوا الْحَرِبْ وَ الْجُوعْ كُلَ مَا يَجِي فَوْقهُمْ. وَ بُقُولُوا بَتَّانْ كَدَرْ إِنْتَ اللّٰهْ تَنْطِيهُمْ الرَّاحَةْ وَ الْأَمَانْ فِي بَلَدْهُمْ.»

إرْمِيا 10:8

هُمَّنْ كُلُّهُمْ مُغَفَّلِينْ وَ مَطَامِيسْ وَ عِلِمْهُمْ الْجَايِ مِنْ الْأَصْنَامْ الزَّايْلِينْ دَوْل، مَا يَنْفَعْ.

إرْمِيا 8:11

هُمَّنْ يِخَفُّفُوا جِرَاحْ أُمَّتِي الْمِثِلْ بِنْت أَمِّي وَ يُقُولُوا: ‹سَلَامْ، سَلَامْ.› وَ لَاكِنْ مَا فِي سَلَامْ.

إرْمِيا 6:14

هُمَّنْ يِخَفُّفُوا جِرَاحْ شَعَبِي وَ يُقُولُوا: ‹سَلَامْ، سَلَامْ.› وَ لَاكِنْ مَا فِي سَلَامْ.

إشَعْيا 46:5

بِيَاتُو تِشَبُّهُونِي؟ وَ مَعَ يَاتُو تِسَاوُونِي؟ وَ مَعَ يَاتُو تِقَادُرُونِي أَشَانْ نُكُونُوا سَوَا؟

إشَعْيا 44:9

الْيَصْنَعَوْا الْأَصْنَامْ، كُلُّهُمْ مَا يَنْفَعَوْا. عَمَلْهُمْ الْغَالِي لَيْهُمْ كُلَ مَا عِنْدَهْ فَايْدَةْ. شُهُودْهُمْ عَمْيَانِينْ وَ مَا يَعَرْفُوا شَيّءْ. وَ فِي شَانْ دَا، يَلْقَوْا الْعَيْب.

أيُّوب 21:34

وَ بَيْدَا، كِكَّيْف تِصَبُّرُونِي بِكَلَامْ مَا عِنْدَهْ فَايْدَةْ؟ كَلَامْكُو كُلَّ كَيْ غَشّ!

أيُّوب 13:4

كَنْ لَيْكُو إِنْتُو، تَهَمْتُونِي بِكِدِبْ! إِنْتُو مِثِلْ دَكَاتِيرْ الْمَا نَافْعِينْ!

1 مُلوك 22:17

وَ مِيكَا رَدَّ لَيَّهْ وَ قَالْ: «أَنَا شِفْت كُلَّ بَنِي إِسْرَائِيلْ مُشَتَّتِينْ فِي الْجِبَالْ مِثِلْ غَنَمْ بَلَا رَاعِي. وَ اللّٰهْ قَالْ: ‹النَّاسْ دَوْل بَتَّانْ مَا عِنْدُهُمْ سِيدْ. خَلِّي أَيِّ وَاحِدْ يِقَبِّلْ بَيْتَهْ بِالسَّلَامَةْ.›»

قُضياء 18:14

وَ الرُّجَالْ الْخَمْسَةْ الْمَشَوْا رَاغَوْا حِلَّةْ لَيِشْ قَالَوْا لِأَخْوَانْهُمْ: «هَلْ تَعَرْفُوا كَدَرْ فِي الْبُيُوتْ دَوْل فِي فَرْمَلَةْ هَنَا رَاجِلْ الدِّينْ وَ تَمَاثِيلْ وَ صَنَمْ وَ تِمْثَالْ هَنَا حَدِيدْ وَلَّا؟ وَ هَسَّعْ دَا، فَكُّرُوا فِي الشَّيّءْ الْوَاجِبْ تِسَوُّوهْ.»

عَدد 27:17

وَ النَّادُمْ دَا يُقُودْهُمْ، يَمْرُقْ وَ يَجِي بَيْهُمْ وَ يِمَرِّقْهُمْ وَ يِدَخِّلْهُمْ. وَ بَيْدَا، شَعَبْ اللّٰهْ مَا يَبْقَوْا مِثِلْ الْغَنَمْ الْمَا عِنْدُهُمْ رَاعِي.»

مَرْخُوس 6:34

وَ وَكِتْ عِيسَى دَلَّى مِنْ الْمَرْكَبَةْ، هُو شَافْ نَاسْ كَتِيرِينْ مَرَّةْ وَاحِدْ قَاعِدِينْ يَرْجَوْه. وَ هُو حَنَّ فَوْقهُمْ أَشَانْ هُمَّنْ مِثِلْ غَنَمْ الْمَا عِنْدُهُمْ رَاعِي. وَ هُو بَدَا يِعَلِّمْهُمْ كَلَامْ كَتِيرْ.

إرْمِيا 23:32

وَ نُقُمّ ضِدّ الْأَنْبِيَاء الْيِحَجُّوا بِرُؤْيَةْ كِدِبْ لِيِوَدُّرُوا شَعَبِي بِغَشُّهُمْ وَ كِدِبْهُمْ. وَ دَا كَلَامْ اللّٰهْ. أَنَا مَا رَسَّلْتُهُمْ وَ لَا أَمَرْتُهُمْ بِشَيّءْ. وَ هُمَّنْ أَبَداً مَا يَنْفَعَوْا الشَّعَبْ دَا.» وَ دَا كَلَامْ اللّٰهْ.

زَكَرِيَّا 11:17

الْعَذَابْ لِلرَّاعِي الْمَا عَدِيلْ الْيِخَلِّي الْغَنَمْ! خَلِّي السَّيْف يَضْرُبْ إِيدَهْ وَ يِقِدّ عَيْنَهْ الزَّيْنَةْ! خَلِّي إِيدَهْ تَيْبَسْ وَ عَيْنَهْ الزَّيْنَةْ تُمُوتْ!»

تَثْنِية 13:2

وَ أَكُونْ الْعَلَامَةْ أَوْ الْعَجَبْ الْهُو حَجَّى لَيْكُو بَيَّهْ دَا يِلْحَقَّقْ وَ هُو يُقُولْ لَيْكُو: «يَلَّا نِتَابُعُوا إِلٰـهَاتْ آخَرِينْ وَ نَعَبُدُوهُمْ.» وَ دَوْل إِلٰـهَاتْ الْأَوَّلْ إِنْتُو مَا تَعَرْفُوهُمْ.

إشَعْيا 41:29

هُمَّنْ ظَالِمِينْ، مَا يِسَاوُوا شَيّءْ وَ خِدْمِتْهُمْ مَا تَنْفَعْ شَيّءْ! وَ إِلٰـهَاتْ الْأُمَمْ مِثِلْ رِيحْ بَسْ!»

إشَعْيا 44:25

أَنَا فَشَّلْت عَلَامَاتْ الْكَدَّابِينْ وَ الشَّوَّافِينْ أَشَانْ مَا عِنْدُهُمْ مَعَنَى. وَ قَلَبْت كَلَامْ الْحُكُمَاءْ وَ عِلِمْهُمْ، سَوَّيْتَهْ مَا عِنْدَهْ فَايْدَةْ.

إرْمِيا 27:10

وَ لَاكِنْ يِتْنَبَّأَوْا لَيْكُو بِكِدِبْ! وَ كَنْ تَسْمَعَوْا كَلَامْهُمْ، أَنَا نَطْرُدْكُو بَعِيدْ مِنْ أَرْضُكُو وَ نِدَمِّرْكُو.

إرْمِيا 27:14

مَا تَسْمَعَوْا كَلَامْ الْأَنْبِيَاء الْبُقُولُوا لَيْكُو إِنْتُو أَبَداً مَا تَخْدُمُوا لِمَلِكْ بَابِلْ أَشَانْ هُمَّنْ يِتْنَبَّأَوْا لَيْكُو بِكَلَامْ كِدِبْ.